Nobela ni RUDY CONTILLO (Nailathala ito sa April 27 – May 3, 2024 print edition)
(Maika-34 a Paset)
AGTALNATAYO! Agtalnatayo, apo!” nagallangogan ti timek ni Atty. Baldos idi kumaro ti ariwawa. “Appo a polis, mabalinyo a tiliwen dagiti mangirugi iti riribuk!” immandarna pay. Nagsasaruno ti silbato dagiti polis. Immando ni Major Salvador dagiti taona. Kaduada dagiti augmentation force manipud iti Mobile Force Company nga itay pay nga inawaganna. Agkaralitak ti kamera dagiti kameng ti media. Agsipsiputda iti rumsua a dakkel a damag. Uray dagiti agbuybuya, nairekordda iti selponda dagiti napasamak. Iti ayan ni Mayor Marcelino, napasnek ti pagsarsaritada ken ni Judge Jesus Buena.
Agngilngilangil ti mayor. Ammona ti galad ni Kapitan Enteng. Ngem dina ipagarup a maaramidna ti agulbod iti publiko. Ngem saan nga isu ti naibabain. Ni Kapitan Enteng a mismmo ti nangibabain met laeng iti bagina. Madamdama pay, addaytan da Danilo Antal ti DWTP ken Joks Caban ti DWBB nga agturong iti ayanna. “Apo Mayor, mabalin nga alaen ti reaksionyo, sir, iti imbaga ni Kapitan Enteng?” dinamag ni Danilo Antal a nangiyasideg iti mikropono ken ni Mayor Marcelino. “Very unfortunate,” nagngilangil a nagsanamtek ti mayor. “Ngem saan sa nga ammo ni Apo Kapitan Enteng ti sawsawenna!” “Adda kano idumdumayo, apo mayor!” imbagi ni Joks Caban. “Awisenkayto iti presscon iti opisinak!” inyisem nga intapik ti mayor iti reporter nga aw-awaganda iti ”bunso” gapu iti kinatayagna. Iti nagtakderanna, kunam no kalalakian ni Kapitan Enteng.
Kasla teggaak nga agwanwanawan iti mapaspasamak iti aglawlaw. Nadigosen iti ling-et. Naiturong ti imatangna ken ni Mayor Marcelino. Nabaleska met laeng a mayor! Inngirsina a kumitkita latta iti mayor a kasarsarita pay laeng dagiti kameng ti media. Iti met nagtugawan ni Angkuan, nagtalinaed laeng a kalmado daytoy. Kayatna ti bumaba koma a mapan iti ayan dagiti kakaduana.
Ngem agsarsarita pay laeng iti mikropono ni Atty. Baldos. Nakayaman. Manakem dagiti agtutubo a kangrunaan itay a mangisaksakit kenkuana. Nataliawna da Atty. Juanario ken General Realidad a napasnek nga agsarsarita ken pasaray tumaliaw kenkuana. Idi kuan, nakitana ti panangtung-ed kenkuana ni Engr. Redong. Adda naggilap iti panunotna. Nagkalma met laeng dagiti tao. Adda ketdi sumagmamano a lallaki nga inulod dagiti polis ta imbes nga agtalnada, inyad-addada ti nagngiwat.
Pinosasan dagitoy dagiti polis nga impan iti mobile. “Ituloytayo ngarud ti debate, kakabsat. Kiddawek nga agkalmatayo koma. Saritaan daytoy dagiti manakem, kunak man laengen. Dagiti supporters ti agsumbangir a grupo, pangngaasiyo ta liklikantayo koma ti agdadangil, apo. Bay-antayo dagiti kandidato a mangipresentar kadagiti planoda para iti barangay…” impigsa ti abogado a nagulimekan ti tallaong. “Para ngarud iti maikadua a paset ti debate, ni met Apo Juan “Angkuan” Dela Cruz ti sumublat nga agsarita!” Apagbatingting ti kampanilia, timmakder sa nagkurno ni Angkuan idi agsubli iti rostrum. “Dios ti agngina, Apo Abogado Baldos,” kinunana a nangisem iti Comelec officer a nagsublin iti tugawna.
Kalpasanna, immanges iti nauneg a nangkita kada Mayor Marcelino ken Judge Jesus Buena. “Daksanggasat ta simiasi kadagiti pudno nga isyu dagiti dinakdakamat ti madaydayaw a kabalubalko. Ngem ammo ti amin, awan kinapudno dagiti pammabasolna. Nakababain ta inramanna pay ni apo mayor. Ammotayo no kasano kinagaget ken kinatakneng ti mayortayo. Panagkunak, ang-angaw, nagpakatawa laeng siguro ni Kapitan Enteng kadagiti imbagbagana…” Gimluong ti paggaak dagiti agbuybuya iti kinuna ni Angkuan. Kasla manen nasilian ti piditpidit ni Kapitan Enteng.
