Nobela ni RUDY S. CONTILO (Nailathala sa BALITANG HILAGA, Aug. 24 – 30, 2024 print edition)
(Maika-51 a Paset)
KASLA naiwalin a pagay a nagdeppes dagiti agpalpalpa a nakidaya idi bangenan ti polis ken soldado ti nakalukat a landok a ruangan. Kimleb dagiti babbai iti likud dagiti nagmalanga a lallaki idinto a nakaal-alisto dagiti tagtagibian a nangakay kadagiti agtataray nga annakda a mangbanban-a ken agkabkabukab kadagiti nabatbati a taraon iti lamisaan.
Natengngel ni Angkuan ti angesna a nangtaliaw kadagiti kakaduana. Ammona nga armado ni Maestro Amante. Adu la ketdi ti mairamraman no dakes laeng ti mapasamak. Kas panagsaganada, nakagatilio dagiti pannakabagi ti linteg iti ripleda a nangpadaan iti pannakaibuang ti ridaw ti lugan.
“Asinokayo? Ania ti—” saan a naituloy ti polis ti panagsaona ken in-inut nga imbabana ti riple. Naiturong amin nga imatang iti babai a dimsaag iti van. Nakabelo, napudaw, ken pamestisaen ti babai a nakaiggem iti bassit a ladies’ bag. Nakaal-alisto ti drayber a bimmaba ken nangibaba kadagiti maleta iti lugan.
Napanganga, saan a nakatimek ni Angkuan. Ni Carlota! Ti kaingungotna!
Kasla nagpayak dagiti sakana, tinarayna a sinabet nga inappungol ti asawana. Mail-iliwan a nangbisong iti daytoy. Agsalsaludsod dagiti mata ni Carlota a nangkita iti polis ken soldado, nga idi agangay, nagkurno kenkuana sakbay ti panagpaigidda.
“Hello, Maam Carlota! Welcome home!” inkablaaw dagti agtutubo a nangwagis kenkuana. Iniseman ni Carlota dagiti agtutubo.
“Kasla gayam first lady iti kinapintas ni Apo Kapitana!” adda nangisalpika a nagpapalakpakan dagiti bisita ni Angkuan. Maysamaysa nangaribungbong ken ni Carlota. Nakaragragsak met nga inalamano dagiti kakadua ni Angkuan daytoy.
NAKAAWIDEN dagiti sangaili ni Angkuan. Binay-anna lattan dagiti nabatbati a kakabagianda a nangisimpa kadagiti gamigam a naaramat iti panagpaskenda. Aginana laengen. Mariknana ti bannogna. Uray ni Carlota, itay pay a simrek iti kuartoda kalpasan ti pannakisarsaritana kadagiti kakadua ni Angkuan a para kagawad.
“Sinorpresanak, baket. Kellaat met ti panagbakasionmo. Dimo impakpakada ta sinabetka koma idiay airport?” kinuna ni Angkuan idi makitana a nakariing pay ni Carlota. Nakatugaw daytoy iti kama a mangsagsagaysay iti buokna.
“Idi koma pay napan a lawas nga agawidak. Ngem narigat ti mangi-book iti flight. Nag-connecting flight-nak lattan iti Laoag a nangabangak iti van a nangitulod kaniak,” kinuna ti asawana.
“Kadagaam ti America, sweetheart. Saanka a bumaket. Umub-ibingka ketdi!” kinuna ni Angkuan nga immabay ken ni Carlota iti katre.
Namatmatanna ti asawana. Iti panagtulid ti panawen sipud idi agkallaysada, imet pay laeng daytoy ti kinapintas a nangkayaw idi iti pusona pinullon a tawen ti napalabas. Wen, kasla awan ti nagbaliwan ti langa ti asawana. Isu pay laeng daydi Carlota nga inayatna uray iti daydi damo pay laeng a panagam-ammoda.
Nakariing ti nabayag a nailibay nga essem iti barukong ni Angkuan. Kasla aglulumba dagiti kabalio iti pigsa ti dalagudog iti barukongna. Kayatna a lemmesen ti agragut a riknana. Kayatna ti agpasag iti maminsan pay iti sam-it ti lailo iti saklolo ti asawana. Nakain-inayad, inawidna daytoy. Kayatna a baluden iti nairut nga arakup.
“Ania ngamin ti naknakanmo ta simrekka iti politika?” nagwagteng a nagnginngilangil ti asawana. Timmakder a nangbannikes kenkuana. Nagmalanga ni Angkuan. Saan a nakatimek.
