Nobela ni RUDY CONTILLO (Nailathala ito sa July 27 – Aug. 2, 2024 print edition)
(Maika-47 a Paset)
NARABUY ti isem ni Bise Mayor Nixon Peralta a nangsabet ken ni Kapitan Enteng. Uray la aglag-oy ti butiog ti kapitan a naitupa iti maskulado a bagi ti bise mayor iti panaginnabbayda.
Awan iti langa ti bise mayor ti edadna nga innem a pulo. Nabisked. Bigotilio. Natunidiris ti agongna. Naparsiakan iti dara ti Kastila. Retirado a Philippine Marines. Namitlo a nabutosan a konsehal ti ili sakbay a nagbise mayor. Koboy. Aw-awaganda iti asiendero nupay aglima la nga ektaria ti napundarna a daga iti San Sebastian. Numero uno a tadero. Iti San Sebastian a nasiggisiggit ti dagdaga, maibilang nga adda mabalbalin ti agindeg no adda nasursurok a maysa ektaria ti bukodna a suksukayen a daga.
Nasinged da Kapitan Enteng ken ti bise. Agkaeskuelaanda iti flying school. Nupay saan unay a sumursurot iti galiera, ipasurotna lattan ti pustana iti bise mayor. Adun ti manokna a nagkampeon iti derby. Agpadada nga armendo. Ngem nalalaing ti bise. Masukansukat ti parehana
“Nakapasiarkayo, apo bise?” nagayad ti isem ni Kapitan Enteng. Sineniasanna ni Kagawad Esco a mangisagana iti mainum ken pulotanda. “Makaammokanton kadagiti badigard ni bise,” impakamakamna.
Nagdardaras ni Kagawad Esco a nagpakosina. Idi agsubli, sumarsarunon kenkuana ti dua a serbidora a nakaiggem iti Black Label ken nakaplatito a kilawen a kalding a pulotanda.
“Kasano ti taray ti kampania? Adu met dagiti agwarwaras a damag a natibong ti nagan ni Angkuan a kalabanmo?” awan palpalikaw ti bise mayor. Mangigis ti isemna ket nagparang dagiti nalitem a ngipenna.
Limmidem ti rupa ni Kapitan Enteng iti panangdakamat ti bise mayor iti nagan ni Angkuan. Tinengngelna ti riknana. Masapul nga ipakitana ken ni Bise Mayor Nixon Peralta nga awan ti dadanaganna.
“Awan pannakaatiwta, bise. Am-ammonak metten! Saan a kayat dagiti kalugarak a masuktanak ditoy Kakamanguegan a kapitan!” impigsana.
“Kunakto pay!” Inggarakgak ti bise mayor. “Biddut ti ibagbaga ni Mayor Marcelino a napigsa kano ti guyod daydiay nga Angkuan!” naggarakgak manen ti bise mayor a nangtapik kenkuana.
Kasla adda nagsalat iti karabukob ni Kapitan Enteng iti panangdakamat manen ti bise mayor iti nagan ti tao a kagurgurana unay. Linengngesna ti botelia. Tinuyaganna ti baso da iti bise. Di pay nagkirem a nangitangnguap iti guduat’ baso nga arak. Pinagdaraddanna ti nangkutsara iti kilawen. Sa imminum iti danum. Nagtig-ab. Timmapis a dagus ti bara ti arak.
“Bise, kunak idin ket kunaek manen. Saan pay a naipasngay ti mangibalat kaniak ditoy Kakamanguegan! Sisiw daydiay nga Angkuan!” kinunana a nangitag-ay pay iti gemgemna.
Ad-adda la ket ngarud ti paggaak ni Bise Mayor Nixon Peralta. Ammona, nasukitna ti rikna ti kapitan. Kabisadonan ti ugali ti gayyemna. Saan a makaliklikmut iti kalleb. Ababa ti kurdonna. Ngem magustuanna ta manipud idi simrek iti politika, nagkaduadan. Dakkel ti naitulong ti kapitan kenkuana. Ti butos a naalana iti Kakamanguegan ti nangpangabak kenkuana iti panagbise mayorna. Isu nga asideg ti riknana iti Kapitan.
