Nobela ni RUDY CONTILLO (Nailathala ito sa Aug. 3 – 9, 2024 print edition)
(Maika-48 a Paset)
INASITGAN ni Teniente Charlito ti sorbetero a nupay mumalemen, nakapayabyab pay laeng. Am-ammon ti kaaduan kadagiti ubbing ken agtutubo. Masansan nga aparna a paglakkuan ti Kakamanguegan. Ranaenna dagiti ayan ti pasken ken punsionan a yan ti adu a tao. Kas ita, nakaragragsak dagiti ubbing a nagdadarison a nagtataray a nagturong iti ayanna nga agkilkililing.
“Ikkam amin ida. Siak ti mangbayad!” kiniddayan ni Teniente Charlito ti sorbetero. Naparagsit ti sorbetero. Nagtung-ed ken pinagliliniana dagiti ubbing a maragragsakan. “Yeheyy!” inyikkisda a naglalagto a kimmita ken ni Teniente Charlito.
Manipud iti nagtakderanna, saan nga insina ni Angkuan ti panagkitana ken ni Teniente Charlito nga immasideg iti sorbetero. Masigurona, ganggannaet ti sorbetero. Am-ammona amin dagiti aglaklako iti sorbetes manipud iti paktoria ni Lakay Dinong iti ili. Adda agay-ayam iti isipna idi masiputanna ti panagkinnissiim da Teniente Charlito ken ti sorbetero.
Nasinga ti panangsiput ni Angkuan kada Teniente Charlito ken ti sorbetero idi kablaawan dagiti agsangpet a bisita. Napaisem a nangsangbet ken ni Atty. Juanario idi mailasinna daytoy.
“Naimbag man, attorney, ta nakadaw-askayo,” sinabetna nga inalamano ti abogada ken dagiti dua a babbai a kakaduana. “Da Attorney Estela ken Attorney Perlita,” panangyam-ammo ni Atty. Juanario kadagiti kaduana ken ni Angkuan. “Kaduak ida iti League of Women Lawyers,” inyisemna.
Nairut ti panangalamano ni Angkuan kadagiti dua nga abogada. Naisem, naemma, ken agkabannuagda. Iti gargarawda pay laeng, masinunuona a kas met laeng ken ni Atty. Juanario dagitoy a mabilbilang ti ibbatanda a balikas.
“Adda laeng rantami, Mr. Dela Cruz,” kinuna ti abogada ket impusingda ken dagiti kakaduana ni Angkuan. Saan a nabayag ti panagsasaritada. Nairut ti alamanoda kenkuana. Adda sobre nga impapetpet ti abogada ken ni Angkuan. “Bassit laeng a para gasolinayo,” kinuna ti abogada.
Nagyaman ni Angkuan a nagtamed iti abogada kas panagyamanna. Saanen a nagbayag dagitoy kalpasanna. “Napateg sa ketdi ti ginagara da Attorney Juanario?” inasitgan ni Maestro Pitong.
“Wen, maestro. Naan-anay ti suportada iti grupotayo, Diak koma awaten ti imbatina a tulong. Ngem mabainak, amangan no adda makunada,” kinuna ni Angkuan.
Nalagip ni Angkuan ni Teniente Charlito. Idi taliawenna ti kalsada, awanen daytoy. Uray ti sorbetero. Naakasanen ti igid ti kalsada kadagiti ubbing. Binay-annan idi saanna latta a makita pay dagitoy. Sinublianna nga inasikaso dagiti dadduma pay a sangaili.
SERIOSO ti rupa ni Kapitan Enteng. Agsarsaritada ken ni Ka Zoilo. Sinapsapana ti napan iti safehouse. Masikoran. Nagalis dayta a Teniente Charlito. Binaliwan pay a sinublian dagiti tao ni Ka Zoilo ngem saan nga agintaer iti balayda. “Ania ti mapaspasamak? Apay nga awan met laengen ti magudilanyo?” makaunget ti timek ni Kapitan Enteng.
“Uray dakami, madukotan metten, Kap. Ngem talaga a nagalis! Addan sa ket gingginammol ti diaske. Saan a matsambaan dagiti taok!” insungbat ni Ka Zoilo a mangdaldalus iti stainless a kalibre .45 na.
“Saan unay a makapaggaraw dagiti taok. Uray idiay balay, adda amak dagiti kakaduak nga agiwaras. Amkenmi nga adda pannakamatada a mailaok kadagiti sumsumrek iti balay!” inridis ti kapitan. “Tsk tsk tsk… Nalaing dayta nga Angkuan! Ammona ti ar-aramidenna! Hustoka, kap. Alwadanyo, adda la ketdi agsipsiput kadakayo!” kinuna ni Ka Zoilo.
“Diablesna ketdi! Saan a dayta Angkuan ti nalaing! Dayta a major! No asinoman dayta a major, ammuenyo!Trabahuenyo sakbay a maappotdakayo, aggarawkayon!” imbanang-es ni Kapitan Enteng nga itay pay a pagna a pagna ken sunel a sunel iti sigariliona. Nagngirsi ni Ka Zoilo.
“Dayta ti adayo a mapasamak, kap!” ngimmato ti bosesna. Kasla kumilaw dagiti matana a nangtaliaw kadagiti agiinum a kakaduana.
