Nobela ni RUDY CONTILLO (Nailathala ito sa April 13 – 19, 2024 print edition)
(Maika-32 a Paset)
IMPALAWLAW ni Kapitan Enteng ti panagkitana iti tallaong. Siniparna ti ayan dagiti tinangdanana a cheer squad-na. Isuda ti para palakpak ken para riawna. Napaisem. Adda amin dagitoy iti puestoda. Ngem napamusiig idi maipasirna dagiti polis ni Hepe Salvador nga agpagnapagna iti aglawlaw. Malaksid iti side arms dagitoy, adda pay iggemda a batuta. Natadem dagiti matada nga agsipsiput. Pasaray pay agrikisa dagiti dadduma aglalo kadagiti pagduduaanda ti garawna a lallaki. Naalana ti naglagaw. Nalagipna dagiti armas nga imbatida iti Fortuner-na. Ngem napaanges iti nalukay idi maamirisna a saan a mabalin a paluktan dagiti polis ti luganna. Panagsalungasing dayta iti plain view doctrine kas imbalakad ti abogadona.
Madamdama pay, tinurongen ni Atty. Baldos ti rostrum. “Naimbag nga aldawyo, amin, patpatgen nga agindeg iti Barangay Kakamanguegan. Nagasattayo a natipontipon itoy nga oras ken kanito ta intayo maimatangan ti inalat dagiti agbalubal a dua a para Kapitan itoy a barangay. Laglagipentayo a daytoy ket nainggayyeman a dangadang, salisal saan la nga iti kinasidap ti isip no di ket no ania dagiti plano nga isayangkat ti mangabak no magun-odna ti talek dagiti umili…” panangirugi ni Atty. Baldos. “Enteng! Enteng! There is no other one!” adda nangipukkaw a grupo. Napaisem ni Kapitan Enteng. Isu dagitoy dagiti taga Laud ti Karayan. “Angkuan is the only Juan! Yeheyy!” adda met alisto a nangisungbat. Grupo dagiti agtutubo ti nataliaw ni Angkuan. Nailasinna a taga Kabulalaan dagitoy. “Agtalnakayo koma, kakabsatko ida! Kas nakunak, naikabsatan daytoy a salisal.
Liklikantayo ti agpipinnasakit. Okey… ilawlawagko laeng a kas nailanad iti naipatulod kadakayo a surat, saan a kas iti gagangay a debate daytoy. Ad-adda ketdi a maaramat daytoy a pangiparangan iti plataporma ti tunggal maysa dagiti agdebate. Maikkanda iti saglilima a minutos a mangibaskag iti platapormada. Kalpasanna, maikkan met iti gundaway nga agsaludsod ti bangir a partido. A sungbatanto manen ti immuna a nangiparang iti biangna. Kasta ti mapasamak, sa sumublatto met a mangilanad ti bangir a partido iti planona…” Madlaw nga alusiisen ken di makaidna ni Kapitan Enteng. Lining-eten ti kilikilina iti nagtugawanna. Taliaw a taliaw a kasla teggaak ti tengngedna. Nagtalinaed met a kalmado ni Angkuan. Iseman ken tung-edanna laeng no adda manglugay wenno mangpayapay kenkuana. Nakitana ketdi a nakapundo ti selpon ni Maestro Pitong a nakasagana nga agirekord iti okasion. “Ulitek, mapalagipan ti tunggal espiker no dandanin malpas ti orasna. Masapul a sumardeng nga agsarita no naibusen ti orasna,” kinuna manen ni Atty. Baldos. “Bulosanyon ida! Larga!” istandies! Adda nangilaaw. “Angkuanak!” kinuna pay ti butiog a lakay. Kunam pay, nagpapaggaak ti tallaong. Nagsardengda met laeng idi mapan kasarita ti polis ti lakay. “Sakbay ngarud nga intayo saksian ti sangkaurayyo a panagdebate da Kapitan Enteng ken Apo Angkuan, kiddawentayo man ni Pastor Prodigalidad nga umayna idauluan ti kararag para iti panagballigi daytoy nga okasion.
