Nobela ni RUDY CONTILLO (Nailathala ito sa July 20 – 26, 2024 print edition)
(Maika-46 a Paset)
TINARAY nga inarakup ni Teniente Charlito ti agpigpigerger iti buteng asawana ken dagiti dua nga annakda. Nakapanawen da Lt. Ferdie Corteza. “Apo, ania daytoy nasnastrekmon, Charlito! Nakabutbuteng ti politika. Agatraskan!” kinuna ti asawana.
“Saanak nga agatras. Ituloyko ti laban. No agatrasak, ibagadanton nga imbaagkon ti ipusko!” kinuna ni Teniente Charlito a nangap-apros iti bukot ti asawana. Idi agnadnad ti riknana, naitalimudok ti panagkitana kadagiti medalia ken plake ti pammadayaw a a nakakuadro ken nakabitin iti narra a diding. Naipaay amin kenkuana dagitoy idi adda pay iti serbisio. Tallopulo a tawen a nagserbi iti armada. Beterano. Adu a tuok ken rigatna.
Natatek ti bagina iti piglat a gapuanan ti bala. Naipasungalngal iti adu a laban iti Mindanao. Master Sergeant iti pumanaw iti serbisio. Naital-o iti nangatngato a ranggo idi agretiro. Napaanges iti nauneg. Maysa kadagiti tagipatgenna a naipaay kenkuana a pammadayaw ti Gold Cross Medal. Daytoy ti maikapat a kangatuan a military award nga ipaay ti Armed Forces of the Philippines a pangbigbig iti kinatured ken kinabannuar iti asinoman a soldado a di agpangadua a mangisebba iti karadkadna iti pagbabakalan.
Nagtultuloy ti panangbigbig ti AFP iti kabaelanna. Maysa ita nga asset ti ISAFP – a pagkaduaanda ken ni Major Nap Agustino. Nasinga ti panagpampanunotna idi agkiriring ti selponna. Ni Major Nap Agustino ti umaw-awag. Sinungbatanna a dagus. Impeksana ti panagyamanna iti napardas a panagresponde ti tropa.
Naleppay ti abaga ni Teniente Charlito idi ibaga ti major a saan a nakamatan da Lt. Ferdie Corteza dagiti napan immarubayan kenkuana. Imbilin ketdi daytoy nga agkitada iti safe house.
“Agkuyogkayo ken ni Mr. Juan dela Cruz,” kinuna pay ti major.
NASAPA da Angkuan ken Teniente Charlito a nagturong iti safe house da Major Nap Agustino. Nagkuyogda. Imbatida ti luganda iti presinto. Agur-urayen sadiay ni Maestro Amante a nasapa a kinasaritana. Ti pay laeng lugan daytoy ti usarenda. Ammo ni Angkuan nga agpada a markado dagiti luganda ken ni Teniente Charlito.
“Kunak no mapasuboak idi rabii,” insalaysay ni Teniente Charlito ti napasamak idi agtartarayen ti lugan. Kasla saan a mamati ni Maestro Amante iti insalaysayna. “Mayat koma tapno narissinganda, pari!” kinuna ti maestro. “Umatipukpok ket koman a laban, aya!”
“Dayta ngarud. Talloda koma. Ngem napanunotko a saan a napintas nga iti mismo a laongko nga agsayasay ti dara itoy nga eleksion,” insungbat ni Teniente Charlito nga agngilngilangil.
Nagulimek laeng ni Angkuan a nagtungtung-ed. Saan a nagkibaltang iti nagparikna kenkuana idi sardam. Wen, adda puntos ni Teniente Charlito. Masapul nga agtalinaed a natalna ti barangay itoy nga eleksion. Ngem ammona, rantada daytoy a pagulimeken. Karbenganna a salakniban ti bagina ken ti pamiliana. Agur-urayen kadakuada da Major Nap Agustino ken Lt. Ferdie Corteza idi sumangpetda iti safehouse. Pinauneg a dagus ida ti major.
“Positive. Grupo ni Ka Zoilo dagiti immay mangaradas koma kenka idi rabii, Teniente. We are just validating reports iti koneksionda iti grupo ni Kapitan Vicente Camanaoan. No nakemmeg koma da Lieutenant Ferdie Corteza ida, nalpas koman ti problema. Nagalisda. Kabisadoda ti pasikutsikot ken limsotanda. Bu we are closing in on them, saankayo nga agdanag,” imanamnama ti major. “Burnt out-nak kadin, sir?” nagmurareg ni Teniente Charlito.
“Saan. Kayatdaka laeng a kalapen. Ammoda ngamin a sika ti dakkel a katulongan ni Mr. Dela Cruz. Dakayo ken ni General Realidad. Ammoda a no mapukawka iti eksena, nalaklakada nga isayangkat dagiti planoda.”
Nataliaw da Angkuan ken Maestro Amante ni Teniente Charlito. “Now, masapul a doblienyo ti agannad.