“No billit oma, nalaka laeng a maammuam ti ayanna a sanga. Gunggonem ti kayo a nagaponanna! Agkayabkab la ketdi!” imbannikes ni Kapitan Enteng.
Napatakder ni Ka Zoilo iti nagtugawanna. Naperrengna ni Kapitan Enteng nakabannikes pay laeng a kumitkita kenkuana.
“Ammokon ti aramidenmi, kap! Wen, kompormen kada Teniente Charlito ken ni Angkuan ti umuna a makalapmi! Tapno awanen ti problema!” kinunana a nagtungtung-ed.
Gimluong ti paggaak ni Kapitan Enteng. Nagtinnag a palakpak ti bannikesna.
AD-ADDAN a masikoran ni Kapitan Enteng idi makasangpet iti balayda. Agsasarita dagiti tinangdananna nga agsurbey. Makapungtot.
Impasabet kenkuana dagitoy a maar-arus iti amin a purok. Ti laeng purok ti kapitan ti pangat-atiwanna. Apay a napasamak dayta?
Nagdakkelen a kuarta ti nabusbosna? Nagkaling-etan. Uray dagiti padana a kapitan, kanayondan a kantiawan no miting ti Liga dagiti Barangay.
Ibagbagada nga amangan no mapaspasarakan kano ti agdadamo iti politika a kas ken ni Angkuan!
“Dayta ti saan a mabalin! Apay a napigsa dayta nga Angkuan?” gimluong ti nabangag a boses ni Kapitan Enteng a nangsango kadagiti para surbeyda.
“Dagiti agtutubo, aduda a mangipagpagna ken ni Angkuan, kap. Idoluenda metten ni Angkuan!” kinuna ti lider dagiti agsursurbey.
Kunam pay, rimmasuk ti dara ni Kapitan Enteng iti nangngegna. Timmayab ti baso nga iggemna.Naburak daytoy a naitupa iti masetera.
Saan a nakatagari dagiti agsursurbey iti kigtotda. “Kap! Kap, Danum! Uminumkayo!” alisto ni Mary nga immasideg. Inyawatanna iti mineral water ken ni Kapitan Enteng.
Umanangsab ti kapitan a nangarub-ob iti danum. Idi agnadnad ti riknana, pinaayabanna a dagus iti sekretaria ni Kagawad Banong.
“Ammuenyo man no asino dagiti agtutubo a mangipagpagna ken ni Angkuan! No nasken, pamelmelanyo ida iti kuarta!” Imbirkakakna.
Sintagari, nagal-aludoy a pimmanaw dagiti para surbey. Saandan a nagpakada iti kapitan. Ammoda ti ugalina no kasta a nabara ti ulona.
NARAGSAK ni Angkuan. Iti dayta nga oras ti sardam, kalkalpasda a nagsarita ken ni Carlota.
Kayat ti asawana ti agbakasion. Mailiwen iti Kakamanguegan.
Uray ni Angkuan, kailiwna metten ti kaingungotna. Uray dagiti annak ken appokona.
Ngem binagbagaanna a saan pay laeng nga agbakasion.
Saanna nga imbaga iti asawana a nabara ti labanda ken ni Kapitan Enteng.
Dina kayat nga agdandanag daytoy.
Napaanges iti nauneg. No maminsan, mapampanunotna a nakasimsimple koma ti biagna ita no saan a simrek iti politika.
Makaturog iti kaykayatna.
Makagaraw nga awan ti sipsiputanna. Wenno saan, agen-enjoy koma itan a mangaw-awir iti appokona iti Estados Unidos.
Ngem nakitana ti kasasaad ti Kakamanguegan iti panagretirona. Nakitana nga adu ti nasken a mabaliwan.
Nga adu ti nasken a maisayangkat tapno mananam met dagiti kalugaranna ti panagdur-as. Kayatna ti sapasap a panagdur-as.
A saan a manmano laeng ti mamutittit ken agsayaat.
Napangilangil iti iddana. Ania ti agur-uray a gasatna iti politika? Ket naiturturog ni Angkuan ti panagpampanunotna.
KADAGITA a kanito, un-unoren ni Teniente Charlito ti dalan a sumina iti kamino real a sumrekan iti purokda.
Manmano ti balbalay iti dayta a paset ti dalan. Kinawayanan ti agsumbangir nga abaga ti natapok a kalsada.
Nagsanamtek a nangtaliaw iti relona. Pasado alas onsen. Naibayagda ken ni Major Nap Agustino ti nagsarsarita. Adun dagiti nakalapda nga impormasion kontra kadagiti tao nga inupaan ni Kapitan Enteng. Ammona, saan a mabayag, maammuandanton no sadino ti apon dagitoy. Nagsuyaab. Makaturturogen.
Tinengngelna ti kalibre kuarenta singkona idi matinnag koma iti panagmenorna iti pagpikoran.
Naklaat idi makitana dagiti nakabalangan a kayo. Alisto a nagwerret ti panunotna. Apagsardengna, inggayangnan ti bagina a timmappuak.
Pinisang dagiti ranipak ti armas ti ulimek ti rabii.
(Maituloyto)