Nobela ni RUDY S. CONTILO (Nailathala sa BALITANG HILAGA, Sept. 7 – 13, 2024 print edition)
(Maika-53 a Paset)
MASAPUL a makapagsaritata! Napateg ti ipaaramidko kadakayo!” naturay ti timek ni Kapitan Enteng iti panangtawagna ken ni Ka Zoilo. “Okey, kap!” insungbat ni Ka Zoilo.
Binilin ni Kapitan Enteng nga agkitada iti Casa de Corrales, maysa a paginanaan iti ili ti San Marino nga amianan ti San Sebastian. “Awan pagdanaganyo, natalged dayta a lugar,” kinuna ti kapitan. “Areglado, kap!”
Immun-una a simmangpet ni Ka Zoilo ngem ni Kapitan Enteng. Agur-urayen daytoy iti Casa idi sumangpet. Nangitugot daytoy iti dua a taona.
“Agsiputkayo. Amangan no adda nakasurot kadatayo!” insenias ni Kapitan Enteng ken ni Kagawad Banong. Pinili ni Kapitan Enteng ti suli a paset ti saan unay a nalawa ngem napintas ti pannakadiseniona a restauran.
Kayatna nga awan ti makangeg iti pagsaritaanda ken ni Ka Zoilo. Pinagbati lattan ti Kapitan ni Kagawad Banong iti lobby. Kaduana dagiti dua a kadua ni Ka Zoilo.
“Masapul nga aggarawkayon. Asidegen ti eleksion. Bangking ti laban. Kadua ni Angkuan dagiti agtutubo!” kinuna ni Kapitan Enteng.
“Natiktikan dagiti taok, aduda nga agsipsiput iti San Sebastian, kap. Ken ammokon no asino ti major a mangidaulo iti intelligence operative. Awan pay iggemmi a ladawanna. Ngem maysa a Major Agustino!” kinuna ni Ka Zoilo. Nagsabat dagiti kiday ni Kapitan Enteng. Naperrengna ni Ka Zoilo. Kabarbaro a nagan kenkuana dayta a nagan.
“Apay a diyo anupen? Sapulenyo no sadino man a kueba ti paglemmenganna!” immirteng ti rupa ti kapitan a nangdanog iti lamisaan. “Relaks, relaks laeng, kap! Dayta ti ar-aramiden ita dagiti taok. Ken maysa pay a napintas a damag, ipaipumponen dagiti autoridad ti bangkay ti taok a napasag kalpasan nga awan ti napan nangbigbig iti bangkay!”
Limmukay ti rupa ni Kapitan Enteng. Nakaanges iti nalukay. Napaisem. Awan ti nangkagat iti indiaya ni Mayor Marcelino a gunggona. Nagtungtung-ed, Mapagtalkanna a talaga ni Ka Zoilo. “Adda ipaaramidko,” kinuna ni Kapitan Enteng.
Nagtungtung-ed ni Ka Zoilo idi ilawlawag ni Kapitan Enteng ti kayatna a mapasamak. “Kayatko a nadalus ti lakadyo. Awan ti aniaman a buliliaso. Saankayo nga agdanag. Addanto bunosyo no malpas ti eleksion!” kinuna pay ti kapitan idi agsisinada.
Pinapetpetanna ni Ka Zoilo iti nabengbeng a sobre idi agsisinada. “For the boys! Ngem agannadkayo!” kinuna ti kapitan. “Isuda ti agannad kadakami, kap!” insungbat ni Ka Zoilo a mangigis ti isemna.
NALAWAG ti nagtulagan da Kapitan Enteng ken ni Ka Zoilo. Baliwanda ti estratehia ti panagkampaniada. Agdakiwas ti grupona iti rabii. Bagi ti kapitan a mandaren dagiti kakaduana a mangiwayat iti eksena kadagiti kabangibang a barangay. Iti kasta, mayakar ti atension dagiti polis kadagitoy.
Kidem ti sipnget iti dayta a rabii. Naulimek ti Kakamanguegan. Insiguro dagiti kadua ni Ka Zoilo nga isabotaheda ti linia ti koriente. Masapul nga awan ti makailasin kadakuada. Dagiti agtutubo a dadaulo ni Angkuan ken dagiti nakalista a napinget a kakaduana ti unaenda a haranaen.
Awan sawsawir ti grupo ni Angkuan. Uray dagiti checkpoint, nagpanawan dagiti barangay tanod. Itay pay nga immawag dagiti tao ni Kapitan Enteng a napan nagputokputok iti kabangibang a barangay.
