Nobela ni RUDY CONTILLO (Nailathala ito sa July 13 – 19, 2024 print edition)
(Maika-45 a Paset)
NABAYAG a nagari ti ulimek. Uray idi nagpukawen ti ungor ti lugan ni Teniente Charlito, saan pay laeng a nakatagari da Angkuan. Nagkikinnitada kadagiti kakaduana. Agsalsaludsod dagiti matada.
Saan a maibuksilan ni Angkuan ti amin kadagiti kakaduana. Ammona, no ibagana ti pattapattana, adu la ketdi a saludsod ti tumanor. Saan pay a panawen a maammuanda nga adda pamalpalatpatanna ken ni Teniente Charlito. Retiradon daytoy. Ngem agparparikna kenkuana, adda naun-uneg a pakainaiganna kada Major Nap Agustino. Ammona a natured. Mapagtalkan. Ammona a salakniban ti bagina. Ngem no umay ni peggad, amkenna ti mabalin a mapasamak. Umay ti peggad a di agpakpakada. Mangliliput.
Nabayagen a nagpakada dagiti kakaduana. Ngem alimbasagen pay laeng ni Angkuan. Saanna nga ammo no epekto ti bassit a nainumda. Ngem naatap ti ridep. Kadagiti napalpalabas, dayta mamintallo wenno mamimpat a mangituyag, mayaten ti uurokanna. Ngem sabali ti marikriknana ita. Sabali ti agparparikna kenkuana.
KADAGITA a kanito, iti pagtaenganda, naigarahen ni Teniente Charlito ti luganna. Mayat ti kalawikiw ni Blanca, ti putot nga asoda itay dumsaag iti lugan. Ungor la ti luganna a mangngegna kumalkalawikiwen daytoy a mangur-uray iti ididissaagna. Nakaam-ammo nga umay mangangot-angot iti sapatosna no kasta nga ikabilnan daytoy iti pagiparparabawanna. Pangnamnamaanna ti asona. Maymaysa daytoy nga anak ti asona met laeng a natay idi mayanak daytoy. No kasano ti kinaamo ken kinalailona kenkuana, kasta met ti kinauyongna no adda sangsangaili a dina kaim-imuan. Naisurona iti aso dagiti naadalna idi adda pay iti K9 Setion iti serbisio. No kasano nga aywanan ken sursuruanna, maysa la a saona, ammon ni Blanca ti ar-aramidenna.
Nakaturogen dagiti kabbalayna idi umuneg iti balayda. Sabagay, agalas onsen. Naimasanda ti nagsasarita kada Angkuan. No saan pay nga immawag ni Major Nap Agustino, saan koma pay a nagawid. Inyuna-unay ti major ti panagannadna. Adda report nga adda mangganneb kenkuana. Isu a saanna a sinurot itay ti gagangay a dalan a paglaslasatanna. Nanglikaw. Nakasagana ti .45 na. Nupay ad-adayo ti dalan, ammona a nataltalged. Paset dayta ti training-da. Saan a routinary ti garaw ken pagnaan. Be unpredictable, sangkakunana iti isipna.
Insiguradona a nakarikep amin a ridaw ken tawa iti balayda. Ginangtanna pay dagiti solar lights a naipalikmut iti balayda. Inkeddengna a maturogen idi masinunuona nga awan ti aniaman a karkarna iti aglawlaw. Sapaennanto ti mapan iti safe house da Major Nap Agustino.
Saan nga ammo ni Teniente Charlito no kasanon kapaut ti pannakailibayna. Nalukag idi aganaw-aw ni Blanca. Saan a gagangay ti panagtaul ti aso. Ammona, saan a pusa wenno banias ti tataulanna. Napunger. Makaunget ti taul ti asona. Kayatna ti dumuklos.
Nagin-inayad a bimmangon iti iddana. Nakariing ti asawana. Inseniasna nga agulimek daytoy iti iddana. Sinaggaysana kalpasanna nga inarudok dagiti dua nga annakna iti kuartoda. Imbagana nga agidda pay laeng dagitoy iti baldosa.
“Uray ania ti mapaspasamak, saankay a pumanaw ditoy!” inyarasaasna.
