Nobela ni RUDY CONTILLO (Nailathala ito sa July 29 – July 5, 2024 print edition)
(Maika-43 a Paset)
UMAYAKON!” naturay ti timek ni Kapitan Enteng. “Saan a ditoy safe house, Kap! Delikado!” kinuna ni Ka Zoilo. Saan a nakatimek ni Kapitan Enteng. Nagmalanga. “Under surveillance-ka, Kap! Uray dakami, adda la ketdi mangsipsiput kadakami!” kinuna manen ni Ka Zoilo idi saan nga agtimek ni Kapitan Enteng. “Agsasaraktayo laengen iti neutral ground.!”
“Ah, okey, okey! Agkikitatayo idiay Villamor Resort. Addaakton idiay iti maysa nga oras!” kinuna ni Kapitan Enteng ket iniddepnan ti selponna.Kinitana dagiti kakaduana. Tinung-edanna da Kagawad Banong ken Kagawad Esco. “Intayon! Usarentayo ‘tay baro a lugan!” kinunana. “Mangitugotkayo iti kargada. Esco, sika ti agmaneho!” immandarna. Natured ni Kapitan Enteng. Adda ni Gobernadora Alconis a sanggirna.
Nagdardaras ni Kagawad Esco a nanglukat iti Fortuner. Inruarna dagiti armas. Inyakarna iti kabarbaro a Ford Explorer. Kairuruar ni Kapitan Enteng ti lugan iti casa. Saan nga ammo dagiti kakaduana. Ngem dita nga iggatangna ti kagudua ti inted ni Gobernadora Alconis a campaign fund. Tapno saan a nakadkadlaw, kagudua laeng ti impaunana. Tintinnagannan ti balansena.
Insimpa ni Kagawad Esco dagiti kargada iti lugan. Saggaysada ken ni Kagawad Banong iti Baby Armalite ken kalibre .45. Bababassit ken nalaklaka nga idulinda. Saanen a makita pay no maaplagan iti floor mat ti lugan.
“Agbatikan,” kinuna ni Kapitan Enteng iti polis a bayabayna a nagtungtung-ed. “Adda laeng papananmi. Makaammoka pay la ditoy nga agsiput no adda umay a sabali a tao, awagannak,” innayonna. Talkenna ni Sgt. Robino. Nabayagen a naka-detail kaniana. Tunggal eleksion, isu latta ti maipatulod nga escoetna. Adu ti umap-apal kenkuana, Gapu iti pigsana ken ni Gobernadora Alconis, makapagkiddaw latta iti escort iti ngato a saanen a dumalan iti hepe, malaksid la kadagiti personal a bayabayna. Ngem saanna a kayat ti agmintis. Saan nga agsigsigurodo. Amangan no ti pay polis ti makaikanta iti maipapan iti grupo ni Ka Zoilo.
Immuna a rimmuar iti inaladan ni Kagawad Banong. Siniguradona a nadalus iti ruar. Nagtaltalangkiaw. Nadalus ti aglawlaw. Dagiti laeng aglaklako iti taho nga inaldaw a lumabas ken gumatgatangan dagiti guardia iti gate ti nakitana. Adda latta met ti sorbetero a lumned tumpaw iti bangir ti kalsada. Adu dagiti ubbing nga aggatgatang. Inseniasna ti iruruaren da Kapitan Enteng idi agangay.
Agsisimparat ti agtartaray iti panunot ni Kapitan Enteng idi aginiinen ti lugan a nangunor iti kalsada a sumarut iti kamino real. Nabanglo ti iug-aw ti aircon a nalamiis nga angin. Iti kinabayagnan iti politika, daytoy ti kadakkelan a labanna. Uray idi agkabannuag a sumursurot pay laeng iti ama ni Gobernadora Alconis a nagserbi met laeng a gobernador iti probinsia, awan ti kastoy a taray idi ti politika iti lugarda. Nangrugi laeng idi dumakkelen ti kuarta a sumrek kadagiti lokalidad babaen kadagiti proyekto ken idi maitudingen nga agsueldon dagiti opisial ti barangay. Immadun ti agngayangay.
Awan idi ti sueldo dagiti Sangguniang ti ili ken opisial ti barangay. Bassit la nga honorarium a sukat ti bannogda. Saan a kas ita, agsueldon dagiti Kapitan. Ket kadakkelan ti sueldo dagiti opisial ti Barangay Kakamanguegan gapu iti nabangon a planta ti koriente.
