Nobela ni RUDY CONTILLO (Nailathala ito sa May 11 – 17, 2024 print edition)
(Maika-36 a Paset)
NAGPAAYAB ni Mayor Marcelino iti press conference iti opisinana kalpasan ti naiwayat a debate iti baet da Angkuan ken Kapitan Enteng. Malaksid kada Danny Antal ti DWTP, Joks Caban ti DWBB, nairaman pay iti presscon dagiti diarista ken mannurat iti Ariwanas Magazine ken Ilocos Herald. Kayat ni Mayor Marcelino a malawlawagan dagiti isyu nga imbato ni Kapitan Enteng iti debate. “Apo Mayor, adda kano idumdumayo a barangay iti San Sebastian? Agpayso dayta nga alegasion ni Kapitan Enteng?” sinaludsod ni Joks Caban ti DWBB. “Dagiti umili ti makapaneknek nga awan ti kinapudno dayta, Apo Joks.
Kinapudnona, indagadagko idi pay la idi ken ni Kapitan Enteng a mangaramidda iti resolusion para iti pannakasemento dagiti kalsada iti barangay. Iti kasta, mayaramidan ni Municipal Engineer iti program of work. Imbagak pay nga aprobarak a dagus. Ngem ni mismo Kapitan Enteng ti nangibaga a mapanto la kanon dumawat ken ni Gobernadora Alconis iti pundo. Kayatko la a malawlawagan ti amin.
Kakaasitayo met a mapabpabasol iti imatang dagiti umili,” inlawlawag ni Mayor Marcelino. “Patas ti panangituraytayo, apo. Awan ti maidumduma.” “Baka met dakdakkel ti madawatda a pundo iti probinsia, mayor?” impasarunson ni Joks Caban. “Mabalin siguro a kasta… Ngem adu ngamin a proseso sakbay a mayimplementar ti proyekto. Nasken a maammuan no mano ti masapul a pundo. Dita a masapul ti program of work tapno maibadyetan.
Imbaonko payen ni Municipal Engineer Dan Ramos. Ngem di met makikooperar dagiti opisial ti barangay. Nabayag koman a nalpas dagita a proyekto…” inlawlawag ni Mayor Marcelino. “Dayta met isyu ti kinaawan ti koriente kadagiti nadumaduma a naseksek a purok, mayor,” simmublat ni Danny Antal a nagsaludsod. “Kuna ni Kapitan Enteng a basol kano ti electric cooperative. Ania ti makunayo iti daytoy, sir?” Nagkatawa iti nalag-an ni Mayor Marcelino. Sinangona ti kamera a nakapaturong kenkuana. “Diak maawatan ni Kapitan Enteng.
Pabasolenna met aminen, pati kooperatiba, Apo Danny. Baliktad ti ibagbagana. Ti munisipio, apo, ti mangbayad payen koma para kadagiti maaramat a service drop a mapan kadagiti balbalay. Imbagak pay a mabalin ti agpatulong iti planta ti koriente kas paset ti corporate responsibility ti kompania, total dakkel met ti mapaspastrekda.
Ngem natangken ni Kapitan Enteng, apo,” ingngilangil ti mayor. “Ania ti kayatyo a sawen, mayor?” sinaludsod ni Danny Antal. “Ti problema ken ni Kapitan Enteng, tunggal agsarita, pagsarapana ni Gobernadora Alconis. No adda idiaya ti munisipio a proyekto, sangkakunana nga idawatannanto laengen iti pundo, no saan nga iti Gobernadora, ken ni Apo Diputado.
Ngem no agdamagkami iti Provincial Engineering Office, awan kano met ti request da, Kapitan. Kakaasi dagiti bumarangay nga agsagaba,” panangilawlawag pay ti mayor. “Kasdiay gayam, Mayor. Napintas ta impalawagyo, Apo Mayor. Yaramidanmi iti napintas nga estoria iti Ilocos Herald!” kinuna ni Bobby Alicias, editor ti diario. “Wen, Mayor, tapno malawlawagan dagiti umili,” imbagi met ni Dan Bautista, editor ti Ariwanas Magazine. “Ikoberdakanto man gayam, mayor iti Ariwanas, ti aglatlatak a magasintayo nga Ilokano!” inyawatan ti editor ti mayor kadagiti kopia ti magasin. “Wow! Areglado!” kinuna ti mayor a nagtungtung-ed. a nangpalabas kadagiti panid ti magasin.
