Nobela ni Vilmer V. Viloria (Nailathala ito sa July 13 – 19, 2024 print edition)
Maika-4 a paset
NAISEM ti balkat a medio baket a simmabat kada tata Bantor ken Balong. Nakahawayan dress, sabongsabongan. Nangatngato ngem lakko ti kakitingna ket kasla naukisan a bawang ti pudaw dagiti luppona a mabalin a pagmalo ti kadadakkelna.
“Kam hir kam hir….inside!” inwagisna iti uneg a kasla ket la agpastreken iti aso. Timmalikoden ken kunam pay aglumban dagiti matada iti panangsiput iti wan istep tri kinikins a pannagna ti balkat.
Makita iti patongna nga adda pay laeng alsemna nupay agsingkuentan ti tawenna.
Immunegda. Nagtugaw ni Barti, siort of Bartola a naganna, iti nalamuyot a sopa. Ngani natilmon ni tata Bantor ti dilana idi makitana ti langit a naabongan ti puraw gapu iti saan ngata met a naigagara a panagkayang sa panagdekuatro ni Barti. “Wat ken I do?” Kunana kadagitoy.
“Por yu.” Kuna met ni tata Bantor sana inyawat ti ig-iggamanna a litson manok.
Gapu ta nabungon iti foil, inagot-angot ni Barti. “Oh, my peborit.” Nakunana iti masinunuona a litson.
“Meling….ipanmo man dita rabaw ti round tebol.” Nakunana iti balasang a nalabit a babaonenna. “Ken mangiruarkanto ti……ania gayam ti kayatyo? Brandy, wiski, o bodka?” kinitana ni tata Bantor a mayaten ti patugawna iti nalamuyot a sopa.
Nagkiremkirem ni tata Bantor a kunamlan agpanpanunot. “Eniting may do senora.” Kunana idi agangay kagiddan iti pangibettakna ti isemna. “but empolayt is better.” Sana impasaruno.
“Mangiruarka ti soda dita rep ken tay malunggay pandesal a ginatangko itay bigat. Ipanmod ‘toy, darasem.” Inmandarna ken Meling. Madamada agmirienda idi agtimek manen ni Barti. “Umaykayo ngata makisarabo aya. Di kad sika ni Balong, tay kanakan ni Pilo.? Kinitana ni Balong. “uwen nana.” Insungbat met ni Balong.
“Ket daytoy nataraki a kaduam, sino met?
“Ay, ni tata Bantor nana. Umaykan agpasiar. Balo a taga Alcala, manugangna ni Pilo.” Pinagsasarunon ni Balong.
“Saanak nga agpapasiar, awan pay tumawen daydi patpatgek a lakayko.” Agsaibbek ta agsaibbek metten ni Barti. Pinunasna ti luana iti gayadan ti badona ket naipullat iti panagkita da tata Bantor ken Balong ti tri layers a boksitna ken ti XXL ket ngatan nga abbong ti langit. “Ngem kayatko latta met ti makigayyem.”
“Umaykayo latta no kua ditoy balay tapno adda kapatpatangko.” Nakunana idi agangay.#