Addan idiay dagiti polis a nagresponde. Iggem ni Ka Zoilo ti listaan dagiti agtutubo. Itay pay laeng malmalem a pinatiktikanna kadagiti kakaduana ti pagtaengan dagitoy. “Kitaek ita ti laingenyo!” indayamudom ni Ka Zoilo.
Iggem daytoy ti Armalite-na. Impigketna iti kanion ti riple ti sangaribu. Daytoy ti ilukipda kadagiti pagtaengan dagiti agtutubo ken dagiti kakadua ni Angkuan. “Ditoy! Daytoy a balay ti unaentayo!” insenias ni Ka Zoilo ti panagsarimadengda idi makaasidegda iti maysa a bungalow.
Saan pay a napalitada ti nahaloblak a bassit a bungalow. Tinidtid laeng a kawayan dagiti tawana. Masarsaragasag dagiti bumalay iti uneg.
Maanninagan iti silang ti kuridemdem a pagsaingan a nakaparabaw iti lamiseta ti pakabuklan ti balay.
Malaksid iti agtutubo nga agbasbasa iti Ariwanas Magazine, nagaabay dagiti sangapamilia a nagidda iti nayaplag a silag nga ikamen.Nannad a simmirip ni Ka Zoilo.
Apagisu, adda iti batog ti tawa ti agbasbasa nga agtutubo. Nagapo ni Ka Zoilo. Impasukibna kalpasanna ti murdong ti Armalite iti tawa.
Iti regkang ti tawa, nakita ni Ka Zoilo ti pannakaklaat ti agtutubo. Napatakder daytoy idi maimuttalat kenkuana ti murdong ti paltog. Nakigtot met a bimmangon dagiti bumalay.
“Alaenyo ‘ta kuarta. Pakumusta ni kapitan!” nakapsut ngem naturay ti timek ni Ka Zoilo.
Awan ti nakatimek kadagiti bumalay. “No saanyo nga alaen, kaipapananna a saandakayo a kadua. No alaenyo, siguraduenyo ti ibutosyo.
Subliandakayto no agkibaltangkayo!” imbagi ti maysa a kadua ni Ka Zoilo.
KINABIGATANNA, nasarangsang ti katawa ni Kapitan Enteng a nakasapsapa idi agreport kenkuana ni Ka Zoilo. Awan mintis ti inaramidda. Awan ti nagrekorida a polis. Nadalus dagiti kalsada.
“Perme ti pigergerda, kap!” kinuna ni Ka Zoilo a nangiladawan iti langa dagiti agtutubo a winarninganda. Innayonna a napandada amin dagiti adda iti listaanda a kakadua ni Angkuan.
“Saan la ket ita a maiturturog dayta nga Angkuan ti butengna a maabak!” impaggaak ni Kapitan Enteng.
NAGDINAMAG ti napasamak iti Kakamanguegan.
Maysamaysa nangibaga iti amak ken butengda. Saan a nakaturog dagiti dadduma iti panagdandanagda.
“Sika man ti mapatan-awan iti Armalite! No dimo met alaen ti nakapigket a kuarta, baka ania pay ti aramidenda kenka!” kinuna dagiti agtutubo a kakadua ni Maestro Pitong idi pasiaen dagitoy iti balayda.
“Nakabutbuteng, maestro!” kinuna met ti maysa a baket nga ina ti maysa kadagiti agtutubo.
Kasta met laeng ti napasamak kadagiti dadduma pay a kakaduada. Maysamaysa napan nagipulong kadakuada.
“Delikado daytoy. Madi daytoyen nga aramidda!” kinuna met ni Maestro.
Amante a nagngilngilangil.
“BUTBUTNGENDA metten dagiti kakaduatayo!” kinuna ni Angkuan idi makasangpet dagiti kakaduana.
“Ireporttayo kadagiti autoridad!” kinuna ni Patricio. “Kaasiannakami, Apo a Mannakabalin!” naapput ni Manang Ellen ti rupana.
“Mabuteng dagiti agtutubo, kakabsat. Saanda a kayat ti agsarita. Uray dagiti dadakkelda, dakkel ti amakda!”
Nangemkem ni Angkuan. Asino dagiti immay mangriribuk iti Kakamanguegan?
Saan pay a nalpas ti panagsasaritada idi umawag ni Major Salvador.
“Ania?” kinuna ni Angkuan a napamulagat iti impakaammo kenkuana ti hepe.
(Maituloyto)
