Nobela ni Vilmer V. Viloria (Nailathala ito sa Oct. 19 – 25, 2024 print edition)
Maika-18 a paset
NALIDAY ti nagmalem ni tata Bantor iti dayta nga aldaw. Kasla nagtupak ti sangagabsuon nga ulep iti barukongna. Di na ninamnama a kasdiay ti makitana iti panangpasiarna koma ken Misty. Adda ilem a nangukop iti pusona. Kasla mabriat ti barukongna.
Kayatna ti agsangit ngem awan met tumrem a luana. Apay koma a sangitanka, apay koma nga aglidayak ket awan met ti aniaman a relasion iti nagbaetanta. Kunkunana iti unegna. Ngem masaktan ta masaktan lattan. Di na met maanawa ti riknana nga agilem, a masaktan.
Nadanon ni Balong ti kasta nga itsurana. A kasla narba a kasuoran. “Apayen tata, nalpay met ta abagamon ket gapgapum a pinasiar ti maysa kadagiti sabongmo.”
Kuna ni Balong apaman a nakadissaag iti centar car-na. saan a simmungbat ni tata Bantor. Nanglangit ketdi sa nagpagna-pagna.
Kinautna ti bolsana, nangiruar ti sien. “ka man ket gumatang ti tablon ta isu man ket ti lidokenta.” Kinunana idi agangay. “mangalakanto payen ti sangarolio a mani.” Inpakamakamna.
Nagdardaras a nagpaabagatan ni Balong. Saannan nga inusar ti luganna ta isu pay diay gasolina a maibus. Nomuna ket nganin maatianan ta di pay nag-gas iti duan nga aldaw a panagpasadana. In-gatangna ngamin ti ramit ti ubing nga agbasa ti nasapulanna. Naugaw dagiti dua a siumanna no kuarta ti pagsasaritaan. Bassit pay met ti putotna ta awan pay tumawenna ken saan met nga agdede ta agsuso met ken inana.
AGDINDINNUNGSON dagiti ulo da tata Banotr ken Balong idi maibusda ti maysa a kuatro kanto a hinebra. Nganida payen agriri gapu iti pinnapilit iti no sino ti manokda a para president ken gobernador ti probinsia.
Ni Hinay ti pili ni tata Bantor ni met Roksa ken Balong.
Saandan a napuotan a naplatda a dua. Saanen a nakaawid ni Balong. Inyuldagna lattan iti basar. Agkatkatay metten ni tata Bantor iti nagiddaanna a sopa. Agkontesdan nga agurok. Didan napuotan dagiti pasamak iti nagpatnag.
Awanen ni Balong idi makariing ni tata Bantor. Nasakit ti ulona. Napan nagdiram-os ken nagmulumog. Rimuar. Aldaw gayamen. Agalas otson ti bigat. Nagpaudot iti danum sa nagkape.
Iti panagkapkapena, nalagipna manen ni Misty. Naa, ta agpanaas manen ti barukongna. Ngem masapul nga iwaksinan ta sigurado awanen ti namnamana a maaprosan dagiti muldotan a takkiag ken luppona. A mapisel dagiti nalamuyot a dakulapna ken maagkan dagiti nalabaga ken naingpis a bibigna. Hayyyy Biag…kunkunana nga isensennaay.
“Bye… dungngo.” Message sent. Dayta ti inteksna ken Misty. Nagtanittit ti selpona idi agangay. Kinitana, ne, adda teksbak ni Misty. Agpangadua no luktanna wenno saan.#
