Nobela ni RUDY CONTILLO (Nailathala ito sa Aug. 17 – 23, 2024 print edition)
(Maika-50 a Paset)
PUMARBANGONEN idi agpakada dagiti kakadua ni Angkuan. Sakbay a nagpakada ti deputy chief of police, imbilinna nga agbati ti maysa a polis iti balay da Angkuan. Pinaiposte met ni Major Nap Agustino ti maysa a taona a mangkadua iti polis. Nagpakada daytoy ken ni Angkuan kalpasanna idi umawag ni Lt. Ferdie Corteza. “Ammuek no adda nakalap da Lieutenant Corteza nga impormasion iti bangkay,” kinuna ti major a nagdardaras a naglugan iti military jeep.
Insursurot ni Angkuan ti panagkitana iti umad-adayon a lugan. Napaanges iti nauneg. Intugawna iti butaka. Kasla napaksuyan iti panagriknana. Nabayag a nagpampanunot. Agingga a nailibayna.
KASLA uram a nagramaram ti napasamak ken ni Teniente Charlito. Naibandera kadagiti pagiwarnak. No mano nga aldaw a nabara a topiko kadagiti radio ken telebision. Maysamaysa nangkondenar ti panagraira ti kinadangkes iti Kakamanguegan. Sangkaulitda a saan a maiparbeng ti aniaman a kinadangkes iti natalna a kagimongan. Nagpiestaan pay dagiti komentarista ti saan a pannakatiliw dagiti kriminal. Maymaysa ti punto de bista dagiti komentarista. Mairaman koma kano a maigarangugong ti utek iti panagtambang.
Alusiisen ni Kapitan Enteng. Kayatna ti mapan iti safehouse da Ka Zoilo. Ngem kasla nareppet dagiti imana. Saan a makapaggaraw. Magagaranen a mangammo iti napasamak. Maulaw iti aglalaok dagiti damag. Adda mangibaga a nakaro ti sugat ni Teniente Charlito. Adda pay mangibaga a naka-ICU. Ibagbaga pay ti dadduma a natayen daytoy. Ngem ilimlimedda laeng iti publiko. Ti siddaawenna, awan ti makaamo no sadino ti nakayakaranna nga ospital. Nangemkem. Awan met ket ti danagenna iti natay a tao ni Ka Zoilo. Awan ti aniaman a pakaammuan iti kinaasinona.
“Anak ti salbag!” ingngariet ni Kapitan Enteng. Bigbigat pay laeng ngem agkalkaling-etanen daytoy. Nakasapsapa ngem addayta a nangngegna manen iti radio nga isu ti paspasagidanda. Makaluksaw iti komentarista a ni Joks Caban. Isu ti punpuntiriaenna nupay dina nga innaganan. Inyalisna ti sabal inga istasion. Ad-addan ti luksawna idi mangngegna nga isu met ti paspasagidan ni Ronald Unnoy. Bimmara ti piditpiditna. Panagriknana, pagkaykaysaan dagiti komentarista. Saanna a magustuan ti tabas ti panagdildilada. Isingsingasingda ketdin a rumbeng kano a maimbestigar! Dayta ti dina kayat a mapasamak. Ta ania koma ti ebidensiada?
Nalagipna ni Ka Zoilo. Awan ti pagdanaganna. Nalawag ti saritaanda. Awan ti agipug-aw no adda mapasamak. Ken awan ti natiliw kadagiti dua a kaduana. “Agsaritata koma!” kinuna ni Kapitan Enteng iti panangpatawagna ken ni Ka Zoilo iti dayta manen nga agsapa. Inaramatna ti telepono ni Mary.“Agpalamiistayo pay laeng, kap,” pinengdan ni Ka Zoilo. “Nabara nga isyu ti napasamak. Nasken nga agannadtayo amin!”
“Punieta! Ania ngarud ti aramidek? Inaldaw a paspasagidandak iti radio ken telebision?” makapungtot ni Kapitan Enteng. “Aduda ti agsipsiput, kap. Kompirmado, intel ti AFP ti grupo dayta a major nga agop-operate iti San Sebatian. Saantayo nga agtaltalek!” “Kasanon no adda mangbigbig iti bangkay ti kaduayo?
Maibanbandera iti telebision ken diario ti ladawanna!” agpigpigerger ti boses ti kapitan.
“Relaks laeng, kap. Siak ti makaammo iti dayta. Adayo a mapasamak ti ibagbagayo!” Saanen a simmungbat ni Kapitan Enteng. Lining-et iti impadamag ni Ka Zoilo. Nangemkem. Saan la a polis. Pati payen dagiti elemento ti AFP, mainayonen iti parikutna. Iti napasamak, ad-addan a saan a makapaggaraw. Uray dagiti dadduma a pasurotna, adda metten amakda. Kas kenkuana, kasla met nareppet met ti imada. Narubroban ti rurodna. Kangitingit pay met ti kampania. Saan a mabalin, nairadiesna. Masapul a makapaggarawda. Ti kayatna, dakkel ti pangitarayanna ken ni Angkuan.
