Nobela ni RUDY CONTILLO (Nailathala ito sa Sept. 14 – 21, 2024 print edition)
(Maika-54 a Paset)
NAGDARDARAS a nagpakada ni Angkuan kadagiti kakaduana. Napateg ti nangayaban kenkuana ni Major Salvador. Tinarayna a binisong ni Carlota iti nagtugawanna a butaka. Ammona nga adu ti kayat nga ammuen ti asawana nga itay pay a dumdumngeg iti saritaanda. “Dumaw-asak laeng idiay presinto, sweetheart,” kinunana.
“Umaykami. Nasaysayaat a kaduaendaka!” kinuna ni Maestro Amante a nangtaliaw kadagiti kakaduada a sangsangkamaysa a nangtung-ed.Agmalmalanga ni Carlota a nangisurot iti panagkitana iti grupo da Angkuan a nagdardarasen a rimmuar. Sa idi kuan, nagkokomboyen dagiti lugan a rimmuar iti paraanganda.
Iti lugan, impigsa ni Angkuan ti agkarkarasakas a radio. Apagisu a tratrataren ni Danny Antal iti DWTP ti napasamak a panagpaputok dagiti di pay am-ammo a lallaki kadagiti kabangibang a barangay. Dulduldolen ti komentarista napasamak a pamutbuteng dagiti nagtagi-armas a lallaki iti Kakamanguegan.
“No sika ti patan-awanda iti Armalite nga adda banderitasna a sagsangaribu, asino ti ibutosmo?” sangkakuna ni Danny Antal.
“Ti problema, umelen dagiti tao iti butengda, apo! Agsublisublikami a maginterbiu koma kadagiti agindeg iti Kakamanguegan. Ngem awan ti mayat nga agsao kadakuada gapu iti napalaus a butengda!” kinunana pay. Namsanamtek ni Manang Ellen.
“Kumarkaron ti mapaspasamak iti barangaytayo’ kinunana. Nakikalugan daytoy ken ni Angkuan. “Wen ngarud. Kasla organisadoda. Ania ti gaway dagiti gagangay a lumugar kadagita a baribar ti kararuana?” imbagi ni Patricio. “Adda pagpatinggaan ti amin, kakadua,” insungbat ni Angkuan. “Iti kaanoman saan nga agballigi ti kinadakes iti nasayaat.”
Apagbiit nga inunor ti komboy ti dalan a rummuar iti kalsada nasional. Idi makadanonda iti Nagsangalan, intarusdan iti napan iti presinto.Nakatalikud ni Major Salvador. Ur-urnosen daytoy dagiti agkaraiwara a papeles iti lamisaanna. Ikarkarga daytoy ti maysa a patrolwoman iti karton.
“Apay, hepe? Ania ti napasamak?” kinuna ni Angkuan a nagmulagat idi makitana ti panagidaldalimanek ti major kadagiti gamitna. “Part of the job, sir. I have been relieved!” kinuna ni Major Salvador a nangsabet a nangalamano ken ni Angkuan ken dagiti kakaduana.
Saan a nakatimek ni Angkuan. Agsalsaludsod dagiti matana ia nangperreng iti hepe idi ikarga daytoy ti name table-na a nakaiktikitan ti naganna iti karton.
“Gapu iti napasamak a pamutbuteng, sir. Ken dagiti putokputok kadagiti kabangibang a barangay. Dinegdegan dagita ti napasamak ken ni Teniente Charlito!”
Nagsennaay, nalpay dagiti abaga da Angkuan a nagtugaw iti sofa. “Kasanokamin ditoy Kakamanguegan, hepe, no panawannakami?” kinuna ni Angkuan. Madlaw ti danag iti rupana. “Wen ngarud, hepe, ammomi, ar-aramidem amin a kabaelam iti San Sebastian!” imbagi ni Maestro Amante.
Naperreng ni Major Salvador ni Angkuan ken dagiti kakaduana. Maawatanna ti riknada. Iti pannakaidestinona iti San Sebastian iti nasurok a dua a tawen, pinaneknekanna no kasano nga impategna ti trabahona. Inkarigatanna nga impamaysana ti panagtalinaed ti linak ken talna.
“Kasta a talaga no addaka iti PNP. Always follow orders. Adipen ti umili a kunada. Ngem saankayo nga agdanag. Yendorsok iti mangsukat kaniak ti Kakamanguegan a kas special concern,” inyisem ni Major Salvador.
Nagyaman ni Angkuan ken dagiti kakaduana iti hepe. Maysamaysa immasideg a nakilamano iti major. Idi pagam-ammuan ta maibuang ti ridaw ti opisina ti hepe. Naikuadro ni Mayor Marcelino iti ridaw. “Ma-relieve-ka kano hepe?” nagmulagat ti mayor iti yuunegna.
Nagdaydayawen da Angkuan ken ti grupona.
