Nobela ni RUDY CONTILLO (Nailathala ito sa May 18 – 24, 2024 print edition)
(Maika-37 a Paset)
KALKALPAS ni Kapitan Enteng a nakisarita kadagiti coordinator-da. Sumanamtek. Inreport dagiti coordinator a bangking ti sumada dagiti pabor kenkuana. Adun ti immallatiw a kakaduada ken ni Angkuan. Maymaysa ti rasonda. Kayatda kano met ti mangabaruanan. Napangilangil. Ania ti kayat dagiti kalugaranna nga aramidenna? Gastuenna amin a kuartana a pangay-ayo kadakuada? Kas itay kunadan, mapartinanto met la aminen a patarakenna a baka. Ngem didanto pay la ammo no ania ti raman ti baka! Wen, napaneknekannan dayta iti napalabas nga eleksion. Kuarta. Kuartan ti napateg. Nalakan a masisiriap iti sileng ti pirak ti kaaduan. Ngem saanna la ketdi a maawat nga abaken ti agdadamo a kas ken ni Angkuan. Adu ti mapukawna a pabor no kaspangarigan mapaspasarakan ni Angkuan.
Malaksid iti sueldona a nakurang a trenta mil iti binulan, adu pay ti pabor a maaw-awatna. Saan nga ammo dayta dagiti kakadua ken kalugaranna. No kasta nga eleksion iti ngato, dandani amin a kandidato, adda ipapetpetda kenkuana.
Nagtungtung-ed iti pannakalagipna iti sueldoda iti Barangay Kakamanguegan. Iti intero a probinsia, ti barangayda ti kadakkelan iti mait-ited nga honorarium. Gapu daytoy iti dakkel a pagbaybayad a buis ken permit iti tinawen ti electric power plant. Adu ti umap-apal kadakuada. Dakdakkel pay ti sueldona ngem iti sueldo ti gagangay a mangisursuro. Nangemkem.
Dayta la ketdi kinadakkel ti sueldo ti nagngayangayan dayta nga Angkuan. Ngem uray ania ti mapaspasamak. Dina itulok a maabak. Inton agpaso ti panagtakemna, ipasublatnanto met ti poder ken ni baketna. “Mangabaktayo, Kap! Nalaka laeng. Basta bukkualetayo dagiti kakadua ni Angkuan!” kinuna ni Kagawad Banong.
Nagtungtung-ed laeng ni Kapitan Enteng. Wen, maysa laeng dayta a pampanunotenna. Ngem kasanon no alaenda ti kuarta sadanto met la ibutos ni Angkuan? Napangilangil. “Dagiti taotayo, kayatko ida a makasarita, Kagawad. Ammomon no asino dagiti mapagtalkan. Adda ipaaramidko kadakuada,” inyarasaas ti Kapitan ken ni Kagawad Banong.
KADAGITA a kanito, naragsak da Angkuan ken dagiti kakaduana nga agsasarita. Nalawag iti surbey dagiti SK, umad-adu ti bummallasiw iti grupoda. Dagiti agtutubo ti kangrunaan a mangikamkampania kenkuana. Dagiti kandidato a para Sangguniang Kabataan, iragragpinda latta nga ikamkampania. Saanna a kinasarsarita ida. Isuda ti nagdisnudo. Maymaysa laeng ti kayat a sawen dayta. Mamatida iti prinsipio ken ilablaban ti grupona.
“Nasaysayaat met laeng no makaruartayo amin, kakadua,” kinuna ni Angkuan. “Sigurado dayta! Ti laeng pakaabakantayo, no agkuartada!” kinuna ni Manang Ellen a nangimuestra iti nagtapaya iti nagtugawanna. “Nasirib itan dagiti botante, saandan a masisirap pay iti sileng ti pirak!” insalingbat ni Maestro Pitong a kudit a kudit iti selponna.
