Nobela ni VILMER V. VILORIA (Nailathala sa BALITANG HILAGA, Oct. 5 – 11, 2024 print edition)
Maika-16 a paset
SUMANALTEEK a pagna a pagna ni tata Bantor iti aglawlaw ti balay da Pilo. Katekkatekenna ti ramayna. Umis-isem met ni Balong a mangsipsiput kenkuana kabayatan ti pangitangadtangadna ti agling-ling-et a renghorz. Kasla di makaanak a pusa kunkuna ni Balong a sagpaminsan pumidot ti mani a pulotan. No kuan agtugaw ni tata Bantor. Saanna pay a ginaraw ti botena. Ti mani ti pagngarngarietanna a ngalngalen. Saanda nga agin-innuni. Pasaray kusilapan ti lakay ni Balong, isem met a bangbangir ti isubadna no kasta nga agsabat dagiti matada.
Nagangayanna a nagsinada a di naginnuni. Saan nga ininum ni tata Bantor ti apagna a beer. Sinolo ni Balong nga inibus ti uppat a bote. Agtiwedtiweden idi agpakada nga agawid ngem saan latta nga indandaneng ti lakay. “Nasakit ti nakemna ti lodde a lakay.” Itantanamitimna idi andarennan ti center car a luganna.
Pinawerreten ni tata Bantor ti bentilador iti sala. Ditoyen a maturog ta kasadutnan ti sumrek iti kuarto. Inyuldagnan iti sala set sa nagkumot. Saannan a napuotan dagiti pasamak iti nagpatnag. Pati ti dumalagudog a tudo idi tumengngat’ rabii.
Nariinganna nga adda teks iti selponna. “Good Morning, have a nice day Thor.” Ni Misty ti nagteks. Ngem saan nga umanay a mangallangon ti siudotna idi rabii ti nabasana a teks. Agbarbaragsot a rimuar.
Nasdaaw ta nabasa ti aglawlaw. Urayla ngani simrek ti lued iti aruangan iti sango. Nababbababa ngamin ti balay ngem ti kalsada ta na-elevate idi kongkretoen ti gobierno ti dalan a batogda. Pagsayaatanna, saanen a natapok no kasta a panawen ti kalgaw.
Saanna a sinungbatan ti teks ni Misty. Napan ketdi angkurkor kadagiti manok, pabo kada ganso a tarakenda. Nambaranna nagrangaw ti kamotit a pammigatna.
Naibus ngaminen ti lebbenna iti refda ken naibusen ti inbati da Pilo nga alawansna. Adda pay met ketdi sangatupek a karne ken sangasupot a balatong. Tumiliwto ti dua a kalakian a manok ta pailakona ken Balong inton Huebes ta aldaw ti dapon idiay ili.
Awan ti mapanunotna nga aramiden iti dayta nga aldaw. Kawaw ti aldawna. No kuan kautenna ti bolsana ngem awan makarawana uray sensilio. “pimanka pay tata Bantor.” Kunkunana iti bagina. Idi agangay, napanunotna ti mapan idiay pasto. Uray ta asideg met laeng kunkunana.
Sinabat dagiti sanga-arban a baka. Ti ammo dagitoy ket mapan agpakan. Nakita ni tata Bantor ti penpen ti nareppet a garami iti bassit a kamarin. Nangbukra ti tallo kareppet tapno ipakanna kadagitoy. Linawlawna ti pasto ket nakitana a naungawen dagiti mula a napier. Nakirangen ti makan dagiti baka. Nalagipna ti nailata a pulitipot a tagapulot, inruarna sana linuktan. Dilpadilpatan ngamin daytoy dagiti baka. Kasta met ti timmangken nga asin, inbitinna iti suli ti kamarin.
Agaw-awiden idi agkiriring ti selponna. Kinitana, awan ti agparang a numero ti umaw-awag. “private number” dayta ti nalatak a makitana. Asino ngata daytoy? Sungbatak ngata? Agdudua a mangipisit ti pagsungbatan ti telepono.#
