Nobela ni RUDY CONTILLO (Nailathala ito sa June 8 – 14, 2024 print edition)
(Maika-40 a Paset)
ARAMIDENDA amin a pamuspusan!” impasabet ni Angkuan idi makasangpet dagiti kakaduana. “Rinugiandan ti aggatang iti butos!”
“Imbag ta naalisto dagiti autoridad!” insungbat ni Maestro Amante a nangmesmes. “Saanda a nakapagplastar!”
“Agpatingganto!” intungtung-ed ni Teniente Charlito a tumanuktok dagiti ramayna iti rabaw ti lamisaan a kunam no agmakmakinilia. Napasnek a dumdumngeg kadagiti ibagbaga dagiti kakaduada. “Awan ti agbilang a di agpullo!”
“Agtultulid ti pilid. Bay-an ta agbulallekda!” kinuna met ni Engr. Redong a sumanamtek a pasaray tumangad a mangapiras iti tengngedna a kasla agsumsumar.
“Dagiti pada a marigrigat ti punpuntiriaenda. No masisirap iti sileng ti pirak dagiti kalugarantayo, awan latta ti nasayaat a masakbayan ti barangaytayo,” kinuna met ni Manang Ellen a nangsarapa iti ulona.
“Dagiti agtutubo, kakadua isuda ti namnamatayo. Isuda ti napinget a mangiruprupir iti prinsipio nga ilablabantayo!” insalpika ni Maestro Pitong a pasaray mangbiding iti selponna. Panay ti report kenkuana dagiti kontakna nga agtutubo iti barangay. Maammuanna amin a kontra garaw ti kalabanda.
Napangilangil ni Angkuan. Sinangona dagiti kakaduana.
“Ti pampanunotek, asino dagiti ar-aramatenda a tattao? Paggapgappuanda? Saan nga am-ammo ti kinatao dagitoy. Sangsangailida. Namak pay no adda sabali a planoda? Ammoda ti ar-aramidenda a talaga,” insanamtekna.
“Kompadre, saanka nga agdanag. Agtalektayo kadagiti autoridad. Saan nga amin, mapamalmalan iti pirak!” kinuna ni Teniente Charlito a napatakder iti nagtugawanna.
Timmakder ni Angkuan. Nagsammaked iti lamisaan. Pinerrengna dagiti kakaduana.
“Saantayo nga aramiden ti ar-aramidenda. Tumulongtayo laeng no adda agkiddaw ti tulong,” kinuna ni Angkuan. “Kayattayo nga ipakita ken paneknekan kadagiti tattao a saan laeng a kuarta ti napateg…”
“Wen, isurotayo ida babaen ti nasayaat nga aramid. Agbalintayo a pagulidanan. Saan a ti panangabak ti kangrunaan a gagemtayo. Ad-adda pay ti panangedukartayo kadagiti umili,” imbagi Patricio.
Namingmingan ni Angkuan ni Patricio. Manmano nga agtimek daytoy. Ngem tunggal agsarita, nabagas. Adda latta ti tugot ti kinamannuratna.
MARIKNA ni Angkuan ti bannogna. Kampania ditoy, kampania idiay. No dadduma, kasla linnemmengan ti aramidda. No aggapuda iti maysa a purok, apagpanawda laeng, sublaten met a pasiaren ti grupo ni Kapitan Enteng.
Ngem ti maysa a napaneknekan ni Angkuan iti panagkandidatona, daytoy ti nasken a panagatendarda kadagiti amin a pasken iti Kakamanguegan. Saan a mabalin a lumanganda no adda awis ti kasar, buniag, wenno minatayan. Saan a mabalin a dida mangdutdot. Inawaganda daytoy nga agkakadua iti KBL. Kasal, binyag, ken libing a kunada iti Tagalog. Ania pay, sumaning-i dagiti kakaduana.
“Paset daytoy ti panagserbi,” sangkakunana. “Saan a panaggatang iti butos no di ket tulongtayon kadakuadan.”
“Ngem dagiti dadduma, pati igatang iti gatas, agas, pagplete, pagkasangayan, ken no ania la ditan, yasugda metten!” insanamtek ni Maestro Pitong. “Isu nga uray diay sigsiglotan ni kumanderko, mairamramanen!” inyanek-ekna.
“Ala, napia laeng a pakairamananda iti pensionmo, pare. Napuspuskol la bassit ti panagpitpitakam!” inyangaw ni Maestro Amante a puon ti nagkakatawaanda.
Gapu ta kasta met laeng ti aramid ti grupo ni Kapitan Enteng, dandanida agrarana kada Angkuan. Bassit laeng a lubong ti pagpusiposanda itoy a panawen ti kampania. Agsisinniput, agsisinniimda. Mapangilangil laengen da Angkuan. Madamdamagda a doblien ti grupo da Kapitan Enteng ti bassit a maipapaaysa a tulong kadagiti agkasapulan.
NASANGAILI ni Angkuan ni Mayor Marcelino iti maysa a malem. Kas iti dati, adda latta dagiti pasurot ti mayor a bayabayna. Nasiput dagitoy idi dumsaag ti mayor iti luganna. Taliawda a taliaw. Mata amin a likudan ken sikiganda.
Saan a mababalaw ni Angkuan ti mayor. Masapul nga agannad. Saan la a mamin-ano.
Kas iti napasamak idi iti maysa a mayor iti Cagayan a madama ti flag ceremony idi mapasag iti ima dagiti kabusor ti turay.
Sabali pay ti kaso ti maysa pay a mayor iti umabagatan a napapatay met laeng bayat ti flag ceremony. Adun payen dagiti natambang iti dalan ken napapatay iti uneg a mismo ti simbaan.
“Damagko a gaboranda iti tulong da gobernadora ken diputado ni Kapitan Enteng,” panangirugi ni Mayor Marcelino.
“Ngem saanka nga agdanag, nainget ti bilinko kadagiti polis a siputan ken awan ti santuenda tapno dida maaramat ti kuarta. Uray asino, saanda nga agbuteng.
Basta aramidenda no ania ti rumbeng.” “Dayta ti parikutmi ti grupomi ,mayor,” insungbat ni Angkuan.
“Imbagakon ken ni hepe nga agkiddaw ken ni provincial director iti nayon a puersa ti lokal a polisia.
Masapul nga aldaw ken rabii, adda agrekorida kadagiti amin a purok iti barangay,” kinuna ti mayor.
Limmawag ti rupa ni Angkuan iti nangngegna. Nagyaman ken ni Mayor Marcelino. “Agunikayo laeng no ania ti maitulongko. Silulukat ti opisinak iti aniaman nga oras, Mr. Dela Cruz!” kinuna ti mayor a nangsallabay ken ni Angkuan sakbay a nagpakada.’
MAKAPUNGTOT ni Kapitan Enteng. Naidanon amin kenkuana ti pannakatiliw dagiti tallo a kakaduana ken ti awan sarday a panangbambantay ita dagiti autoridad kadagiti garawda.
Ngem uming-inget dagiti polis. Masiudot. Naipalapayag pay kenkuana ti kaadda ti grupo dagiti special operations group nga idadauluan ti maysa a major a nalimed nga agdakdakiwas iti San Sebastian.
Agparparikna kenkuana, ti Barangay Kakamanguegan ti kangrunaan a bambantayanda. “Ammuenyo no sadino ti safe house ti grupoda,” immandar ti mayor iti polis a nakadetalye kenkuana.
(Maituloyto)
