Nobela ni RUDY CONTILLO (Nailathala ito sa April 6 – 12, 2024 print edition)
(Maika-31 a Paset)
AWAN ti aridenggan iti ariangga dagiti timmallaong. Kasla tiendaan a yan dagiti agtitinnawar nga aggatang ken aglako iti lames a naibiahe manipud iti Pangasinan ti langa ti grupo dagiti maka-Angkuan ken maka-Enteng. “Agtalnatayo, agulimektayo, apo!” natibong ti naturay a timek ni Atty. Baldos. Nakaiggem iti mikropono a mangisensenias iti panagtalna dagiti tao. Itay pay a taliaw a taliaw iti sumrekan iti plasa. Sangkasiraratna ti oras iti relona. Awan ket awan pay a makitana ti alimunumon ni Kapitan Enteng. Kadagita a kanito, addan ti grupo ni Kapitan Enteng iti dalan. Agin-iniin ti Fortuner-na a naglugananda iti sumagmamano kadagiti kakaduana a para kagawad.
Adda iti Innova ni Kagawad Banong nga umip-ipus kadakuada dagiti dadduma, idinto a sumarsaruno ti sabali pay a tallo a lugan a yan dagiti pasurotna. Mayat ti paggaak ni Kapitan Enteng. Planadodan kadagiti kakaduada ti amin nga aramidenda. Umuna, nasken a dramatiko ti iseserrekna. Agpaudi. Isunto ti pakaiturongan amin nga imatang ti tao no kasta. Uray no naladawda, addan dagiti kakaduada a binilinna nga immuna a mapan agpaliiw. Dagitoy ti mangidir-i iti naganna. Adda naituding a pagpuestuaanda. Tunggal suli ti plasa adda dagtiti grupo a mangipukkaw ti naganna, Kayatna a malmes ti timek dagiti mangsupsuporta ken ni Angkuan. Nalawag ti bilinna kadakuada. Inton agdebateda, tunggal itag-ayna ti kanawan nga imana, agpalakpak ken agririag dagiti adda iti makanawan iti plasa. No itag-ayna met ti makanigidna, kasta met ti aramiden dagiti adda iti akinkanigid a paset.
Ken no itag-ayna dagiti dua nga imana, aggigiddanda nga agpalakpak ken agriaw. Kitaek ita no asino ti maibabain ken maikulada iti publiko, impaggaak pay ti uneg ni Kapitan Enteng idi malagipna da Mayor Marcelino ken Judge Jesus Buena, dagiti agpada a puor ti kararuana. Iti panagsardeng ti luganda iti sungaban ti plasa, nangrugin ti ariangga dagiti tao. Agasem ti tallo ribu a botante iti Barangay Kakamanguegan? Adu pay dagiti dimmayo a naggapu iti sabali a lugar. Kayatda amin a maimatangan ti kaunaan a debate dagiti kandidato iti eleksion ti barangay iti San Sebastian. Mangigis ti isem ni Kapitan Enteng idi maiturong amin nga imatang kenkuana. Ad-addan ti isemna iti panangiwaragawag ni Atty. Baldos ti isasangpetda, mayat ti palagapag dagiti agbuya. “Announcing the arrival of the honorable Punong Barangay Vicente Camanaoan!” agal-allangogan ti nabangag a timek ni Atty. Baldos iti sound system.
Matiritir amin a tengnged a nangtaliaw iti Kapitan a naka-Hawaiian polo. Nakapantalon iti delana ken nasilap dagiti alahas a borloloyna. Kasla maitaytayok ti rikna ni Kapitan Enteng. Magustuanna man ti pannakaawagna iti honorable. Madaydayaw. Wen, nakatangtangar ti lapayagna tunggal adda okasion nga atendaranna ket awaganda iti honorable. Sakbay a nagturong iti naituding a pagtugawanda iti grupona iti akinkannawan a bakante a tugaw iti maikadua a linia, pinarimrimanna ni Enteng ken ti grupona iti akinkanigid a linia dagiti tugaw.
Nakaul-ulimek da Angkuan a nangisursurot iti panagkitada iti grupo ni Kapitan Enteng a di man la nangtaliaw wenno nangkablaaw kada Mayor Marcelino ken Judge Jesus Buena. Kasla natugkalan ti timidna idi makabatogda iti nagtugawan dagiti dua nga opisial. “Kap Enteng! Kap Enteng! Kap Enteng!” inriaw dagiti pasurot ni Kapitan Enteng idi agtugaw daytoy. Natiritir ti tengngedna a nangipalawlaw iti panagkitana sa nagpayapay. Napnek.
Mayat ti entrada dagiti kinatulagna. Saan a nasayang ti imbayadna kadakuada. “Angkuan is my man! Angkuan is the only Juan!” adda met simmungbat. Napataliaw ni Angkuan. Ammona nga adu dagiti kakaduada ngem awan ti kinatulagda a mangi-dir-i iti naganna. “Dagitay SK dagita, Pari Angkuan! Sika ti suportaran dagiti agtutubo!” inyarasaas ni Maestro Pitong. Saan a nakatimek ni Angkuan. Ngem mariknana itan nga uray dagiti agtutubo, naamirisda ti pagtaktakderanna. Dakkel ti namnamana no suportaran ida dagiti agtutubo. Napataliaw idi ag-thumbs up kenkuana ni pasado Konsehal Jovito a nakadolpo a nakatugaw iti asideg ni Mayor Marcelino. Agaabayda kada Atty.. Juanario, General Realidad, Maestro Arsenio, Pastor Prodigalidad. Timmakder ni Angkuan a nagkurno kada Mayor Marcelino ken Judge Jesus Buena idi tung-edan dagitoy. Amin dagita, saan a nailinged ken ni Kapitan Enteng. Ket in-inut a nagbalin a mirduot ti mangngis itay nga isemna. Makaipas ti kusilapna ken ni Angkuan. Addaytan ti ariangga idi tumakder a nangitag-ay iti dua nga imana. “Agtalnatayo, kakabsat! Agtalnatayo koma. Umuna ti amin, kablaawantayo dagiti dua a natakneng a kandidato, da Apo Juan dela Cruz ken Apo Kapitan Vicente Camanaoan, nga agpada nga immannugot nga agdebate iti daytoy nga aldaw. Agyamantayo iti panangipangagda iti kiddawtayo a mangipalastar iti plataporma de gobiernoda tapno maammuan dagiti bumarangay no ania ti pagtaktakderanda. Kablaawantayo dagiti agkakadayaw a sangsangaili nga adda a kaduatayo ita itoy nga okasion, nga idadauluan ti patpatgentayo nga ama ti ili, ni Honorable Mayor Marcelino, kaduana ti madaydayaw a Judge Jesus Buena. Agyamantayo met iti kaadda dagiti pannakabagi ti linteg, nga idauluan ni Major Salvador nga umay mangtagiben iti linak ken talna…” panangirugi ni Atty. Baldos. Nagulimek ti tallaong iti panangituloy ni Atty. Baldos ti panagsaritana. “Kiddawenmi ngarud, koma, apo, ti yuuli iti entablado da Apo Kapitan Enteng nga agyan iti makanawan a podium ken ni Apo Angkuan iti makanigid,” kinunana a nangitudo kadagiti pagtugawanda iti makanigid ken makanawanna! Palakpakantayo ida, kakabsat!” “Angkuan is the only Juan!” adda nangidir-i. “Enteng, there is no other one!” adda met nangipukkaw. Iti ariangga ken palagapag ti agsumbangir a grupo, kasla galieraanen ti plasa ti Barangay Cacamanguegan!
(Maituloyto)
