Nobela ni RUDY CONTILLO (Nailathala ito sa Sept. 28 – Oct. 4, 2024 print edition)
(Maika-56 a Paset)
NAGMALANGA ni Angkuan iti impasabet kenkuana a damag ni Lt. Ferdie Corteza. “Sir, ladingitek, ngem ipaidanon ni Major Nap Agustin a saan a nakalasat ni Teniente Charlito,” nababa ngem nabatad ti timek ti opisial. “Nabayag a naka-ICU iti ospital idiay Manila. Ngem saanna a nalasatan dagiti tamana…”
Nagkikinnita da Angkuan ken dagiti kakaduana. Kayatda ti agsao. Ngem agpapadada nga awan ti maarikapda a balikas. Awan ti nakatimek kadakuada, Nabayag a nagari ti ulimek.
Idi mapasubli ni Angkuan ti riknana, kinasaritana dagiti kakaduana. Sinango ida ni Lt. Ferdie Corteza.
“Maawatankayo. Ngem kayatko a maammuanyo nga awan ti aniaman a problemaenyo. Kas kameng ti operatiba, Lt. Charlito is under the care of the agency. The unit, under Major Nap Agustino, will take care of everything,” inlawlawag ni Lt. Ferdie Corteza.
“K-kasanon ti pamilia ni Teniente Charlito, sir?” arig di mangngeg ti timek ni Manang Ellen a mangpumpunas iti panagluasitna. “For their safety and protection, the agency will take care of his family,” kinuna ni Lt. Ferdie Corteza a nangpunas iti tumrem a ling-etna. “Saankayo nga agdanag.”
Nalpay ti abaga ni Angkuan. Kasla nagmanto ti rupa dagiti kakaduana iti kinuna ti opisial. “Mapantayo ngarud idiay Manila. Siak ti makaammo iti lugan. Uray dayta laeng a maitulongko, kakabsat. Intay kitaen ken makipagriknatayo iti napasamak ni Teniente Charlito,” kinuna ni pasado Konsehal Jovito a nangipaid iti dolpona. Lining-et iti nagmanto a damag nga insangpet ni Lt. Ferdie Coteza.
“Wen, masapul a makipagriknatayo iti maudi a gundaway iti gayyemtayo,” impasarunson ni Maestro Pitong a nanglagip iti kinasayaat ni Teniente Charlito.
Nagpatengnga ni Lt. Ferdie Corteza iti ummong. Imasideg dagiti dadduma nga adda iti paraangan a kasla di mamati nga awanen ni Teniente Charlito.
“Kas kiddaw ti asawana, saanen a nagbayag ti masayag. Naipumpon ti bangkay ti Teniente Charito iti Libingan ng mga Bayani a kas retirado a soldado …”
MAYSA a kangrunaan a naragsakan iti panagwaras ti napasamak ken ni Teniente Charlito ni Kapitan Enteng. Kurangna la nga agpabunar daytoy. Sangkasaona a naikkaten ti maysa a siit iti dalanna. Ibilang ti polisia nga unsolved ti kaso ni Teniente Charlito. Awan a pulos ti nakaduktal no asino dagiti nangtambang kenkuana.
Blangko agingga ita dagiti autoridad. Nagngirsi idi malagipna a nalaing met a pumaltog ti teniente. Naitablana ti biagna. Ngem dimmagan ti bangkay ti nakapinnaltogna ngem awan a pulos ti nakabigbig iti kinaasinona. Dayta ti pagbilibanna ken ni Ka Zoilo. Ita, maysa laengen ti nabatbati a bangen iti panagsublina a kapitan.
Ni Angkuan.
Iti panagsaritada ken ni Ka Zoilo, isarunodan a trabahuen dayta nga Angkuan. Agpadada ken ni Ka Zoilo iti pampanunoten. Masapul a nalinis ti panangiwalinda kenkuana tapno awan ti aniaman a pagparikutanda. Makaammon ni Ka Zoilo a mangplano no ania ti aramidenna. Tinudingan ni Kapitan Enteng ni Kagawad Banong a kadua ni Ka Zoilo.
“Siak a mismo ti mangileppas iti dayta nga Angkuan!” kinuna ni Ka Zoilo. “Duakayo ken ni Kagawad Banong!” kinuna ti kapitan iti panagsasaritada.Agparikut ni Kapitan Enteng. Nainget ti panangsipsiputda kenkuana ken ti grupona. Insardengdan a naminpinsan ti panagpaayabda kadagiti tao iti balayda. Saanna a kayat ti maaktuan. Uray dagiti taona, sangkabilinna ti panagannadda.
Ni Mary ita ti ad-adda a maturtoran. Nasumokdan ti social media a pangkontakan kadagiti kampaniaanda. Addan metten dagiti pamuspusan a nasursuro ni Mary a pangipatulodan iti kuarta. Ngem kinuna ti kapitan a nasken nga agan-annad latta aglalo ta rehistradon amin a numero iti selpon.
Adda dagiti sardam a naatap ti ridep ken ni Kapitan Enteng. Nupay ibagbaga dagiti kakaduana a napasublida dagiti immikay a dati a mangsupsuporta kenkuana, seknan latta ti danag. Saanna a kayat ti maabak. Saanna a kayat a maibabain. Ken kangrunaanna, saanna a kayat a mapukaw dagiti pribilehio a kabuybuyog ti kinakapitanna.
Adu ti saan nga ammo dagiti kalugaranna a nasursurona a panglakagan iti kaaddana iti puesto.
Ti laengen pannakayasidegna kadagiti dadakkel ken nabibileg a politiko, dakkel ti naibungana tapno maam-ammo ti kagimongan.
Saanna a nadanon ti agdama a kasasaad ken kinasaliwanwan ti biag no saan a gapu iti panagkapitanna.
Isu a maymaysa ita ti nakaisentruan ti isip ni Kapitan Enteng. No kasano nga ipakni da Ka Zoilo daytoy.
No saanna nga abaken iti butos, nasken ngarud a mapukaw iti daga ti kalabanna.
MASANSAN a mapan ni Major Nap Agustino iti balay da Angkuan. Binalakadanna a rumbeng nga agan-annad.
Adda latta ti maysa a taona a kadua ti polis a mangbambantay kadakuada.
Impakaammo pay ti major a nakapagsaritadan ken ni Major Rex no ania dagiti aramidenda nga addang tapno saanen a maulit ti napasamak ken ni Teniente Charlito.
“Adda impormasion a sika ti isarunoda. Nagalisda a talaga. Natuntonanmin ti hide out ti grupo. Ngem naangotanda.
Sakbay nga ag-raid-kami, nakapanawdan!” panangilawlawag ni Major Nap Agustino.
Kasla nakangeg a tuleng ni Angkuan. Nagkaling-etan. Dimtengen ti nabayag a pagam-amkanna.
Nalawag a nangngeg amin ni Carlota, nga adda laeng iti asidegda, dagiti imbaga ni Major Nap Agustino.
(Maituloyto)