“Wen, sir, agreportnak ita met laeng idiay provincial police office. Addan ‘tay orderko a pirmado ni PD,” insaludo ni Major Salvador.
Nagsanamtek ni Mayor Marcelino. Inalamanona da Angkuan ken dagiti kakaduana. Kudkodenna a saan ti ulona a nangsango iti hepe.
“Kasaritak ni PD. Nasaysayaat no ditoyka pay laeng,” kinuna ti mayor a nangperreng ken ni Major Salvador.
“Thank you, mayor. Ngem narigat. Ipagarupdanto pay dagiti adda iti ngato nga agpolpolitikaak. Amangan no dumanon pay idiay region. Ammom metten, adu a mata ti nakasiput ita kadatayo…”
“Asino ngata dagiti nangbutbuteng idiay Kakamanguegan?” pinanda ti mayor a kinita da Angkuan. Nangilangil laeng dagitoy a nagkikinnita. “Adda atapek. Ngem awan ti ebidensia!”
Nagtitinnaliaw da Angkuan ken dagiti kakaduana. Adda met agay-ay-ayam iti isipda. Ngem kas kuna ti mayor, awan ti ebidensiada.
“No agtimek la koma dagiti bumarangay, mayor. Ngem saankayo nga agdanag. Dayta ti madama a tabahuen dagiti taotayo. Nasiglat ken mapangnamnamaan ti mangsukat kaniak. Classmate-ko idiay Academy.
Ni Major Rex. Batido daydiay, sir. Addaaan iti prinsipio!”
Nagtungtung-ed ni Mayor Marcelino a nangtapik iti abaga ti hepe.
“Kas met laeng kenka, Major! You did your best! Thank you iti serbisiom iti San Sebastian!”
“Thank you for the kind words, sir!” Impakada ti hepe a yakarna laeng dagiti gamitna iti PPO. Agsublitno laengen para iti turn-over.
Saanen a nagbayag pay ti panagsasarita da Angkuan ken Mayor Marcelino. Idi agpakada ti hepe, nagsisina metten dagitoy.
“Agingga a siak ti mayor iti San Sebastian, diak itulok nga agari ti kinadangkes, Mr. Dela Cruz. Ikarik dayta.
Kasaritakto ti baro a hepe tapno ad-adda pay nga ingetanda ti agpatrulia!” kinuna ti mayor idi agpakadan kada Angkuan.
KALPASAN ti dua nga aldaw, naklaat ni Angkuan idi awagan ni Atty. Baldos. Impakaammo ti abogado nga inenyondorsona iti Comelec central office a maisalinong ti Barangay Kakamanguegan iti Comelec control.
“Gapu kadagiti nagsasaruno a napasamak, pagsayaatan ti Kakamanguegan no aprobaran ti Comelec a maisalinong iti Comelec control ti barangay,” panangilawlawag ni Atty. Baldos.
Nakaanges ni Angkuan ti nalukay. Naamirisna, pabor kadakuada dayta nga addang ti Comelec. No maaprobaran, naing-ingetton ti pannakabantay ti eleksion iti barangayda.
Ken maliklikan ti panagraira ti kinadangkes kas iti pamutbuteng. Malaksid itoy, saanton a mamaestra ti agbilang iti butos. Mismonton a dagiti polis.
Impakaammo ni Angkuan kadagiti kakaduana ti impadamag ni Atty. Baldos. Tinurongna kalpasanna ti kuerpo ti polisia. Naitawag kenkuana nga addan ti baro a hepe.
Naurnong dagiti polis iti police station a nasangpetan ni Angkuan. Ammo lattan ni Angkuan a ni Major Rex ti kasarsarita ni Teniente Tabugadir. Nagdaydayawen nga immasideg daytoy kadagiti dua nga opisial.
“Ay, Mr. Dela Cruz, ti baro a hepetayo ni Major Rex!” inyam-ammmo ti teniente ni Angkuan idi mataliawda daytoy.
“Hello, Mr. Dela Cruz!” inyisem ni Major Rex ken ni Angkuan. Nairut ti alamanona kenkuana.
Iti damoda pay laeng a panagkita, nariknan ni Angkuan a nalag-an ti riknana iti baro a COP. Nabaneg, natayag ti kayumanggi nga opisial. Kas naammuanna, tubo daytoy iti Kalinga.
“Adu ti naestoria kadakayo ni bok!” kinuna ti major.
“Saankayo a madanagan Mr. Dela Cruz, no ania man ti nairugi ni Major Salvador ditoy, isu met laeng ti ituloyko.
Ikarik dayta kadakayo!” kinuna pay ti hepe a nangsallabay ken ni Angkuan a nangiturong iti uneg ti opisinana.
Naibayag bassit sakbay a nalpas ti panagsarita da Angkuan ken ti hepe.
Idi rummuarda, nakaporpormal pay laeng ti major iti a nangsaruno ken ni Angkuan. Nalag-an ti rikna ni Angkuan a nagawid.
(Maituloyto)
