Nobela ni RUDY CONTILLO (Nailathala ito sa March 30 – April 5, 2024 print edition)
(Maika-30 a Paset)
KAGURA ni Kapitan Enteng ni Mayor Marcelino. Daydiay ketdin nga Angkuan ti suportaranna. No ania ketdi ti naipakpakan ni Angkuan kenkuana ta kasta laengen ti kinadekketda. Ngem nabilbileg ni Gobernadora Alconis a koneksionna. No asino ti manoken ti gobernadora isu ti mangabak. Napasamak daytan iti napalpalabas nga eleksion. Didiosen ti gobernadora.
Kakaduana amin a mayor iti probinsia. Ni laeng Mayor Marcelino ti nakaitured a nangkontra kenkuana. Nagsanamtek iti pannakalagipna manen iti mayor. Addan sa ketdi gingginammol ti diaske, intabbaaw ti unegna. Kabarbaro la a mayor, isu ketdin ti naibutos a presidente ti Liga. Agburek ti darana tunggal makitana ti mayor. Isu a manmano a mapan iti munisipio.
NAGPAAYAB ni Mayor Marcelino iti miting dagiti kapitan. Kas iti dati, saan manen a napan ni Kapitan Enteng. Imbaonna ni Kagawad Banong a mangibagi kenkuana. Maipapan iti nayon nga ayuda a naggapu iti gobierno nasional ti pagsasaritaanda. Naiwarasdan ti ayuda a naggapu iti probinsia. “Kablaawak dagiti opisial dagiti barangay nga alisto a nangidanon kadagiti tulong ken ayuda kadagiti kabarangayanda,” kinuna ni Mayor Marcelino.
“Ti laeng problema, isu ti Barangay Kakamanguegan. Ngem awan met ita ti kapitan, isu a kiddawek nga ilawlawag koma ti nangibagi ken ni Kapitan Enteng no apay a nabayag ti pannakaidanon dagiti ayuda,” kinuna pay ti mayor a nangkita ken ni Kagawad Banong. “Nalubo gamin dagiti dalan, Apo Mayor,” inrason ti kagawad a nangkudkod iti saan met nga aggagatel nga ulona. “Laglagipenyo a kakaasi dagiti bumarangay. Saanyo a tugawan dagiti maidanon nga ayuda,” impalagip ti mayor.
“Agserbikayo, saan a dakayo ti paserbian!” Nasemsem ni Kagawad Banong. Imbes a ni Kapitan Enteng ti maungtan, isun ti nagdas-alan ti pammabalaw ti mayor. Dina maibaga ti pudno a rason no apay a tinengngel ti Kapitan ti pannakaiwaras dagiti ayuda. Kayat nga iparikna ni Kapitan Enteng ti rurodna kadagiti agindeg a madlawna a mangsupsuporta ken ni Angkuan. Iti panangidanon ni Kagawad Banong ken ni Kapitan Enteng iti imbaga ni Mayor Marcelino, nagburek ti dara ti Kapitan.
“Talaga a puntirianak a kanayon dayta a mayor!” inradies ni Kapitan Enteng. “Apay a bibianganna ti Kakamanguegan? Eleksionto laeng, ibbongekto ti butosna ditoy!” ingngarietna. Pinaayaban ni Kapitan Enteng dagiti kagawadna ken ni Mary. Nasken nga agsasaritada. Uray agdadamo ni Angkuan, masapul a saganaanna ti debateda. Kayatna nga ilampaso ni Angkuan. No atiwenna iti debate, adunto ti mangdayaw kenkuana a kabarangayanda. Paneknekanna kada Mayor Marcelino ken Judge Jesus Buena nga awan ti inalat ti manokda. “Agpokostayo iti accomplishmenttayo,” kinuna ni Kapitan Enteng.