Kasla mata ti sibeg dagiti mata ni Teniente Charlito a nanglukip iti dialosi. Bitbitna ti M-16, naannad daytoy a nangsiput iti ruar. Tumanaul latta ni Blanca. Kayatna a dugsaken ken pasardengen. Ngem dina kayat a madlaw no asino man ti immarubayan ti ayanna.
Iti lawag ti solar light, naipasirna ti tallo nga anniniwan a naglinged iti puon dagiti tallo a dadakkel a mangga. Nasipnget iti ayanda. Saanna a mailadawan ida. Ngem nalawag a maipasirna nga agpapada dagitoy nga armado. Atiddog ti iggem ti maysa idinto a side arms dagiti dua. Atapenna, imparada la ketdi dagitoy ti luganda iti adayo isu a saanna a nadnadlaw ti yaasidegda.
Lining-et ni Teniente Charlito iti nagtakderanna. No mabalin, saanna a kayat nga adda mairaman iti asinoman a kameng ti pamiliana.
Nalagipna ti selponna. Nagarudok a nangsubli iti kuarto.
“Adda tao iti ruar. Agpasirokka pay laeng iti katre, baket. Saankay a rummuar uray ania ti mapasamak,” inyarasaasna iti asawana nga agpigpigerger a nagtungpal.
Indayalna ti selpon. Idi agkiriring ket sungbatan ni Major Nap Agustino ti awagna, imbagana a dagus iti nakapsut a timek a masapulna ti augmentation. Saannan nga inuray ti sungbat ti major. Iniddepnan ti selpon.
Nagdardaras a nagsubli a nagsiim iti tawa. Saan nga agsarday ti taul ni Blanca. Idi agangay, dinanggayanen dagiti aso dagiti di unay adayo a kaarrubada.
Simmirip manen ni Teniente Charlito. Adda pay laeng dagiti tallo nga anniniwan iti arubayanda. Ammona, agur-uray dagitoy iti gundaway.
Nakaikeddengen. No agpilit nga umasideg dagiti umar-arubayan, kukuana amin ida. Uray nabayagen nga awan iti serbisio, no kunana a puntiriaenna ti mata ti agtartaray a kalding, saan nga agmintis. Marksman idi adda pay iti serbisio. Inubonna ti medalia iti pannakaipasungalngalda iti gubatan iti Jolo ken Basilan.
Nabayag a nagpalpaliiw. Saan latta nga aggargaraw dagiti anniniwan iti sirok dagiti mangga. Naisip ni Teniente Charlito a kayatda la ketdi a paruaren. Tapno nalaklakada nga anupen. Nagngariet. Nagbiddutda no dayta ti planoda. Saan nga agsebba. No nasken, appananna pay ida tapno sumrekda iti teritoriona.
Idi pagam-ammuan ta mangngegna ti ungor ti umas-asideg a lugan. Napardas, nasiputanna ti panagal-aludoy dagiti tallo nga immadayo linamut ti kasipngetan. Nangngena kalpasanna ti andar ti lugan iti di unay adayo nga in-inut a nagpukaw. Kinamat ida ni Blanca. Ngem sinitsitanna ti aso.
Madamdama pay addaytan dagiti dua a lugan iti arubayanda. Iti andr pay laeng dagitoy, kabisadonan a military jeep. Uray la naganikki dagiti pilid ti lugan iti pardas ti panagsardengda. Alisto a nagtappuak dagiti nakalugan iti military jeep.
Nakaanges ni Teniente Charlito iti nalukay. Ipagarupna itayen no addan maidasay iti arubayanda. Agkebbakebba, nagdardaras nga immulog iti balayda.
“Teniente! Teniente! Ni Lieutenant Ferdie Corteza daytoy!”
“Lieutenant! Imbag ta nakarespondekayo a dagus!” kinuna ni Teniente Charlito a nangsabet iti grupo.
“Ayanda?” naparagsit ni Lieutenant Ferdie Corteza a nagsaludsod a nagtaltalangkiaw iti aglawlaw.
“Nakapanawdan! Nagdardarasda itay mapasungadandakayo! Kunak no mapasuboak itayen!” inyanangsab ni Teniente Charlito.“Ammok, kayangkayam ida uray siksika. Ngem kayatmi koma nga apputen ida!” Kinuna ni Lt. Ferdie Corteza a nangtapik iti abaga ni Teniente Charlito.
“Okey, men, move out! Kamatentayo ida!” imbilin ni Lt. Ferdie Corteza.
(Maituloyto)
