Nobela ni RUDY CONTILLO (Nailathala ito sa June 22 – 28, 2024 print edition)
(Maika-42 a Paset)
INISEMAN ni Angkuan dagiti lallaki nga agsasarita iti terasa. Nalawa ti balay ni General Realidad. Napalawlawan ti nalawa a laong iti nadumaduma nga agsabong a mula. Agpada a naayat ti heneral ti kaingungotna a retirado a superbisor iti masetas. Adu dagiti orkidiada a naipakapet kadagiti murimor a puon dagiti nagango a kawkawate. Agsarsarita da General Realidad ken ni Teniente Charlito a nasangpetan ni Angkuan iti salas. Adda sumagmamano a lallaki a nakatugaw ken agsasarita iti asidegda. Adda iggem dagiti dadduma a papeles. Iti langa ken gargarawda pay laeng, ammo lattan ni Angkuan a militar dagiti lallaki nupay imingan ti dadduma kakaduada.
“Naimbag nga aldawyo, general, teniente!” inkablaaw ni Angkuan kada General Realidad ken Teniente Charlito.
“Apo Kapitan!” inyisem ti nakashorts pants iti camouflage a heneral. Napaisem ni Angkuan. “Barbareng adda gasat, general,” kinunana. “Ti problematayo, kasla kinaban sa ti kuarta ti kalaban. Awan sarday ti warasda,” ingngilangil ni Angkuan a nagtugaw a simmango kadagiti dua. “Actually, dayta ti nangayabanmi kenka,” inkatek ti heneral. “Awan labantayo no kuarta ti magna. Adu ti supporter ni Kapitan Enteng. Legal ken illegal!”
“Illegal? Ania ti kayatyo a sawen, general?” nagmulagat ni Angkuan. “Ilawlawag ni Teniente kenka, padre,” insungo ti heneral ni Teniente Charlito iti abayna. Nakaul-ulimek ni Angkuan a nagtungtung-ed idi agpalawag ni Teniente Charlito. Sinaggaysa daytoy nga imbaga dagiti koneksion ni Kapitan Enteng. Ken no apay a kasla agubbog ti kuarta kenkuana.
“Madama ti beripikasion kadagitoy. Ngem dakkel ti posibilidadna nga agpayso. Malaksid iti illegal logging, kasosio iti hueteng iti San Sebastian ti kapitan. Adda pay report nga adda pannakainaigna iti droga ken iti gun for hire. Ulitek, agur-urnong pay laeng dagiti taotayo iti naan-anay nga ebidensia. Awan ti rummuar kadagiti mapagsasaritaan ditoy tapno saan a ma-pre-empt ti tropa,” kinuna ni General Realidad.
Madama ti panagsasaritada idi sumangpet ni Major Nap Agustino. Adda kadua daytoy a natayag ken narapis a napudaw a lalaki. “Major, ni Mr. Juan Dela Cruz, ti kandidatok a para Kapitan ditoy Barangay Kakamanguegan!” kinuna ti heneral idi agsaludo ti major kenkuana. “Yes, sir! Nabayagen nga am-ammokayo! It’s nice to finally meet you again!” nairut ti alamano ti major kenkuana. “By the way, this is Lieutenant Ferdie Corteza, my deputy,” inyam-ammo ti opisial ti kaduana ken ni Angkuan.
“Welcome to the club!” kinuna ni Teniente Charlito. Ad-addan a nagmalanga ni Angkuan. Nabayagen nga agaammo da Teniente Charlito ken da Major Nap Agustino? “It’s a long story! Intapik ni Major Agustino idi makitana nga agmalanga ni Angkuan. “Agkakaduakami. We work in a composite group. We cannot simply explain you in detail no ania ti trabahomi. Retiradon ni Lieutenant Charlito ngem maysa pay laeng kadagiti assetmi iti unit. Ti maipasiguradok, tumulongkami tapno maksayan no di man mapugipog ti kriminalidad inside and outside of the government!”
Saan a nakatimek ni Angkuan. Kayatna ti agsaludsod ngem kasla nabalud ti dilana. Napasnek a dimngeg idi ibaga ni Lt. Ferdie Corteza a nainget a sipsiputanda dagiti aktibidad ni Kapitan Enteng. “Malaksid iti panagiwarasna iti kuarta, am-ammuenmi no sadino ti safe house dagiti kinontratana a gun for hire!”
Napaumel ni Angkuan iti nangngegna. Nataliawna da General Realidad ken Teniente Charlito.
“Agan-annadka, pare. Agannadkayo amin!” kinuna ti heneral. “Saanka nga agdanag, Mr. Dela Cruz, saankami nga agpatingga agingga a dimi maipasuli ida,” kinuna ni Lt. Ferdie Corteza a nangtung-ed ken ni Angkuan.
Nakaadayon ni Angkuan. Un-unorennan ti kalsada a sumina iti ayanda General Realidad. Kumamangen iti ruaran iti highway. Ngem kasla saanna pay la a patien a kasta ti kinauneg ti koneksion ni Kapitan Enteng.
“Dayta ti gapuna a no mabalin, dina kayat nga ibbatan ti takemna, padre,” kinuna itay kenkuana ni Teniente Charlito.
“Mausarna ti takemna nga umasideg kadagiti adda iti poder. Tapno nawaya a maaramidna dagiti illegal nga aktibidadna,” kinunana pay nga agngilngilangil.
Nagsanamtek ni Angkuan. Isu met la a kasla agubbog ti kuarta iti kampo ti Kapitan. Kasla saan a maibusan.
PINAAYABAN a dagus ni Angkuan dagiti kakaduana iti kinabigatanna. Inlanadna kadakuada a nasken nga agannadda amin. Imbagana ti balakad ni General Realidad. Saannan nga imbuksilan no apay. Ngem imbagana a saanda nga ammo no asino dagiti mabalin nga aggandat iti dakes kadakuada.
“Awan ti agsolo a magna kadatayo nga agkmpania. Agkukuyogtayo. Awan ti maaramidanda no adutayo,” kinuna ni Angkuan.
“Agkararagtayo ken ni Apo Dios,” kinuna ni Manang Ellen ket pinagakubna pay dagiti dakulapna sa nagkidem a nangitanamitim iti ababa a kararag. SAAN a maipinta ti rupa ni Kapitan Enteng. Kalkalpas nga immawag kenkuana ni Ka Zoilo.
Agburburek ti darana iti impakaammoda kenkuana.
Naammuanna a ni Teniente Charlito ti kadua ti dida pay am-ammo a major nga agdakdakiwas iti San Sebastian.
Saan a mabalin, ingngariet ni Kapitan Enteng. No malagipna laeng a dakkel ti mapukawna no abakenda iti eleksion, makaanayen a pagburekan ti darana
Saanna a kabuteng dayta a Teniente Charlito.
Kasla kuto laeng nga ipalig-isna.
Inawaganna ni Ka Zoilo iti selpon.
“Umayak dita safe house-yo. Adda ipaaramidko kadakayo!” kinunana nga agpigpigerger.
(Maituloyto)