“Uray kaskasano, narugianen ti pannakakalsada dagiti purok!” innayonna. “Ti imasna, amangan no ibaganto ni Angkuan a pasig la a rugi ti naaramidtayo, kap?” kinuna ni Kagawad Banong. “Ken ti nabayagen nga ararawda nga elektrisidad, kap. Awan kano serbi nga adda napatakder nga electric plant iti barangay ta adda pay la purok nga awan ti elektrisidadna,” imbagi ni Kagawad Annong. “Ibagatayo a saantayo a basol dayta. Basol ti electric cooperative ta nabuntogda!” insalingbat ni Mary.
Mangigis ti isem ni Kapitan Enteng a nagkidday ken ni Mary. Adda puntos ti sekretaria. Ibatoda iti electric coop ti pammabasol. Nagpaggaak idi adda aggilap iti panunotna! Agsagana dayta a Mayor Marcelino, nakunana iti nakemna. Napataliaw dagiti kagawad iti pigsa ti paggaakna.
MAKALAWAS pay sakbay ti aldaw ti debate, ngem nakasaganan ni Angkuan. Iplastarna kadagiti bumarangay ti planona nga isayangkat iti Kakamanguegan no mapagasatan. Insingasing dagiti kakaduana a saggaysaenna nga ibaskag dagiti dakes a galad ni Kapitan Enteng. Nga isu laeng ti bumbumsog idinto a kakaasi dagiti bumarangay.
Ngem inlawlawagna a saan a nasken ti panangdadael iti kalaban iti debate. Napimpintas a dagiti isyu ti masungbatan imbes nga agatakar iti personal. “Masapul a malawlawagan dagiti kalugarantayo a nasken ti naan-anay a panagbalbaliw tapno magun-od ti arapaap a panagdur-as ti sapasap,” inlawlawag ni Angkuan. “Ngem sabali ti ugali ni Kapitan Enteng.
Nakitatayon no kasano ti galadna. Amangan no agaramid iti saan a nasayaat,” insungbat ni Maestro Amante. “Saan nga agkamkamali, laglagipenna nga adu ti agbuya ken makaimatang!” imbagi ni Manang Ellen. “Baybay-antayo laeng. Basta surotentayo no ania ti nasayaat. Agparbeng met ngata,” kinuna ni Angkuan.
“Kaniak a biang, iramanmonto ti pannakasaluad ti nakaparsuaan, Pari Angkuan,” insalpika ni Engr. Redong. “Agingga ita, adu kadagiti kalugarantayo ti dina ammo ti agdasig iti basurada. Ibellengda lattan iti karayan. Isu a no aglayus ket agluppias ti karayan, agkaraiwara dagiti basura ti aglawlaw,” innayonna.
Nagtungtung-ed ni Angkuan. Dayta ti magustuanna kadagiti kakaduana. Adda bagas ken bugas dagiti ibagbagada. “Imbagakon ken ni Major Salvador a mangipatulodto iti augmentation ta sigurado nga adunto ti agbuya,” kinuna met ni Teniente Charlito. NADANON ti aldaw ti debate.
Nasapa pay, naummongen dagiti tao iti barangay plaza. Napunno ti pagbabasketbolan.. Tumagarida.
Nabalawbawan pay ti aglawlaw tapno saan a mainitan dagiti tao. Iti entablado, adda naisagana a dua a rostrum para kadagiti agdebate. Adda lamisaan iti tengnga a pagyanan ti moderator. Napatak ti nakatarpaulin: AMMUEN TI PLATAPORMA.
Nalawag met ti ladawan da Angkuan ken Kapitan Enteng. Iti akinsango a tugaw, mayat ti saritaan da Mayor Marcelino, Judge Jesus Buena, General Realidad, pasado konsehal Jovito, ken Maestro Arsenio.
Natinggaw ti palakpak dagiti tao idi sumangpet ni Atty. Baldos. Nagtarusan ti abogado nga inalamano da Mayor Marcelino ken kakaduana. Madamdama pay, addaytan ni Angkuan ken ti grupona. “Angkuan is my man!” adda nangipukkaw! Nagpapalakpak dagiti tao. “Ni Kapitan Enteng laeng, awanen ti sabali!” impukkaw met ti sabali. Madamdama pay, awanen ti aridenggan.
(Maituloyto)
