Nobela ni RUDY CONTILLO (Nailathala ito sa June 15 – 21, 2024 print edition)
(Maika-41 a Paset)
SAAN a maputpot, rummuar sumrek dagiti tao iti laong da Kapitan Enteng. Nasapa pay no kasta iti bigat, tumuyutoyen dagiti aglilinia. Agingga iti malem. Ken uray pay iti rabrabii. Nupay nadagaang iti kinaadu dagiti kumunolkunol a tao iti nalawa a pinalinonganna a likud ti balayda, naanus dagiti buarangay nga aguray iti batangda. Naisemdanton no agawidda.
Imbilin pay ti Kapitan nga amin nga adda masapulna iti barangay, masapul a makasaritana. Amin nga agpapirma, lumasat amin kenkuana. Kayatna a makasarita ida. Penkenna no kaduana met laeng ida wenno saan. No wen, dagdagusenna a gusugosan. Ngem no saan, tugawanna dagiti papelesda. Gunggonada, sangkangayemngemna.
Gapu itoy, kanayon manen ti panangbabalaw kenkuana dagiti komentarista iti radio ken telebision. Sangkasaoda a parparigatenna kano dagiti kabarangayanna. Ken adda kanon butengna ta saanen nga agopisina iti barangay hall no di ketdi iti lumlumotenen iti balayda. Makapungtot tunggal madakamat ti buniagna a Kapitan Bayyuot kadagiti blind item. Ngem awan ti bibiangna. Napunnuan metten kadagiti komentarista a kanayon a mangbanat kaniana. Aglalo kada Danny Antal ken Joks Caban. Pulos a saanna a makadua ida.
Iti naminsan, adda manen agpapirma kenkuana. Dumawdawat iti Certificate of Indigency. Masapul a maipasa iti MSWDO ta masaksakit ti asawa ti nagpapirma Agkiddawda iti pinansial a tulong ta awan ti pangalaanda iti nayon ti gastuenda. Intantan a pinirmaan ni Kapitan Enteng daytoy. Ammona ngamin a pamilia ti maysa kadagiti barangay tanod a bimmallasiw ken ni Angkuan. Naitantan ti pannakayospitalna a puon ti nakatayanna.
Nagbalin a nabara nga isyu iti Kakamanguegan ti napasamak.
“Awanan, asi dayta a kapitan!” adda nagkuna.
“Adda idumdumana! No kakaduana, uray saan a masakit, paginsasakitenna tapno makaala iti AICS!” kuna met ti dadduma.
Ngem ipatangken ti Kapitan a saan a rumbeng a maikkan iti sertipikasion. Inrasonna nga adda kakabagian ti pimmusay nga adda mabalbalinna.
Ti kakaruan nga ibatbatoda ken ni Kapitan Enteng isu ti pammabalaw nga adda idumdumana a mairaman iti TUPAD program ti gobierno. Kunada nga imbes a dagiti marigrigat, dagiti ketdi adda kabagianna iti abroad ti ipailistana. Pasuktanna ti irekomenda dagiti kagawadna no ammona a saanna a kadua. Kas iti panangipailistana iti ama ken kabsat ni Mary ken ti kabsat ti tresorerana.
Ngem impatangken ni Kapitan Enteng nga awan ti bibiangna.
“Siak ti Kapitan, siak ti masurot!” iradiesna no kasta a maidanon kenkuana dagiti saosao dagiti kabarangayanna.
ITI DAYTA nga aldaw a nagadu manen dagiti agpipila iti laongda a warasanda, dayta la agsipsiput ti inaramid ni Kapitan Enteng. Saanna a kayat nga adda mailaok a sabali.
Maturtoran ni Mary, kaduana ti barangay treasurer, nga agilista kadagiti agsangpet a tao. Idasigda dagitoy iti naalada a listaan dagiti botante manipud iti Comelec. Kadua ni Kapitan Enteng dagiti kakaduana a kasla teggaak a mangkitkita kadagiti agsangpet. Nainget ti bilinna. Nasken a maarisit amin a sumrek. Awan ti makastrek iti uneg a selpon. Amkenna nga adda makalusot nga espia ti kabalubalda nga agi-video ken agireport. Agan-annad. Dinto ketdi adda makastrek a kameng ti Comelec Task Force.
“Ipaibatiyo amin a selpon!” inulit ni Kapitan Enteng nga imbilin kadagiti taona. “Areglado, kap! Awan danag!” Tung-ed a tung-ed dagiti pasurotna. Isem bennek ni Kapitan Enteng. Pasarayna taldiapan ni Mary. Agkalkaling-etan daytoy a mangbilbilang iti mayawat kadagiti nakalinia a tao a papel de banko. Pasaray agsabet ti panagkitada. Agkulibagtong ti barukongna no kasta nga itakaw a pallilitan ni Mary. Nasuerteanna ti sekretariana. Napintas. Nalailo. Adda utekna. Saannan a nalagip pay ti nangasawa. Naparagsit pay nga aggunggunay.
