Nobela ni RUDY CONTILLO (Nailathala ito sa May 25 – 31, 2024 print edition)
(Maika-38 a Paset)
NAKAGAYGAYAD ti isem ni Kapitan Enteng. Igpilna ti nabengbeng a brown envelop nga inted ni Gobernadora Alconis a nanglabas lattan kadagiti empleado ti kapitolio a mangdumdumog kadagiti trabahoda. Kasla nagpayak dagiti sakana, no namin-ano la nga inaskawna ti narra a suelas, nakadanonen iti agdan. Nalag-an ti riknana a nangturong iti nakaiparadaan ti luganna iti abagatan ti kapitolio.
“Para kampaniam dayta, Kap!” kinuna itay ti gobernadora nga umis-isem idi yawatna ti sobre. “Siguraduem a layus ti butosmo!” Uray idi agtartarayen ti Fortuner-na, kasla saan pay la a patien ni Kapitan Enteng a naitakalna manen. Agasem a pabor ti gobernadora kenkuana? Saan a makakikit no adda man intulong ni Mayor Marcelino ken ni Angkuan. Mangigis ti isemna. Mangabak a mangabak uray kagudua laeng ti gastosenna iti inted ti gobernadora. Gumanansia pay! Addanto pay inayon ti diputado.
Dakkel ngamin ti botante iti Barangay Kakamanguegan. Pagrubuatan dagiti kandidato no masolidda ti butos. Ket naiturturog ni Kapitan Enteng ti panagdaydayyengna a nakaigpil pay laeng iti nabengbeng a brown envelop.
Agur-uray dagiti kakaduana idi sumangpet ti Kapitan iti balayda nga as-asikasuen ti asawana ken dagiti katulonganda. Adda pagsasanguan dagitoy a mainum ken pulotan. Nakitana dagiti tinuno a paltat a paboritona.
“Insangpetanka, Kap! Paboritom dagitoy!” kinuna ni Kagawad Banong. “Pangnamnamaanka a talaga, Kagawad!” kinunana a nangtapiktapik iti abaga ni Kagawad Banong. Apagsukatna iti kuartona, rimmuar met laeng a dagus ni Kapitan Enteng. Nakapaspasnek daytoy a nangsango kadagiti kakaduana. Adda iti likudanda dagiti coordinator-da.
“Sumadomin, Kap!” kinuna ni Mary a nagtugaw iti abay ti Kapitan. Adda iggemna a papel ken listaan dagiti botante iti tunggal purok. “Dandani kagudua dagiti purok ti bimmallasiw iti grupo ni Angkuan…”
“Puniemes!” intabbaaw ni Kapitan Enteng. Uray la a nakapugso iti intagayna a Double Black. “Dati a pagpigsaak dagitoy, a!” kinunana a nagmulagat idi mabasana ti listaan nga inyawat ti sekretaria.
“Napigsa ti amor ni Angkuan, kap!” insalpika ti maysa kadagiti coordinator. “Ania nga amor amor ti ibagbagam?” imbugtak ni Kapitan Enteng. Timmayab ti kusilapna iti ayan dagiti coordinator. “Ti ibagayo, dakkel la ketdi ti impamalmal daydiay nga Angkuan kadagiti botante!” inradiesna.
Saanen a nagtimek pay dagiti coordinators. Namrayanda lattan ti nagkikinnita sada nagdumog. “Kagawad,” tinung-edan ti Kapitan ni Kagawad Banong. “Kitaenyo dagiti purok a pagkapsutantayo. No mano ti bilangda, doblientayo ti dati nga it-itedtayo kadakuada. Pera pera lang yan!” kinunana.
“Areglado, kap. Ken uray koma dagitay tanod, tapno saanda a bumallasiw, igulpetayon nga ited ti sueldoda!” insungbat ni Kagawad Banong. Nagkuretret ti muging ni Kapitan Enteng. Nagmuregreg. Kasla nalipatan nan sa nga agpayso dagiti tanod manipud idi nagikkat dagiti dadduma a kimmadua ken ni Angkuan.
