(Nailathala ito sa Sept. 21 – 27, 2024 print edition)
(Maika-55 a Paset)
NAUNEG ti pampanunoten ni Carlota a nasangpetan ni Angkuan. Saan a nadlaw daytoy ti yuunegna iti kadaklan. Iti kosina, makumikom dagiti nasapa a kakabagianda nga aginaldaw nga umay tumultulong kadakuada nga agbuelta. Inaldaw nga agsangailida. Isuda ti mangasikaso kadagiti agbulbubulontario a tumultulong iti kampania.
Nagsig-am ni Angkuan idi madlawna a saan pay la a nagkir-in ni Carlota iti nagtugawanna. Nakaturong iti adayo dagiti matana. “Sweetheart,” kinunana ket nagtarus iti likudanna. Rinakusna a binisong ti asawana.
“A-addaka gayamen!” apagapaman ti pannakaklaat ni Carlota a napatakder iti nagtugawanna. “Nauneg sa ti pampanunotem. Dinak nadlaw ket itayak pay iti likudam, sweetheart,” kinuna ni Angkuan. Napaanges ni Carlota iti nauneg.
“Johnny, narikut daytoy nastrekmo. Kitaem, naituredda payen a mapan butbutngen dagiti kalugarantayo?” nauyos ti nauneg a sennaay ti asawana a nangsango kenkuana. “Maamakak. Nangngegko iti damdamag itay iti radio nga adda dua a kandidato a kapitan ti tinambangda iti kabangibang a probinsia. Amangan no ania ti mapasamak kenka!”
Namrayan ni Angkuan nga iniggaman dagiti dakulap ni Carlota. Piniselpiselna dagitoy. “Awan ti pagdanagam. Nainget dagiti autoridad. Addan baro a hepe iti San Sebastian, sweetheart,” kinuna ni Angkuan. “Ken saan a mabalin a yatrasko ti kandidaturak. Saan nga ipalubos ti Comelec ti substitution iti barangay elections. No diak agtuloy, awanen ti kalaban ni Kapitan Enteng…”
“No mabalin, ita ta nasapa pay, agatraska koman!” inyunnoy ni Carlota. Manartaraigid dagiti luana nga immarakup ken ni Angkuan. “Agur-uray dagiti annakmo idiay America…”
Saan a naterred ni Angkuan ti riknana. Dayta ti pagkapsutanna. Saanna a maibturan a makita nga aglulua ti kaingungotna. Kasla isu ti makidkiddis ti pusona.
Nayugyog dagiti abaga ni Carlota iti panangisubsobna iti rupana iti barukong ni Angkuan. Nariknana ti bara ti agarubos a lua ti asawana iti barukongna. Kasla maiw-iwa ti puso ni Angkuan. Maem-em-eman ti saibbek ti kaingungotna.
Inap-aprosan ni Angkuan ti bukot ni Carlota. Binay-anna nga ibulos daytoy ti em-em-emanna a rikna. “Awan ti dakes a mapasamak kaniak, sweetheart. Agkararagtayo laeng ken ni Apo Dios,” kinunana iti nakapsut a timek. “Saannatayo a baybay-an…”
SAAN a maipinta ti rupa ni Kapitan Enteng. Manipud idi agtugaw ni Major Rex a hepe ti polisia iti San Sebastian, kasla nareppeten a namimpinsan ti ima dagiti pasurotna. Saandan a makapagdakiwas pay iti rabii. Nainget ti hepe a mangidaulo kadagiti taona. Nagpanayon pay iti puersa ti polisia gapu iti kiddaw ni Atty. Baldos a maisalinong iti Comelec control ti Barangay Kakamanguegan.
Nagsanamtek. Pagna a pagna iti terasa. Tantan-awanna ti kalsada iti labes ti nangato a kongkreto nga alad ti laongda. Husto ti kuna dagiti pasurotna. Pasaray adda dagiti lugan nga agistambay iti saan nga adayo iti balayda. Saan nga agbayag dagiti dadduma. Pumanawda no baonenna nga aginlalabas dagiti kakaduana.
Nalukot dagiti gemgemna a nakalagip iti report kenkuana ni Ka Zoilo. Napaneknekannan nga adu ti mangsipsiput kenkuana. Nalagipna ti sorbetero. Napamulagat. Nabayag nga agpayson a dina nakita ti sorbetero. Adda nagkarayam a lamiis iti durina. Tiktik ti sorbetero.
Imbilin ni Kapitan Enteng nga isardengda pay laeng ti panagiwarasda. Nadlaw ti polis a bayabayna nga adda agam-ampayag a drone iti ngato ti laongda. Pinapaltoganna daytoy iti naudi a pannakakitada. Ngem saan a napuntaan.
Nagkuretret ti mugingna. Nagdardaras nga immulog. Kasaritana ni Mary. Narigaten no saanda nga agsakbay. “Awagam ni Ka Zoilo!” imbilinna.
Siniggawat ti kapitan ti agkirkiriring pay laeng a selpon. Aggitebgiteb ti pispisna. Panagriknana, dumakdakkel ti problemana. Saanen a makapaggaraw dagiti taona.
Awan ti pagbanaganna no pagnapagna laeng a makial-alamano ti aramidenda kadagiti kakaduana. Masapul nga adda ipapetpetda.
