Nobela ni Vilmer V. Viloria (Nailathala ito sa Oct. 12 – 18, 2024 print edition)
Maika-17 a paset
ITI kapamitlo a nagkiriring ti selponna, sinungbatan met laeng ni tata Bantor. “hilo. Hu is dis?” nagklaat idi maitemkanna ti balasangna. Ni Lisa ti umawawag. Nabayag bassit a nagpatangda iti telepono. Simmublat met ti manugangna a kinatungtongna. Agisem-isem ni tata Bantor kabayatan ti panagsaritada ken Pilo. Inpadamag dagitoy nga agawiddan inton umay a Domingo ket deretsoda kano iti eropuerto ti Tuguegarao.
Saandan nga agpasabat ta aglugan danto kan lattan iti van nga agawid. Uray ta dua a maleta laeng met ken maysa a balikbayan box ti kargada. Inyunay-unay ni Lisa ti panagdalus ni tata Bantor. Wen met a wen ti lakay.
Iti sumuno nga aldaw inpadamagna ken Balong a sumangpeten da ulitegna idi dumagas daytoy bayat iti panagpasadana ta iyawatna ti naglakoanna ti dua a manok. “Por siksti deta tata.” Kuna ni Balong idi yawatna ti kuarta. Immisem ti lakay. Adda manen nagyan ti bolsana uray kaskasano. “Agsublikanto no malem a ta danto met sanguenta.” Inpakamakam ti lakay idi banurborenen ni Balong ti tmx-na nga agpamianan. Nakaisem met nga agtung-tung-ed ni Balong.
Kasla uttot a nakalagip ni tata Bantor. Namles. Insuotna tay na-almidor a 501 a levi’s-na sana inasmangan ti checkered a long sleeve. Intupina iti aginggat’ siko. Nagpuligos iti sangot’ pagattao a sarming.
Pinaswitanna ti bagbagina. Nataerka met gayam Bantor kunkunana. Inpusitsitna tay Arno Sorel a royal black a bangbanglona. sana sinada ni Balong a nagpasentro.
“Ne, tiniram met tay pang JS prom tata.” Inkantiaw ni Balong. Immabay ken Balong iti sango ti center-car. “pounay a banglomon aya.” Inyellek ni Balong. “Tagtagari ta innak agpasiar yan Misty.” Hihi. Kuna ti lakay.
Iti panagpatpataray ni Balong nga agpasentro. Sabali ti sentro ti panunot ni tata Bantor. Kasla makitkitana ti kimmokakola pammagi ni Misty, ti muldotan a legs-na tit i bimmullalayaw a kidayna.
Ti makapabara nga isemna ken makapgurigur pisel-piselna. Inkidem ni tata Bantor ti nagarapaap. “Tor, aginggaka laengen ti arapaap. Awan met magudgudilan, lokdit.”
Kasla ketdin adda nangibaga kenkuana. Nagmulagat. Ne, awan met ti anakihal-it. Kunkunana.
Saanna a napupuotan nga addadan iti sango ti balay ni Misty. Nagdissaag ket kasla nagpayak dagiti sakana a nagturong iti sangot’ ridaw. Nagtoktok. Nagtoktok. Awan met manglukat iti ridaw.
Nalagipna ti selponna. Inawaganna ni Misty ngem saanna a maawagan ta agdisconnect met a dagus.
Pagamoan adda nagsardeng a trisikel. Nasiputanna ni Misty a dimsaag. Naglinged iti vougenvilla a mula iti asideg ti ruangan da Misty. Adda simmaruno a dimsaag. Napuner a lalaki, takder military, pukis military. Ubbana ti anak ni Misty.
Agpigerger ta agpigerger lattan ti tumeng ni tata Bantor. Masapul a diak agpakita kunana iti nakemna. Limmiklik idi umasidegda iti ruangan.
Saanda a makita ta naraber ti masetas. Kasla maki-ay-ayam iti linnemmengan. Linikosna ti puon ti vougenvilla agingga a sintaliaw a timmarengteng a pimmanaw.#
