Nagbabala ngayon ang Department of Health (DOH) sa posibilidad ng influenza-like illness (ILI) dahil sa malamig na panahon na dulot ng Northeast Monsoon o Amihan.
Maaaring magdulot ito ng pagtaas ng influenza-like illness at iba pang respiratory infections na kasalukuyang nangyayari sa bansa.
Ang ubo, sipon, at lagnat na nagpapahiwatig ng influenza-like illness (ILI) ay sanhi ng limang respiratory virus: Rhinovirus, Enterovirus, Influenza A, Respiratory Syncytial Virus (RSV), at Adenovirus.
Hinimok ang lahat na sundin ang “respiratory etiquette,” na kinabibilangan ng paghuhugas ng kamay upang maiwasan ang mga sakit sa paghinga, pagtatakip ng bunganga kapag uubo, at pananatili sa bahay kapag nilalagnat, sinisipon, o inuubo.
Ang mala-trangkaso o influenza-like illness (ILI) na mga kaso ay umabot sa 179,227 noong Disyembre 31, 2024, ayon sa data na inilabas ng Department of Health. Ito ay mas mababa ng 17% kumpara sa 216,786 na kaso na naitala ng ahensya noong 2023.#