“Awan duaduak, Kap. Lalaingem. Masapul a mangabakka. Kayatko a sikanto ti katiketko iti sumaruno nga eleksion!” impormal ti bise mayor.
Kunam pay, napukaw amin a simron ni Kapitan Enteng. Tinuyaganna manen ti basoda iti bise mayor. Pinagtinnik-olda dagiti basoda sada naggidan a nangitangnguap.
“Sangduentanto daydiay a Mayor Marcelino!” imbirkakakna ket uray la nagsapri ti ngiwatna iti pigsa ti saona.
“Wen, a! Sublatenta ti rienda ti turay. No agtipon ti puersata, dakkel ti namnama!” indanog ti bise mayor ti imana iti tangatang iti panagtung-edna.
Nagampayag a dagus ti panunot ni Kapitan Enteng. Nagarapaap. Nagkallasawan ti isipna. No makapag-bise mayor, saanto laengen a kasosio iti hueteng. Dakdakkelton ti apagna. Ken nalawlawanton ti pagdakiwasan ken pamastrekanna.
Ad-addanton a bigbigenda. Kitaem man la ti gasat, naisipna. No makapagbise, kasla makitkitanan ti sumaruno a papananna.
“Kap, ti kunak, siguraduem a mangabakka iti labanyo ken ni Angkuan tapno nasapsapa ti panagplanota!”
Kasla natarimbangon ni Kapitan Enteng. Nakigtot idi sipaten ni Bise Mayor Nixon Peralta ti abagana iti nalag-an.
“Awan danag, bise! Awan danag! Ilampasota daydiay nga agbibisin!” kinuna ni Kapitan Enteng a nangbukbok manen iti basona a pangdismolarna iti riknana iti panangulit-ulit a panangdakamat ti bise iti nagan ti tao a puor ti kararuana.
BINALIWAN da Angkuan ti estatehiada. Gapu iti balakad ni Major Nap Agustino, saandan nga agkarabiyan a mangpasiar kadagiti purok nga agkampania. Immadu met dagiti agtutubo a nangkuyog kadakuada nga agpasiar. Inlimed ni Teniente Charlito ti pannanggandatda a panangraut kenkuana iti pagtaenganna. Ngem naglapayag a talaga ti daga.
Nagpayak ti damag. Adu ti nagdamdamag kenkuana. Ngem saanna nga inamin. Dina kayat a mairaman pay nga agdandanag dagiti kakaduada.
Imbilin ni Angkuan nga agtarusda amin iti balayda iti dayta a malem a malpas ti panagkampaniada. Nagpaparti iti maysa a baboy a pagsasanguanda kadagiti mangkuykuyog kadakuada.
Awan sabali a maisubadna. Dayta laeng ti kabaelanna a pagsubalit iti ayat ken tulongda kenkuana ken iti grupoda.
Nasapa pay ngem kasaganan ti pagsasanguanda iti sumangpetda. Adu ti simmurot kadakuada.
Makaparay-aw iti puso ti naimatangan ni Angkuan a kinaadu ti mangtultulong kadakuada. Mamati pay laeng nga adu kadagiti kalugaranna ti saan a masisirap iti sileng ti pirak. Adun ti nangibaga kenkuana nga awatenda ti iwarwaras ni Kapitan Enteng. Ngem isunto ti bitibitenda.
Madaman ti panaglalangda idi pagammuan ta agiinnuna dagiti ubbing a nagtataray idi mangngegda ti batingting ti sorbetero.
“Siakon ti mangbayad! Ikkam amin dagiti ubbing!” kinuna ni Teniente Charlito nga immasideg iti sorbetero.
(Maituloyto)
