Nobela ni RUDY CONTILLO (Nailathala ito sa Aug. 10 – 16, 2024 print edition)
(Maika-49 a Paset)
NAGALLANGOGAN dagiti putok ti paltog a nangpisang iti naulimek a rabii. Iti kidem ti sipnget, bumegbeggang dagiti buli a kasla awan aniamanna a nangsalpot iti Crosswind. Lumanitak dagiti bala a nangsapul iti simmarianda iti uneg ti lugan. Kasla awan aniamanna a naruros ti windshield iti sumanengseng a bala. Idi sumardeng dagiti putok, nagari ti apagapaman nga ulimek.
Kasla simmardeng ti panagtayyek ti lubong iti panagrikna ni Teniente Charlito. Limmukay ti petpetna iti kalibre kuarentay singkona. Natengngelna ti angesna. Bakras ti dalan ti nagtulidanna. Napuskol dagiti muyong. Napatangad idi mangngegna dagiti anabaab. Siniraratna dagiti tallo nga anniniwan iti lawag ti agan-andar pay laeng a lugan. Immasideg dagitoy a nangtan-aw iti agas-asuk a lugan.
“Intayon!” nangngeg ti teniente a kinuna ti maysa a nakaiggem iti Armalite. “Sigurado, napuruan dayta a teniente!” imbagi met ti maysa a nakapaturong met laeng iti ripple iti lugan. Nupay mariknana ti panagbibineg ti bagina, sinirig ni Teniente Charlito ti nakaiggem iti Armalite. Agpigpigerger. Mariknana ti panagkapsutna. Inurnongna amin a pigsana. No dakes laeng ti gasatna, masapul nga itablana ti biagna. Idi masaripatpatanna dagiti tallo nga agar-arudok iti abay ti lugan, kinalbitnan ti gatilio. Agkapsuten. Ngem na-double tap-na.
Nakita ti teniente, naarinuknok ti nagtulid a naka-armalite. “N-naalaak! Naalak, kakadua!” nangngegna ti pugsapugsat a kinuna ti naarinunok. “Animal!” kinuna ti nakaiggem iti Armalite. Iti apagdarikmat, kasla agpangugganen daytoy a nangiwaradiwad iti nagbusi nga igamna nga impaturongna iti kimleban ni Teniente Charlito.
Iti kapsutna, insubsob lattan ti teniente ti ulona iti daga. Natimudna kalpasanna ti panagpinnapilit dagiti dua a lallaki. “Bagkatenta!” kinuna ti maysa kadagitoy a nangulod iti natumba a kaduada. “Bay-amon! Dandani itan dagiti agresponde!” impigsa ti maysa.
Madamdama pay, iti kuridemdem ni Teniente Charlito, nasaripatpatanna nga inalun-onen ti kasipngetan dagiti dua a lallaki. Sinaruno dayta ti andar ti lugan a nagin-inut a nagpukaw.
Isu pay la ti panagsubli ti riknana. Naarikap ni Teniente Charlito ti bagina. Nariknana ti bara ti agsayasay a dara. NABUAK ti Kakamanguegan iti dayta a rabii. Nagrekorida a dagus dagiti polis. Mismo a ni Hepe Salvador ti nangitaray ken ni Teniente Charlito iti ospital. Imbaonna ti deputy-na iti balay da Angkuan.
Nagdadarison met dagiti kakadua ni Angkuan a simmangpet. Madandanaganda. Addada amin. Adda pay ni General Realidad. Ni laeng Manang Ellen ti awan ta awan ti pakilugananna.
Simmangpet ti grupo ni Major Nap Agustino. Naka- full battle gear dagitoy
“Sir!” nagsaludo ti major ken ni General Realidad. Adda inyarasasna. “I see… I see. Any ID?” kinuna ti heneral a nangperreng iti major.
“Madama nga am-ammuen ni Lt. Ferdie Corteza, sir. Joint manhunt operation ti gupotayo ken ti PNP kadagiti kriminal. Naserregan amin nga exit points!” Saan pay laeng a nagkalma ti rikna ni Angkuan. Agkebbakebba a dumdumngeg iti saritaan da General Realidad ken ni Major Nap Agustino. Idi agangay, nakitana ti maysa kadagiti kadua ti major. Saan a nakatimek. Saan nga agbiddut Ti sorbetero! Nalawagen ti amin kenkuana. Iti langana ita, narigaten a mairupaan ti sorbetero.
“Komusta ni Teniente Charlito?” sinaludsod ni Angkuan kadagiti polis. “Naitaray a dagus iti hospital, sir!” ni Teniente Tabugadir, ti nabiit pay a nadutokan a deputy chief of police ti San Sebastian PNP, ti simmungbat. “Urayentayo ti tawag ni Major Salvador, sir!” “Saan met la a grabe?” dinamag met ni Maestro Amante. “Maammuantayto no sumangpet ni hepe, sir.”
“Dagiti nangtambang ken ni Teniente Charlito? Natiliwdan? Asinoda?” agpigpigerger ni Maestro Pitong. Pumurpuraddaw. Sangkapiditna ti selponna nga agtawtawag.
“Nakatabla ni Teniente Charlito , sir. Maysa a bangkay ti Nakita dagiti tropa iti nakapasamakan ti ambush. Addan iti puneraria ti bangkayna. Madama ti hot pursuit operations!” kinuna ni Teniente Tabugadir a nangtaliaw kada General Realidad ken ni Major Nap Agustino nga agpada a nangtung-ed kaniana.
Saan a nakatimek ni Angkuan. Nataliawna da Maestro Pitong ken Maestro Amante.
“Talaga a marksman ni Pari Charlito!” kinuna ni Maestro Amante. “No maammuan ti kinaasino ti natay, masolbarton ti kaso!” Inasitgan ni Angkuan ni Teniente Tabugadir a makisarsarita ken ni Major Nap Agustino.
“Sapay ta saan a grabe ti tama ni Teniente Charlito,” kinunana. “Pangngaasiyo, maammuanmi koma a dagus ti kinaasino ti natay,” innayonna.
“Wen, sir, saankayo nga agdanag. Addan dagiti naideploy a blocking force iti amin nga exit points. Coordinated payen kadagiti kabangibang nga ili. Masapul a matiliwda!” kinuna ni Teniente Tabugadir.
Inkeddengda Angkuan a bisitaenda ni Teniente Charlito iti ospital. “Ammuenmi ti kasasaadna, teniente ,” kinuna ni Angkuan.
“Saan pay laeng, Mr. Dela Cruz,” ni Major Nap Agustino ti simmungbat.
Inasitgan nga impusing dagiti dua nga opisial ni Angkuan.“For safety, sir, nayakar iti undisclosed hospital ti pasiente!” kinuna ni Major Nap Agustino. “We hope for the best. Sapay ta malasatna… Adu ti tamana!”
Nagkikinnita da Angkuan ken dagiti kakaduana. Saanda a nakatimek.
Maysamaysada a napangilangil a napadumog.
(Maituloyto)
