Nobela ni RUDY CONTILLO (Nailathala ito sa June 1 – 7, 2024 print edition)
(Maika-39 a Paset)
NAATAP ti tuturogan ni Angkuan iti dayta a rabii. Agsublisubli iti isipna dagiti mapaspasamak maipapan iti eleksion. Nagulo. Narikut unay, insennaayna. No apay a nasken nga agpipinnatayda gapu laeng iti panagiinnagawda iti takem. No amirisen, saan koma a nasken a mapasamak dayta. Eleksion laeng iti barangay. Ti panagserbi iti barangay ket panagserbi. Saan a panagpabaknang. Bassit laeng ti barangay a pagpusiposan. Aniant la ketdin kadagiti nangatngato a posision?
Saan nga agamak para iti bagina. Ngem adda aripapana para kadagiti kakaduana. Kasanon no mairamramanda iti gulo ti politika? No maminsan, adda pammabalawna iti sistema. Saan a naurnos. Uray agbalin a paspasurot dagiti dadduma aramidenda magun-odda laeng ti kayatda. Adu ti madadaan a paaramat gapu iti politika.
Nalagipna ti maysa a politiko iti probinsia a nabayagen a pimmusay. Daydi Dr. Godofredo S. Reyes.Mannurat ken beterano idi gubat. Mabigbig a siruhano, edukador, bankero ken ekonomista. Adu ti nagsasaadanna a poder. Nagmayor, nagdiputado, naggobernador ken nabayag pay a nag-bise gobernador. Nagdelegado pay iti Constitutional Convention idi 1971 ken nag-chairman iti Medical Board of Examiners. Am-ammo unay ni Angkuan ni Dr. Reyes ta napadpadasannan iti agkabannuag ti napan nagpapaagas kenkuana. Libre ti singirna kadagiti marigrigat. Ngem iti laksid iti adu a nagtakemanna, a saan a bimmaknang ni Dr. Reyes. Nagtalinaed a simple ti biagda iti kaingungotna a ni Dr. Cion Reyes. Saan a namansaan ti naganna. Magustuanna man ti kinasayaat ni Dr. Reyes. Naabotanna ti naudi a panagtakem ni Dr. Reyes. Iti panawen ti kampania, agdandaniw laeng. Saan nga uso idi ti aggatang iti butos.
Napaanges iti nauneg. Nabayagen a pimmusay dagiti dua a mangngagas. Lagipda laengen ti nabati iti kaunggan dagiti umili. Nabasanan ti Tan-ok ti Kailokuan a kabibiagna a sinurat ti am-ammona a mannurat iti Bannawag a naipatarus payen iti Ingels. Napintas a pagulidanan ni Dr. Reyes. Isuda koma ti pagsarmingan dagiti agserserbi ita iti turay. Napasennaay. Wen, ammona, awanen ti makasurot pay iti tugot ti doktor. Adu kadagiti sumrek ita iti politika a gagangay laeng ti biagna. Ngem namutittitton no pumanawda iti serbisio publiko.
No ania pay dagiti nagsisimparat a laglagip ken ni Angkuan. Nagangayanna, pumarbangonen iti sumangbay ni ridep. Agsasarunon itay ti taraok dagiti abuyo iti di unay adayo a bantay.
Kasla agtatapaw ti ulona idi makariing iti kabigatanna. Nasupnet dagiti matana. Nagtarusanna ti nagtugaw iti kulumpio tapno dumngeg kadagiti nasapa a damdamag iti DWTP.
Damdamag lokal ti maiwarwagawag. Namurmurayan idi mangngegna nga uray kadagiti nadumaduma a barangay iti probinsia, pagiinnagawanda met ti puesto. Adda agakabsat nga agkandidato ken agsangdo a para a Kapitan. Adda pay nagsina nga agassawa. Adda pay barangay a pito ti para kapitanna ken limapulo ti para kagawadna. Pagpiaanna iti SK ta maipariten nga agkandidato ti asino man nga adda kabagianna a nakatugaw iti gobierno. Awan la dumana, naisipna. Kas met la iti Kakamanguegan. Agpayso a duduada a kandidato a para Kapitan. Ngem napunger unay ni Kapitan Enteng ken dagiti kakaduana. No mabalin, pagkulimbitinanda ti takemda.
Tumakder koman tapno mapan mangtempla iti kapena pagur-urayanna iti panamigatda idi maitubong ti lapayagna ti news flash iti radio. Iwarwaragawag ti news anchor nga adda natiliwan ti Comelec Task Force nga agiwarwaras iti kuarta iti Barangay Kakamanguegan. Segun iti damag, naapput ti Task Force a buklen ti Comelec, PNP, ken AFP dagiti lallaki a mangal-allukoy kadagiti botante. Naaktuan pay dagitoy nga agiwarwaras iti kuarta.
Nagpelles. Inkeddengna a mapan a dagus iti kuerpo ti polisia.
Nagtarus iti opisina ni Major Salvador idi makasangpet iti PNP station.
Apagkatokna iti ridaw, simreken a dagus ni Angkuan.
“Good morning, Mr. Dela Cruz!” timmakder ti hepe a nangsabet a nangalamano kenkuana.
“Sir, nangegko ngamin iti news report iti radio maipapan kadagiti natiliw ti task force idi rabii!” saan a makaidna ni Angkuan.
Nagsanamtek ti hepe a nangpatugaw kenkuana. “Husto dayta, sir. Adda tallo a lallaki a natiliwanmi iti Task Force. Isuda dagiti adda iti karsel ita,” inlawlawag ti hepe a nangipatuldo ken ni Angkuan iti pagbaludan. “ Bigbigenyo man ketdi, sir.
Dida met aminen no asino ti amoda.” Nabayag a miningmingan ni Angkuan dagiti tallo a lallaki nga agtawen ngata iti tallupulo agpangato. Napangilangil.
“Awan ti am-ammok kadakuada, hepe,” kinuna ni Angkuan. “Adda kaduada a nakalibas, Mr. Dela Cruz. Mamalaybalayda iti dis oras ti rabii,” kinuna pay ni Major Salvador.
Napamulagat ni Angkuan. Kasla dina patien a kasta ti kasapana, aggatangen iti butos da Kapitan Enteng. Nasapa pay unay. No aginaldaw nga agiwarasda, pangal-alaandan iti bakaad-adu a pirak?
“Inimbestigaryo dagiti tattao, hepe? Ania ti kunada?” nagsanamtek ni Angkuan a kasla di pay laeng mamati.
“Dayta ti rigatna, sir. Awan met ti mayat nga agtimek. Awan pay ketdi ti mayat nga umamin nga adda naawatda a kuarta!” Ad-addan ti panagmulagat ni Angkuan.
“Ti problema pay, sir, awan ti naala a kuarta kadagiti tallo. Naitaray dagiti nakalibas a kaduada!”
Kasla aglulok dagiti tumeng ni Angkuan. Iti kinuna ti hepe, kasla ibagbaganan nga awan ti pagibasaran tapno agtultuloy a maibalud dagiti natiliw. A nakapsut ti kaso ta awan ti mayat nga agsaksi.
Napangilangil. Adda rikna nga agragut a rumkuas iti barukongna. Kaanonto a maipasagepsep kadagiti umili a saan a nasken nga ilako ti butosda?
Nagdardaras a nagawid kalpasanna. Inawaganna a dagus dagiti kakaduana. Nasken nga agsasaritada.
(Maituloyto)