“Umakarkayo dita hide out-yo. Nabara ti mata dagiti tao. Ammok a saan la a siak ti tiktiktikanda. Amangan no addada metten iti wangawangan ti agongyo!” agpigpigerger ti boses ni Kapitan Enteng.Imbagana nga urayenda ti maibaon a paglugananda.
“Umakaranmi, kap?” dinamag ni Ka Zoilo. “Idiay Casa de Corrales! Mangalakayo iti tallo a kuarto! Makaammon ti sekretariak a makisarita!” kinuna ti kapitan.
“Urayendak idiay. Adda napateg a pagsaritaanta!” Bimmaba a dagus kalpasanna idi matannawaganna a sumrek iti inaladan ti lugan ni Kagawad Esco. Kasaritana. Imbilinna ken ni Mary nga awagan amin dagitoy dagiti kakaduana.
Iti agdan, nasabetna ni Lily, ti asawana. Ngem kasla awan aniamanna, tinung-edan laeng daytoy ti baketna.
Agdardaras daytoy nga umulog. Igpilna ti paboritona a bagna a Hermes. Inregalo dayta kenkuana ni Gobernadora Alconis. Ammona, mapan la ketdi manen makimadiong daytoy kadagiti amigana.
Saanna unay a parikut ni Lily. Manipud idi nasumokna ti makimadiong, kaduana dagiti amigana, masansanen nga awan iti balayda. Naisem daytoy no kasta a papetpetanna iti pakiay-ayamna.
Iti nalawa a terasa, inurnongna amin dagiti kakaduana. Adda amin dagiti para kagawad. Adda pay dagiti lider ken coordinator-da.
“Ammoyo siguron a medio narikut ti situasion. Saan a kas idi a makapagdakiwaskayo pay iti rabii. Ita, adudan nga agsipsiput iti garawtayo,” indagsenna.
Nagtitinnaliaw dagiti kakaduana. “Ania ngarud ti aramidentayo? Ituloytayo ti agiwaras, kap?” dinamag ni Kagawad Banong.
“Isardengyo pay laeng. Itodotayton inton kasakbayan a mismo ti eleksion.
Diak kayat a masiripandatayo!” insungbat ni Kapitan Enteng. Adda agay-ay-ayam iti isipna. Tingitingenna no mabalinna a tapalan iti pirak ti baro a hepe!
Saanen a nagbayag dagiti kakaduana. Nagtutulagda nga agpasiarda pay laeng kadagiti bukodda a purok a pangtingitinganda iti rikna dagiti botante.
“Sumurotkayo kaniak, kagawad!” inkissiim ni Kapitan Enteng kada Kagawad Banong ken Kagawad Esco.
Alisto ni Kagawad Esco a nangtaray a napan nangpaandar iti Fortuner idi isenias ti kapitan ti panagluganda. Tinung-edanna lattan ni Mary a nangisurot iti panagkitana iti ipapanawda.
Kadagita a kanito, kalkalpas da Angkuan a nangpasiar kadagiti kakaduana. Inulitda a kinasarita dagiti agtutubo a binutbuteng dagiti armado a lallaki.
Kinasaritada pay dagiti dadduma pay a napabutngan a kakaduada. Nagyaman ni Angkuan ta naisurot kadakuada ni pasado Konsehal Jovito a nakisarsarita kadagiti kabarangayanda.
Naragsakda a nagnagna a nagawid. Saan a mauma dagiti tao a malabsanna a manglugay ken ni Angkuan. Uray dagiti ubbing, makipagpupukkaw iti naganna.
“Nabara ti panangawat kenka dagiti tao,” inyisem ni nagkonsehal Jovito. “Dakkel ti namnama!”
Kas iti dati imbilin ni Angkuan nga agtarusda amin iti balayda. Adda impaisaganana a meriendada. Sabai laeng ti para kadagiti lallaki. Adda bassit a pagsasanguanda.
Nagtarusan ni Angkuan a binisong ni Carlota idi makastrek iti balayda a mangbukbukitkit iti balikbayan box. Agsukat laeng. Sublianna met laeng dagiti agiinnestoria iti terasa a kakaduana.
Idi agsubli iti ruar, kaduan ni Angkuan ni Carlota. Adda bitbit ti asawana a dua karton a tsokolate. Kasta unay a ragsak dagiti agtutubo idi ibagana a pagbibingayanda.
“Daytoy met ti para kadagiti adda nakemna!” inkatawa ni Angkuan a nangitag-ay iti Black Label a di pay naluktan.
Ad-addan ti sipat da Maestro Amante ken Maestro Pitong. “Yuluamon ngaruden, Kapitan Angkuan!” kinuna ni pasado konsehal Jovito a nangipangato pay iti dolpona.
“Advance celebrations, no kasta!” ipasaruno ni Patricio. Nagyaman ni Angkuan. Intag-ayna ti botelia idi maluktanna.
“Para kadakayo!” kinuna a nangiwayat iti botelia kadagiti lallaki.
Napasardeng ti nasarangsang a saritaanda idi sumardeng ti military jeep iti sango ti nakalukat a ruangan. Napatakder ni Angkuan idi mailasinna ni Teniente Ferdie Corteza.
Sinabet ni Angkuan ti opisial.
“Adda saan a nasayaat a damag, Mr. Dela Cruz!” impasabet ni Teniente Ferdie Corteza.
(Maituloyto)