Nagtupa dagiti sangina idi malagipna ni Teniente Charlito. Siit daytou iti dalanna. Pagkarkaritna kadi ni General Realidad? Nalaka laeng nga iwalinda ti teniente. Ngem saanda a magaraw ti heneral. No dangilenda daytoy, sibubukelen nga AFP ti kalabanda. Naggiteb ti pispisna idi malagipna ti naidanon kenkuana maipapan iti major a lider ti grupo a mangbambantay iti San Sebastian. Asino dayta a major? Ania ti katataona? Ania ti panggepna iti Kakamanguegan? Agur-urayen iti Villamor Resort ni Ka Zoilo idi sumangpetda. Adda dua a kakaduana. Nakapaisano dagitoy. Maysa a kuarto ti inupaanda iti resort.
“Idiaytayo restaurant nga agsasarita,” intudo ni Kapitan Enteng ti panganan ti resort. Manmano ti makaammo nga adda kuarta ni Kapitan Enteng a naisosio iti Villamor Resort. Nabangon daytoy iti igid ti baybay. Imbautna ditoy ti dadduma a maaw-awatna iti hueteng. Intsik ti kasosiona.
Importasion ti negosio ti Intsik. Importer kadagiti surplus a piesa iti lugan. Uray dagiti kagawadna, awan ti ammoda maipapan iti resort. Ditoyna nga aw-awisen ni Mary no adda wayada.
“Kayatko a maammuan no asino ti lider ti grupo nga agop-operate iti San Sebastian,” ababa ngem naturay ti timek ni Kapitan Enteng idi agsasangodan iti lamisaan. “Mangtedka man iti mainum ken pagsasanguanmi,” inkiddayna iti serbidora.
“Dayta a Teniente Charlito ti tulbek, Kap!” intung-ed ni Ka Zoilo. “Mapagkantayo ngata?” immurareg ti Kapitan. “Laglagipenyo, nakasanggir iti pader! Diyo mabalin a banggaen ni General Realidad. Pader!”
Nagpaggaak iti nasarangsang ni Ka Zoilo a nangkita kadagiti taona a nakatugaw iti sabali a lamisaan.
“Uray sintonado, no husto ti pasakalyena, Kap, agkanta nga agkanta dayta a teniente!” in-thumbs-up ni Ka Zoilo. “Dakamin ti makaammo kenkuana. Pakaammuandakanto. Trabahuenmi iti mabiit!”
Saanen a nagbayag ni Kapitan Enteng. Sakbay a pimmanaw, nangibati iti nakasobre a paghapihapi ti grupo ni Ka Zoilo.
APAGSANGPETNA iti balayda, nadanonan ni Kapitan Enteng ni Danilo, ti impatugawna a presidente ti farmers organization iti Kakamanguegan. Iggem daytoy ti surat manipud iti Municipal Agriculture Officer ti San Sebastian. Nakunesna ti surat idi mabasana ti marginal note ni Mayor Marcelino. Pagpalpalawagen ti mayor maipapan kadagiti naiturn-over a makinaria iti Kakamanguegan.
Nagburek manen ti darana. Maipapan kadagiti makinaria nga inted ti Department of Agriculture ken ti gobierno probinsial ken lokal ti linaon ti surat.
Adda nangireport iti munisipio a maipapaidam kadagiti mannalon iti barangay dagiti makinaria.
“Anak ti salbagnan, bibianganda amin!” Ingngarietna a nangtaliaw kadagiti traktora, kiskisan, ken reaper iti dayaen ti covered court. Naabungotan dagitoy iti tolda.
“Ania ti aramidek, boss? Inreklamoda ken ni mayor. Siak ken sika ti taltalen ti munisipio ta duata a nangawat idi turn-over!” kinuna ni Danilo.
Nagsanamtek. Anak ti salbag dayta nga Angkuan, intabbaawna. Ammona, daytoy ti nangsulsol kadagiti mannalon a nagpulong iti mayor. Nakamurareg a nangtaliaw kadagiti agsasarita a kakaduana iti terasa. Nalawag ti bilinna.Prioridad a mapabulodan dagiti kakaduana.
“Agsasaritatayo, kakadua!” nakarupanget a nangpukkaw kadagiti kakaduana a nangkudkod iti ulona.
(Maituloyto)