“Ti amkek, no magna ketdi ti pamutbuteng,” imbagi met ni Engr. Redong a nangkudkod iti naisapawen nga ubanna. “Saanto a mapasamak dayta, kakadua!” ingngilangil ni Teniente Charlito. “ Saan la nga isuda ti makaitured! Naglategkami amin!” Napataliaw ti grupo iti retirado a teniente. Adda italtalukatik dagiti matana.
“Ay, wen, Pari Charlie, adu dan sa dagiti pumaspasiar kadakayo ita ken ni General Realidad, a! Kaduayo siguro idi iti serbisio dagidiay?” dinamag ni Maestro Amante. Apagapaman a nagtung-ed ni Teniente Charlito. “Sadino gayam ti sumaruno a pagkampaniaantayo ita?” alisto a nangbaliw iti saritaanda. Naawatan ni Angkuan ti teniente. Adda iparparipiripna idi tung-edan daytoy.
“Intayo pasiaren diay Dasildasil. Adudan ti balbalay idiay. Ammuentayo no ania dagiti kasapulanda tapno mairaman iti plano no bilang adda gasgasat,” kinuna ni Angkuan.
NABARA latta ti ulo ni Kapitan Enteng. Saan a mauma dagiti Marites ken Marisol iti barangay a mangdulduldol a dehado iti eleksion. Nagbalin payen a pagsasao dagiti ubbing ti bayyuot. Banag a pagburekan ti darana.
Ngem ti pakasemsemanna, isu ti nangpaayaban kenkuana ni Gobernadora Alconis. Ammona, naidanonen iti gobernadora ti panagdebateda ken ni Angkuan. No apay ketdi a tarabitab la unay dagiti puniemes a komentarista. Naynayonanda ti ibagbagada, intabbaawna.
“Napigsan sa met ti kalabanmo, Kapitan?” kinuna ti pamestisaen a gobernadora. Kasla awan pay ti limapulona. Napintas. Pino ti panaggargarawna. Madlaw ti kinaaristokratana. Napigsa ti dara a Kastila ti gobernadora.
“Abakentayo daydiay nga Angkuan, gobernadora. Agdadamo. Awan ti ammona iti politika!” insungbat ni Kapitan Enteng.
“Apay a kuna dagiti komentario iti radio a naatiwka kano iti debateyo?” inyisem ti gobernadora a pangsutilna iti Kapitan.
Pinilit ni Kapitan Enteng a tinengngel ti rumkuas a rurodna. Nalagipna manen ni Mayor Marcelino. No ania la ketdi ti tinaltalanggutangna idi agpa-presscon daytoy. Dimmanon amin iti gobernadora. “Nanaynayonan dagiti damag, gobernadora…” “Kapitan, diak kayat a maabakka iti Kakamanguegan. Ammo ti tao a sika ti manokko. Maawatam ti kayatko a sawen. Ania ngamin dagiti proyekto a masapulyo idiay Kakamanguegan?” immulagat ti gobernadora.
“K-kua, Apo Gobernadora… Dagiti koma barangay roads-mi…” mababain ti Kapitan. Dandani di sumngaw ti timekna. “Kapitan, eleksionen! Apay nga itam la nga ibaga? Maiparit ti agpatrabaho, ammom dayta. Maysa, dakkel a proyekto dayta. Masapul a maibadyetan. Apay a dimo insapsapa?” natangken ti timek ti gobernadora.
Saan a nakatimek, kasla nakukkokan a bisukol ni Kapitan Enteng a nangibaag iti ipusna. Nagal-aludoy a nagpakada. Nakaruaren iti opisina ti gobernadora idi kamakamen ti maysa kadagiti badigard daytoy.
“Kap! Kap Enteng, agsublika kano iti opisina ni Gob!” kinuna ti agkabannuag a bayabay ni Gobernadora Alconis.
Napasardeng, nagmalanga ni Kapitan Enteng. Kasla dina mayaddang dagiti sakana iti panagbueltana.
(Maituloyto)