“Wen gayam, off the record, daytoy,” kinitana dagiti mediamen. Idi maiddep dagiti mediamen dagiti kamera ken selponda, sinangda ni Mayor Marcelino. “Ammoyon a sabali ti ugali ti Kapitan Enteng. Kayatna nga agparintumeng kenkuana dagiti lumugar. Kayatna a dakami nga agtuturay ti agpakaasi kenkuana.
Ngem iresponsable ti kasta a klase ti lider,” ingngilangil ni Mayor Marcelino. Napangilangil met dagiti mediaman. NAGDINAMAG iti probinsia ti napasamak a debate da Angkuan ken Kapitan Enteng.
Dandani inaldaw a dulduldolen dagiti komentarista iti radio ken telebision ti napasamak.Pikon, managpudpudot, sangkakuna dagiti dadduma iti Kapitan. Uray dagiti pagiwarnak, ibagbagada nga awan ti kinapudno dagiti sinarsarita ti Kapitan iti debate.
No kasano ti panangbabalawda iti Kapitan, kasta met ti panangipadayawda ken ni Angkuan. Manakman.
Managparbeng, sangkakunada. Adda kano kenkuana dagiti galad ti nasayaat a mangidaulo. Manipud idi kanayonen a napudot ti ulo ni Kapitan Enteng. Panagriknana, isun ti nagbalin a kontrabida. Ayatna la a maalana ti rikna dagiti kalugaranna, pinaminduana payen ti nagpunsion.
Pinaayabanna amin a bumarangay. Aduda met nga umay. Ngem no nakaawiden dagitoy, aglalaok manen ti ibagbagada kontra kenkuana.
Saan kanon a maala iti pumpunsion ti eleksion. Nga uray partien kano amin ti Kapitan a patarakenna a baboy ken baka, saanen a kas idi ti kinabanglona. Ngem no adda man ad-adda a pagsiudotan ni Kapitan Enteng, isu ti blind item kontra kenkuana. Kanayon a paspasagidan dagiti komentarista. “Pugtuanyo man no asino ‘tay politiko a managbayyuot?” kunkuna dagiti sutil a komentarista iti radio ken telebision. Saanda met ketdi nga inagnaganan. Ngem kasla masilsilian ni Kapitan Enteng. Ammona nga isu ti mapaspasagidan. Maamirisna itan a rumbeng a dina koma inaw-awat ti singasing ti Comelec a panagdebateda ken ni Angkuan. Naibabain ti kinarakaranna. Naisip ti Kapitan, nasken a kasaritanan dagiti kakaduada. Masapul a monitoren dagiti coordinatorda kadagiti purok no asino dagiti sigurado a mangbutos kenkuana. Ken no asino dagiti mangbutos ken ni Angkuan.
Masapul a bukkualenna dagiti mangsupsuporta iti kalabanna. Uray gumastos iti dakkel. Ammona, saan a baybay-an ni Gobernadora Alconis. Iti dayta a sardam, sumanamtek ni Kapitan Enteng. Awan gaganasanna a mangan.
Agiinumda koma pay itay kadagiti para kakaduana Ngem kasla awan gaganasanna. Aglalaok ti agsublisubli iti lagipna. Maysa a mangburburibor kenkuana ti pannakaibutaktak nga adda pannakaibiangna iti panagtrosoan iti San Sebastian.
Saanna a malipatan dagiti lallaki a nangpabain kenkuana. Binaonnan dagiti taona a nagkalap iti impormasion iti kinasiasino dagitoy. Ngem awan ti makaammo iti naganda.
Nayarasaas laeng kenkuana a tao da General Realidad ken Teniente Charlito dagiti lallaki. “Laglagipem, Kap, nauneg ti koneksion ti heneral ken daydiay a teniente.
Saantay la nga ammo ngem amangan no adda la dita nga umar-arubayan dagiti intel-da a mangsipsiput iti garawtayo,” kinuna pay itay ni Kagawad Banong. Nagtungtung-ed ni Kapitan Enteng. Idi adda naggilap iti panunotna. Nagrimat dagiti matana.
Kasaritananto dagiti pasurotna. No nasken, masapul a mawaknitan ti Kakamanguegan kadagiti tubeng iti panagpailayonna. Saan pay a nayanak ti mangibalat kenkuana iti politika. Saanna a napupuotan, ngem uray la timmayab ti pusuelo iti lamisaan iti pigsa ti danogna iti panagburek manen ti darana.
(Maituloyto)