Saantayo pay nga ammo ti kinaasino dagiti kabusor. But this time, baliwantayo ti laban. Let’s have picnic, gentlemen! Saankay nga agpatingga agingga a di maammuan ti paglemlemmenganda,” inkidag ni Major Nap Agustino.
Nagkinnita da Angkuan ken Maestro Amante. “Operation ti kayat a sawen ti picnic!” inyarasaas ni Teniente Charlito kadakuada.
SINAPSAPA ni Kapitan Enteng ti napan iti ayan da Ka Zoilo. Nainget ti bilin kenkuana daytoy a saan nga umaw-awag kadakuada. Kas iti sigud, sinigurado nga umuna ni Kagawad Esco ti ruar sakbay a rimmuar ti lugan ni Kapitan Enteng. Pinagbatina ni Sgt. Robino a detail security-na.
“Clear! Clear!” inyawag ni Kagawad Esco ken ni Kagawad Banong idi makitana a nadalus ti ruar ken kalsada. Ti laeng managsapsapa a mangipukpukkaw iti lakona a taho ti kakaisuna a nakitana a mangrugin nga aribungbongan dagiti tumuyutoy nga uries.
Pinaswitan ni Kagawad Esco ti agkabannuag, lampong, ken kasla kimriit ti kudilna nga aglaklako iti taho. Inseniasna ti dua a baso a plastic. Itedna ken ni Kagawad Banong ti maysa.
Idi unoren ti Fortuner ti kalsada, nalagip ni Kapitan Enteng ti kinuna ni Ka Zoilo idi awaganna.
“Amangan no naka-wiretap ti selponyo, Kap. Saankayo pay laeng nga umaw-awag,” kinuna ni Ka Zoilo.
Nagmusiig ni Kapitan Enteng. Kasano koma a mapasamak dayta Nainget ti bilinna nga awan ti asinoman a makastrek iti balayda. Dagiti sangailida iti inaldaw, agpatinggada laeng iti pagawatan iti sangaili. Ngem naamirisna a nasken nga agannad.
“Pardasam, kagawad!” indagdag ni Kapitan Enteng. Magagaran ni Kapitan Enteng a makasarita ni Ka Zoilo. Ninamnamana a makaawat iti napintas a damag maipapan ken ni Teniente Charlito idi rabii.
Ngem naupay. Awan ti naurayna. Dina ammo ti nagbanagan ti pinatrabahona iti grupo ni Ka Zoilo.
“Dikay met impalnaaw daydiay a Teniente Charlito?” impasabat ni Kapitan Enteng ken ni Ka Zoilo idi makadissaag it luganna. “Alisto gamin dagiti nagresponde, Kap. Narigat no mapasuboda.
Buliliaso amin a plano no naapputda dagiti taotayo!” kinuna ni Ka Zoilo. “Nagkapuyen dagiti taom? Sinerrekda lattan koman, a, ti balay dayta a teniente! No mapukaw dayta a tao, mapukolan la ketdi dayta nga Angkuan. Awanton ti pagsammakedanna!” ingngariet ni Kapitan Enteng.
“Kap, masapul a nalinay dagiti garawtayo. Narigat ti barabara.
Nabayagkamin iti kastoy trabaho. Ammomi ti ar-aramidenmi. No rimmuar la idi rabii dayta a Teniente Charlito, husto diay kunam, naipalnaaw koman!”
“Asino ngarud dayta a Major nga agop-operate ditoy San Sebastian?” binaliwan ni Kapitan Enteng ti saritaan.
Napangilangil ni Ka Zoilo.
“Naatap a kasla kigaw! Awan makaammo iti husto a nagan wenno langana.Ngem dika agdanag, kumagatto dayta iti appanmi!” kinuna ni Ka Zoilo.
Saanen a nagbayag pay ni Kapitan Enteng. Nagpakada a dagus idi adda awagna iti telepono. Ni Bise Mayor Nixon Peralta ti umaw-awag. Agturong kano ti bise mayor iti balayda.
Nagayad ti isem ni Kapitan Enteng. Ammona, adda la ketdi napintas a damag nga idanon kenkuana ti bise mayor.
Idi makasangpetda, addayta a mangrugi manen dagiti tao nga aglilinia a sumrek iti balayda. Nabara ti darang ti init. Awanen ‘tay aglaklako iti taho. Ti met aglaklako ita iti ice cream ti nakitada nga adda iti asideg ti ruangan. Tumuyutoy latta dagiti ubbing a magsigatang iti nakaapa nga ice cream.
“Igatangam man dagita nakalinia. Ibagam iti sorbetero, bayadakto aminen ti lakona!” kinuna ni Kapitan Enteng a nangdutdot iti dua ribu.
“Ibagamto no agkurang dayta,” kinunana idi mabatoganna ti sorbetero a nagkurno kenkuana.
Mayat sa ti ririingan ita ni Kap, inyisem ni Kagawad Esco a nangawat iti dua a sangsangaribu iti kapitan. Inseniasna ken ni Kagawad Banong nga agbatin.
Agur-urayen ti Land Cruiser ni Bise Mayor Nixon Peralta idi makaunegda.
(Maituloyto)