“Ala, wen, uray dagiti barangay health workers, pagsuelduenyo met amin idan!” intung-edna. Idi agpakada dagiti coordinators, pinapetpetan ida ti Kapitan iti sagtunggal dua ribuda.
“Pauna la dayta. Basta siguruenyo a masolidtayo amin a napan iti bangir. Addanto pay nayonna dayta. Sabalinto ti bunosyo inton malpas ti eleksion!” kinunana. Napalalo a yaman dagiti coordinators idi agpakadada. Insublat nga inikkan ti Kapitan dagiti para kagawad.
“Masapul nga adda madadaan a pagpainumyo no adda mangibaga. Ngem agannadkayo ta didakayto masiripan ti bangir. Ammoyo metten, adu ti para siputda!” kinunana.
Naudi a nagpakada ni Mary. Nakarabrabuy ti isemna idi pabulsaan ti Kapitan iti sangapulo a nakatapaya. Kimmayetket daytoy ket nakaal-alisto a nangbisong iti Kapitan idi makalikuden dagiti kakaduada.
Kasla dinalanan ti sangadosena a kabalio ni Kapitan Enteng iti panagdalagudog ti barukongna idi maidennes ti nabayog a barukong ti balasang iti takiagna. Kasla ginurigor. Arakupenna koma. Ngem natellay ti riknana idi malagipna nga amangan no kellaat a sumrek iti ayanda ti baketna.
NO MANO nga aldawen a manmano a sumurot ni Teniente Charlito iti kampania da Angkuan. Masansan nga ipakadana nga adda as-asikasuenna.
“Adda napateg a pakaseknan, kakadua. Basta iramramandak iti lakadyo,” kinuna ti retirado a teniente iti dayta nga aldaw a panagpasiarda koma manen.
“Saanka a madanagan, Pari Charlie, napigsaka kadagiti agtutubo ken nataengan. Namnamaenda nga agbalin a natalna ti Kakamanguegan no mangabakka,” insungbat ni Maestro Amante.
“Pagsayaatan la ketdi ti as-asikasuem, kompadre. Iramramannakami!” imbagi ni Maestro Pitong.
Nagpaggaak ni Teniente Charlito.
Nagtungtung-ed ni Angkuan. Namingminganna ni Teniente Charlito. Ammona, masansan nga agsarsaritada ken ni General Realidad. Iti naminsan a panagpailina, nakitana ida iti maysa a naulimek a panganan iti poblasion. Adda kadua dagitoy a langana met laeng ti militar. Inyam-amoda pay kenkuana ti maysa kadagitoy. Ni Major Nap Agustino. Saan nga agmintis ni Angkuan. Aktibo pay daytoy iti serbisio.
“Awan ti rumbeng a pagdanagantayo iti Kakamanguegan,” impanamnama ni Major Nap Agustino idi agalamanoda iti nairut.
“Dakami lattan kada General Realidad ken Teniente Charlito ti makaammo nga agsasarita, Mr. Dela Cruz,” kinunana pay.
Iti daydi met laeng a pannakakitana kadakuada a naammuan ni Angkuan a tao ti major dagiti lallaki a nakitana idi nagdebateda ken ni Kapitan Enteng.
Iti dayta a rabii, idi makaawiden dagiti kakaduana kalpasan ti panangrabiida, kas nakairuamanna, pagin-inanaan ni Angkuan ti agubuya iti TV. Updated kadagiti paspasamak ken damdamag lokal, nasional, ken internsional.
Idi maibilinna ken ni Oppong nga aginanadan kadagiti kakaduana a tumultulong iti kampania, insimpanan ti nagliad iti butuabutua. Pinis-itna ti remote ti TV.
Saan a nakauni idi maipasabet kenkuana dagiti paulo dagiti damdamag. Lima a kandidato a Kapitan iti kabangibang a probinsia ti napaltogan! Segun iti damag, adda pannakainaig ti politika kadagiti nasao a pammaltog. Indeklaran ti Comelec nga election hot spots dagiti barangay a nakapasamakan iti pammaltog.
Kinarayaman ti danag ni Angkuan. No mabalin, saanna a kayat a mapasamak dayta iti Barangay Kakamangueggan.
(Maituloyto)