Tinerredna ti rumasok manen a riknana. Agan-annad kadagiti kakaduana. Awan ti ammo dagitoy maipapan kadakuada ken ni Mary. Dina kayat nga adda rummuar nga isyu kadakuada a dua. Amangan no isu pay ti pagburikintuan ni baketna. Addan planona ken ni Mary.
Ipasiarnanto iti makalawas iti Hongkong no malpas ti eleksion. Ipakadananto laeng iti asawana nga adda atendaranna a seminar dagiti kapitan iti makalawas iti Manila.
“Adayo pay ti butos. Bassibassit pay laeng ti panagityo,” imbilin ni Kapitan Enteng.”Agsublisubli dagita. Inton asidegen ti kaaldawan ti panagbubutos, isunton ti panangmansotayo iti waras!” imbannikes ni Kapitan Enteng kadagiti kakaduana.
Awan bibiang ti Kapitan uray ania pay ti ibagbaga dagiti kalabanna. Awan met pammaneknekda. Natalek. Nalawa ti laongna.
Iti likud ti balayda a pinalinonganna nga asideg iti nakaiparkingan dagiti bagonna ti pakaurnongan dagiti mangsupsuporta kenkuana. Awan ti asino man a makastrek. Nangato ti alad. Saan a makita iti ruar ti mapaspasamak iti uneg.
Masansan a rabiin no makaiwakas da Kapitan Enteng. No dadduma, maturogen dagiti kakaduana iti pagtaenganna. Aglalo no maimasanda ti agsasarita ken agiinum gapu iti bannogda.
MALAKSID iti balayna a pagyanan dagiti bayabay ken supporterna, adda maysa a nalimed a disso nga inupaan ni Kapitan Enteng para kadagiti paisano nga inupaanna. Adda iti ruar ti poblasion. Inrekomenda ni Bise Mayor Nixon Peralta ti grupo. Saanna a kayat nga adda makabigbig kadakuada. Nabiit pay dagitoy a simmangpet manipud iti kabangibang a probinsia.
“Diak kayat nga adda makaammo nga addakayo ditoy,” nainget ti bilin ni Kapitan Enteng kadagiti lallaki nga inabanganna iti dayta nga agsapa a panangpasiarna kadakuada iti safe house. “Saankayo a rummuar malaksid no adda lakadyo. Amin a masapulyo ibagayo laeng kadagiti kakaduak. Idanondakayo!” innayonna.
Kadua ni Kapitan Enteng ni Kagawad Esco. Malaksid ken ni Kagawad Banong, daytoy ti maysa a talkenna. Nalinis ti trabahona. Tirador. Adun ti nagkadkaduaanda manipud idi dinutokanna a chief tanod sakbay a pinagkonsehalna.
“Liniami dayta, kap. Kabisadomi ti ar-aramidenmi. Saanka nga agdanag, maabrotmo, saan a masayang ti imbayadmo kadakami,” kinuna ni Ka Zoilo, ti lider ti grupo. “Agunika laeng. Makaammokamin nga aggaraw. Nalimed ti trabahomi,” innayonna.
Masapul ni Kapitan Enteng ti serbisio da Ka Zoilo. Isuda ti pangnamnamaanna kadagiti nasken nga ipaaramidna. Kompletoda iti kargada. Pasigda nga ex-military. Saanna a kayat ti maisarsarak.
Saanen a makaidna manipud nadamagna nga adda grupo dagiti special operations group a mangsipsiput kenkuana. No bilang, ti grupo ni Ka Zoilo ti isangdona kadakuada. Nalawag ti tulaganda. Saanda nga agaammo no adda buliliaso iti trabahoda.
Makaanay koman ni Kagawad Esco a pagtrabahuenna. Ngem am-ammodan iti San Sebastian. Saanen a makapaggaraw. Adu ti mata a mangsipsiput kenkuana. Ti laengen panangiwanwanna iti grupo ni Ka Zoilo ti aramidenna.
KADAGITA a kanito, nagdardaras ni Angkuan a nagturong iti pagtaengan ni General Realidad.
Saanna nga ammo no ania ti ibaga kenkuana ti heneral. Importante la ketdi. Saanna koman nga inawagan no saan a napateg ti pagpatanganda.
Iparparada pay laeng ni Angkuan ti luganna iti nalawa a laong ni General Realidad, nailasinnan ti maysa kadagiti lugan a nakaparada ti asideg ti mini-swimming pool iti abay ti garahe. Lugan ni Teniente Charlito.
Agkebbakebba ni Angkuan a dimsaag iti luganna.
(Maituloyto)