“Idi maipadamag kadakami kadagiti annakmo ti pannakatambang ti kaduam, napanunotko a dagus, agpeggadka Johnny! Diak kayat a maisarsarakka!” naapput ni Carlota ti rupana. Nayugyog dagiti abagana iti panaganug-ogna.
“A-adayo a mapasamak ti pampanunotem, sweetheart. Manangngaasi ti Apo,” kinunana a nangassibay iti asawana a nangipatugaw iti katre.
“No naituredda a tambangen ti kaduam, anianto la ketdi kenkan a dadauloda? Nasaysayaat, yatrasmon ti kandidaturam. Kayatko nga agkuyogtan iti panagsublik iti America!”
Ad-addan a saan a nakatimek ni Angkuan. Ania ti aramidenna? Tallikudanna ti nairuginan a laban? Wenno pilienna ti kalikagum ti asawana? Panagserbi wenno pamilia?
Napasennaay ni Angkuan a nagtugaw iti kama. Sinarapana ti mugingna nga agngilngilangil. Naisipna, baliwannanto a kasarita ni Carlota. Yunana pay a palusposan ti itay pay nga ikankanawana nga agragut a riknana.
Dinarasna nga iniddep ti silaw. Immabay ken ni Carlota. Nakasikig daytoy a nakaidda. Saannan a materred ti gulagol iti pus-ongna. Napnuan lailo, naannad a nagdakiwas dagiti dakulapna.
Uray iti sumirsirip laeng a lawag iti apaglukip a binulong ti dialosi, naaragaag ni Angkuan ti apagapaman a nakalemmeng a langit.
NABARA ti ulo ni Kapitan Enteng. Agdinamag ngamin ti panangidiaya ni Mayor Marcelino iti gunggona iti asinoman a makaitudo iti utek iti pannakatambang ni Teniente Charlito.
“Agiinnuna la ketdi dagiti karuprupa ti kuarta! Paginteresanda ti sangagasut a ribu a pisos!” ingngarietna. “Biangot a talaga dayta a mayor!” kinunana ket uray la aglabutab ti ngiwatna iti kangangawngawna.
“Awan ti rumbeng a pagdanaganyo, kap,” insungbat ni Kagawad Banong. “Damagko nga awan pay la ti nangtunton iti bangkay agingga ita!”
Nagsanamtek ni Kapitan Enteng.
Uray impanamnama kenkuana dayta ni Ka Zoilo, nga awan ti rumbeng a pagdanaganna, sumallin ta sumallin latta iti isipna nga amangan no adda mailaw-an a makaipug-aw iti amin. Aglalo iti panangidiaya ti mayor iti gunggona.
Sinalbagen! Intabaaw manen ti unegna. Ammona, saanna a mabalin kariten ti sangon sango ti alkalde. Sa ket kinasarita ni Gobernadora Alconis.
Ad-addan a bimmara ti ulona idi sumangpet dagiti binaonna a mapan mangbukkual kadagiti napasurot ni Angkuan. Agpapada, leppay amin ti abagada.
“Adda metten check point, kap. Sipsiputanda amin a garawmi!” kinuna ni Edison a liderda. “Saankami a makapagmaniobra, boss!”
“Anak ti salbag! Kabutengyo ti checkpoint?” Impunger ni Kapitan Enteng. “Nagrasonkayo, koma, a!”
“Panagkunag, narigat ti agdardarasudos, kap. Agdinamag ti panagestrikto ti Comelec.
Narigaten baka isu pay ti pakasiripanda iti abot kontra kadakayo iti mabalinda nga ikaso!” imbalakad ni Mary a nangyawat iti kapitan iti mineral water.
“Buisit dayta a mayor!” indayamudom ni Kapitan Enteng.
Saan a naigagara, naaprosan ti kapitan ti nalamuyot a dakulap ti sekretaria.
Kasla adda koriente a nangriing iti riknana iti bara ti dakulap ti balasang.
Nagsig-am a nangdismolar iti riknana.
Saan a nagpadlaw. Ngem pinalamiis ni Mary ti pudot ti ulona.
Nabayag la daydin, naisipna. Sipud idi kampania, awanen ti gundawayda a rummuar.
Agsasaritada kadagiti dadduma pay a para kagawadna idi agkiriring ti telepono ni Mary.
“Awag, kap. Para kadakayo!” kinuna ti sekretaria a nakaporpormal a nangkita ken ni Kapitan Enteng iti panangyawatna iti selpon.
Minira ti kapitan ti telepono. Nagkebba idi makitana ti umaw-awag.
Ni Ka Zoilo.
(Maituloyto)