Naklaat ni Kapitan Enteng iti maysa nga agsapa. Inawagan daytoy ni Gobernadora Alconis.
“Ania daytoy mapaspasamak iti barangaymo, Kapitan Enteng?” pormal ti timek ti gobernadora iti bangir a linia. “Saan a nasayaat nga adda pammapatay a mainaig iti politika dita Kakamanguegan!”
“Awan ti aniaman a pannakaibiangko, gobernadora,” insungbat ni Kapitan Enteng a di pay nagkirem iti panaglibakna. Innayonna a baka aramid dagiti makakanigid gapu ta retirado a soldado ni Teniente Charlito. Nainget ti bilin ni Gobernadora Alconis. Impaganetgetda a rumbeng a maliklikan ti kinadangkes. “Ay-ayam laeng ti politika iti barangay. Saan a bale a gumastos. Basta agtalinaed a natalna ti eleksion!” kinuna pay ti gobernadora.
NAIWARAGAWAG a nairaman iti listaan ti areas of concern ti Barangay Kakamanguegan. Nainget ti bilin ni Atty. Baldos. Ingetan pay ti Task Force a siputan dagiti amin a kandidato, dagiti armado a grupo, agraman dagiti mangsupsuporta kadagitoy. Kinuna ti Comelec officer a saan nga agpangadua a mangisalinong iti Comelec control iti San Sebastian no kumaro pay ti tension.
Binilin met ni Mayor Marcelino dagiti polis a pardasanda ti iwaywayatda nga imbestigasion iti pannakatambang ni Teniente Charlito.
Nangidiaya pay iti P100,000 a gungguna iti asinoman a makaitudo iti utek ti panagtambang.
“Agingga a siak ti mayor, diak ipalubos nga agraira ti kriminalidad iti San Sebastian!” kinuna pay ti mayor iti pananginterbiu kenkuana ti DWTP babaen ken ni Danilo Antal.
ITI biangna, pabor ken ni Angkuan ti pammilin ti Comelec. Naing-inget itan ti panagbantay dagiti autoridad iti San Sebastian, nangruna iti Barangay Kakamanguegan.
Addan naipasdek a checkpoint kadagiti kangrunaan a dalan iti barangay. Saanen a makapagdakiwas pay dagiti managdakdakes. Agingga ita, kasla saan pay la a patien ni Angkuan ti napasamak ken ni Teniente Charlito.
Tunggal malagipna ti teniente, madandanagan daytoy. Saanda pay a napasiar ti teniente. Uray dagiti kakaduana, saanda met a makaidna nga agpampanunot. Agpugpugtoda amin no kasanon ti kasasaad ti teniente.
Napan payen pinasiar ni Angkuan ti pagtaengan da Teniente Charlito. Ngem manipud pannakatambangna, nakarikepen ti balayda. Awan ti makaibaga no sadino ti ayan ita ti pamiliana.
“No adda dakes a mapasamak iti kaduatayo, dakkel a pukawtayo,” kinunana iti naminsan a panagsasaritada nga agkakadua. Inatendaran daytoy ni General Realidad.
“Pangnamnaan ni Teniente Charlito…” kinuna pay ni Angkuan.
“Uray no maammuantayo koma laeng no sadino ti ayanna nga ospital. Tapno mabisitatayo met,” insungbat ni Maestro Amante.
Napaanges iti nauneg ni Angkuan. Narigatda nga awaten no bilang dakes laeng ti gasat ni Teniente Charlito.
Napasamaken ti nagam-amkanna. Ti pay mismo a nasinged a gayyemda ti biktima. No saan a matiliw dagiti suspek, amangan no addanto pay sabali nga isarunoda kadakuada.
Kinarayaman ti lamiis ti duri ni Angkuan iti dayta a simmelsel iti isipna. Kellaat a nalagipna ti pamiliana. Yad-adayom, Apo, naitanamitimna idi mapanunotna nga agpeggad ti biagna.
Nalagipna ti kinuna ni Major Nap Agustino. Saanda nga agpatingga agingga a di masolbar ti napasamak ken ni Teniente Charlito. Dayta met ti intawag ni Provincial Director Jorge dela Pena kenkuana.
Imbaon pay ti koronel ti deputy-na, ni Lt. Colonel Simon, a nangipanamnama nga ar-aramiden amin ti polisia ti kabaelanna tapno masolbar ti krimen.
“Nagtiponen ti puersa ti PNP ken ti grupo ni Major Nap Agustino a manganup kadagiti kriminal,” kinuna pay ti Deputy Provincial Director.
“Maburburtiaankami laeng no apay nga awan ti makaibaga iti kinaasino ti bangkay. Awan man la ti mapan mangbigbig wenno mangala koma a kabagianna…”
(Maitulyo)