Naparagsit ni Pastor Prodigalidad a nagpasango iti rostrum. Nabaked ti bagina a binagayan ti natibong a timekna. Nainayad ngem nabatad ti ababa a kararagna. Kiniddw ti pastor iti Namarsua a silnaganna koma ti isip dagiti dua nga agbalubal tapno mailawlawagda dagiti pagtaktakderanda. Inkararagna pay nga agtalinaed a natalna ti okasion ta para daytoy iti pagsayaatan ken masakbayan ti barangay. “Agari koma ti linak ken talna, maitutop koma dagiti maisawang kadagiti aramid, ken aramiden ti amin a pakaidayawan ti Dios,” panangigibus ti pastor. Natibong ti amen nga insungbat dagiti nakadumog a naitallaong a nakipagkararag. “Let us start the ball rolling! Ti umuna nga agsarita, isu ti nakatugaw a Kapitan, ni Kapitan Enteng! Lima a minutos ti maited kenkuana a mangiplastar no ania dagiti nagapuananna. Apo Kapitan, you have the floor!” kinuna ni Atty. Baldos ket pinatitnan ti nakabitin a kampanilia iti asidegna sa nagtugaw a nangiggem iti stop watch. Natibong ti sipsipat a naipasabet iti panagturong ni Kapitan Enteng iti rostrum.
Awan ressat ti riaw dagiti pasurotna. Ngem iti pannakaklaatna a nakakita iti isusungad dagiti TV crew ti NTP Network, ken dagiti reporter ti DWTP ken DWBB, immawer a naminpinsan ti konsentransionna. Napaumel a nangismmaked kadagiti imana iti podium a kasla mangpadpadaan iti shooting iti pelikula. Naisursurot a nagulimek ti tallaong. Ngem apagapaman laeng ti pannakailabegna ta nasiputanna ti panangtungtung-ed ni Mary kenkuana a mangitudtudo iti relona iti nagtugawanna. “Kakabsat..” a nangitag-ay iti imana a kas nakairuamanna no kasta nga adda ibilinna ken ni Mary. Ti dakesna, impagarup dagiti cheer squadna a seniasna ti panangitag-ayna iti makanawanna. Ket sakbay a makapagsao, nagpapalakpaken dagiti para riawna iti kanawan a parte ti plasa. “”Enteng! Enteng! Enteng not Juan!” indir-ida Kunam pay, iti kigtotna, natikaw ni Kapitan Enteng. Intag-ayna la ket ngarud dagiti imana tapno pasardengenna ida. Ngem ti nagawatan dagiti kakaduana ipigpigsada pay ti riawda.
Ket addaytan ti naggigiddan a riaw ken palakpak manipud iti amin a suli ti plasa. Sinalbagnan, dida la ket makaaw-awaten, intabbaaw ti unegna. Nataliawna ti relona. Adun ti nasayang nga orasna! “Kabarangayak ditoy Kakamanguegan, ammoyon ti gapuna no apay nga agpailayonak a kapitanyo. Kayatko nga ituloy ti nairusattayo a panagdur-as iti barangaytayo!” Panangirugina ket ingngatona dagiti dua nga imana a kasla naggumintang. Enteng! Enteng is my man!” inyiriag manen ken impalakpak dagiti naiwaras a kakaduana iti tallaong. Awan ti aridenggan. Saan la ket ngarud a naawatan dagiti simmaruno nga imbagana. “Nakitayo ti dakkel a dinur-asan ti barangaytayo. Adda planta ti koriente. Adu dagiti pasdek ti negosio a nabangon. Addan dagiti nasemento a kalsadayo!” intuloyna ti panagsaritana. “No ilayondak, kabarangayak, ad-adunto pay ti maisayangkattayo a pagsayaatan. Ibutosdakami kadagiti kakaduak ta ileppastayo amin dagita! Solid vote, awan ti matinnag!” indanogna ti gemgemna iti rostrum. “Kakaasin ti Kakamanguegan, Kapitan Enteng! Sika la ken dagiti kakaduam ti bimmaknang!” Adda nangipukkaw a grupo iti likud. Napataliaw ni Angkuan. Saanna nga am-ammo dagiti agtutubo a mangibaybayog iti banderitasna. Iti nagtakderanna, kasla nailansa ni Kapitan Enteng a nangitudo kadagiti agtutubo. “Anak ti sal—,” saan a naituloy ti Kapitan ti panagtabbaawna. Nataliawna dagiti kamera dagiti taga-media a nakapokos kenkuana. Naipasirna pay da Mayor Marcelino, Judge Jesus Buena, ken pasado Konsehal Jovito, a nakaturong amin ti imatangda kenkuana. Makaipas met ti kusilap ni Atty Juanario iti tugawna idinto a nakaporpormal ni General Realidad.
Makapungtot a nangkusilap ken ni Angkuan. “Kakabsat, napadasan ken napaneknekanyon ti wagas ti panagserbitayo…” kinuna manen ni Kapitan Enteng idi mapasublina ti riknana. Ingngatona dagiti nga imana. Nagiiriag dagiti tao a kasta unay ti palakpakda. “Enteng! Enteng ti pangnamnamaan!” kinunada. Imbabana dagiti imana tapno ituloyna ti panagsaritana. Ngem addaytan ni Atty. Baldos a nangpatit iti kampanilia.
(Maituloyto)
