Nobela ni VILMER V. VILORIA (Nailathala sa BALITANG HILAGA, Aug. 31 – Sept. 6, 2024 print edition)
Maika-11 a paset
BITBIT ni tata Bantor dagiti dinaponna a simmurot ken Misty idi balayda. Namitloda laeng a nagkurba a pakanawan ket nadanondan ti bungalow a balay ni Misty. Simrekda. Indisso ni tata Bantor dagiti iggemna iti suli, asideg ti ruangan.
“Agtugawka kuya Tor.” Ni Misty. Kasla awan aniaman a nagtugaw ni tata Bantor. Inwarasna ti panagkitana iti uneg ti balay. Naurnos ti pannakaidalimanek dagiti ramramit iti uneg malaksid kadagiti ay-ayam ti ubing.
Naisaltek ti matana iti naikuadro a ladawan ti lalaki. Nakauniporme iti puraw a bagayan ti puraw met laeng a kallugongna. Isu ngata daytoy ti asawana kunkuna ni tata Bantor iti nakemna.
“Dito ka na kakain ta magluluto ako.” Impallilit ni Misty. Nagtung-ed laeng ni tata Bantor. Nakatugaw a kasla ubing. Laga-lagaenna dagiti ramayna sa agtantanamitim.
Siniputanna ni Misty iti panagturongna iti kusina. Napatilmon manen ti pannakitana ti sippukel daytoy. Dagiti muldotan ken awanan piglat a gurong.
Inarapaapna la ket ngarud iti kaaddada koma ita idiay ryan cinema, nga agbuybuya iti pelikula ni Phillip Salbadong ken Cris Aquilo.
A mayat ti panaglaga dagiti ramayda, pasaray agpinpineselda iti dakulap. In-inut nga iparabawna ti imana iti napudaw a luppo ni Misty sana pagkarayamen agingga iti tumeng sana isubli iti patingga ti siort-siorts daytoy.
Agingga a kallabayenna sananto bisongen iti pingping ket no saan nga agreklamo, idingpilnan ti kasla namagaanen a bibigna iti naingpis ken nakalamlamuyot a bibig met ni Misty.
Ket iti irururarda iti pagsinean, agtarusdan iti asideg a motel a pangipapasanda iti bara ti bagida ket sangbayenda ti langit.
Uray ket ngatan awan ti bitamina a tilmonenna, dagita a lapana ni Misty maipiduana pay.
Adda kadagita a panagarapaap idi kalbiten ni Misty. Nakigtot la ket ngarud a kasla pay ketdi nabainan. A-a-apay, adi?” nakunana.
“Iluto ko na yung binili mong karne ng baka. Paborito ko din kasi e.” “ay. Uu, uu. Alaem dita supot.” Innguso ni tata Bantor ti ayan ti dinaponna.
Nagsubli iti kusina ni Misty. Nabati latta a nakatugaw ni tata Bantor ngem saannan a mapasubli pay tay ar-arapaapenna itay. Ti kaaddadan ken Misty iti uneg ti nalamiis a kuarto ti motel idiay Aparri.
Nakigtot manen ni tata Bantor idi adda mangkalbit kenkuana nga ubing. “Aniat’ naganmo Lolo?” “Buenaventura. In siort, Bantor and in siort-siort, Tor.” Insungbatna nga umis-isem. Aguppat ngatan ti tawen ti ubing. Babai.
Daytoy ngata ti anak ni Misty kunkunana. Sige lolo ta agay-ayamak pay kinuna ti ubing ket pinanawannan ni tata Bantor.
“Lolo kunana ketdin. Apay lakayak la unayen aya ta lolo awagnan. Tito koma met pay lang a. itabtabaaw ti unegna. Timmakder, napan iti sango ti sarming. Minirana ti rupana, ti bagina.
Inurnosna ti pustorana. Dinilpadilpatanna dagiti bibigna sana insagaysay dagiti ramayna iti narasayen a buokna.
Saanak pay laeng met paudi ken Robin Padilpat a, artistahin a langa ngem nabay-bay-an lang. inngiitna.#