Kasano, uray dagiti tinagdananna a cheerleader-na, nakipagkatkatawada. Adda pay nagpalakpak! Sinalbagdan, ingngarietna. “Patpatgek a kabarangayak, dagitoy ti pudno nga isyu a rumbeng a maikkan pay iti solusion.
Adu ti agsaksakit nga ubbing ta agkaraiwara dagiti basura a pakaalaanda iti sakit. Awan ngamin masnop a programa ti barangay iti waste management. Nagbalin a basuraan ti karayan. Isu nga idi aglayus, naibangkag dagiti basura a naisubli iti arubayantayo! Maikadua, maisuro koma dagiti kalugarantayo a mangiipateg iti nakaparsuaan. Isardengdan koman ti aguma, ti agpukan iti kayo.
Adda ngamin dagiti makitkitatayo nga agibabbaba iti troso iti bantay a maitarus iti lamberia iti ili!” “Tira, Angkuan! Dayta man!” adda nangilaaw a sinaruno ti natibong a palakpak. “Malaksid itoy, adayo ti progreso ti lokalidad no saan a mapasardeng dagiti illegal a sugal,” intuloy ni Angkuan ti panagsaritana.
Agpayso nga adda bilin a maiparit ti agpasugal uray iti minatayan. Ngem mailimlimed met ti panagpadadoda! Apay? Isu pay ti puon ti pagriririan no dadduma. Adun ti nadamagtayo nga agbugbugi pay laeng dagiti raepda, isalsaldadan tapno adda laeng maisugalda! Asino ti mairanranud?” Immawer ti palakpak dagiti agbuybuya. “Adda pumuspuskol ti petakana!” adda manen nangilaaw.
“Dayta, a, ti agkapitan! Manakem!” kinuna met dagiti agtutubo. “A gentleman in the highest order!” imbagi ni General Realidad a nag-thumbs up ken ni Angkuan. Nataliaw ni Angkuan ti heneral. Linugayanna daytoy kas panagyamanna.
Saannan a naituloy ti panagsaona ta nagbatingtingen ni Atty. Baldos. Nagrupanget ni Kapitan Enteng. Mabilbilang dagiti nangkontra ken ni Angkuan. Arig saan a mangngeg ti pukkawda iti pigsa ti riaw dagiti nangdayaw ken ni Angkuan. “Thank you! Thank you Apo Juan “Angkuan” dela Cruz! Palakpakantayo man, kakabsat!” kinuna ni Atty. Baldos. “Ita, intayo met denggen ti sungbat ni Apo Kapitan Vicente “Enteng” Camanaoan!”
Nagpalagapag dagiti agbuybuya idi itag-ay ti Kapitan dagiti imana. “Viva Enteng, ti kapitanko!” adda nangipukkaw. “Ni Angkuan ti mangsukat ken ni Kap Entengmo!” adda met nangisungbat. Pinagkalma ni Atty. Baldos dagiti supporter dagiti agsumbangir a grupo.
Nagsilbato dagiti polis a nangitudo kadagiti agririaw iti agsumbangir a grupo. Sintagari, tinurong ni Kapitan Enteng ti podium. Nairut ti petpetna iti mikropono iti siudotna. No mabalin la koma, ibarsaknan ti mikropono ken ni Angkuan a mayat ti sikkawilna iti nagtugawanna.
Kinusilapanna daytoy. Itay pay nga agtabtabbaaw ti unegna. Ania ita ti isungbatna kadagiti nakaad-adu nga isyu nga impalapalna kenkuana? Nakudkodna idi agangay ti saan met nga aggagatel nga ulona. Nagpapalakpak la ket ngarud dagiti agbuybuya a kakaduana. Impagarupda a senias dayta ti Kapitan kadakuada.
Iti rurodna, timmayaben a namimpinsan ti konsentrasionna. “Kabarangayak,” kinunana a nagkarkarawa iti ibagana. “Apay ngamin nga agibasurakayo iti karayan idinto a mabalinyo met a puoran koma dagiti basura?” kinunana. “Maiparit ti agpuor iti basura, Apo Kapitan!” impukkaw la ket ngarud ni Engr. Redong.
Nagkakatawa dagiti agtutubo. “Aminemon a bagonmo dagiti pakaikarkargaan dagiti troso a maibabbaba iti bakir ken maitartarus iti lamberia?” adda nangiriaw. Immirteng ti rupa ni Kapitan Enteng a nangtaliaw iti grupo dagiti nagriaw. Lallaki dagitoy. Nagkebba.
Nataliawna dagiti badigardna. Saan nga am-ammo ti Kapitan dagiti lallaki. Uray ni Angkuan, napataliaw met iti grupo dagiti lallaki a damona laeng met a makita.
(Maituloyto)
