Nobela ni Vilmer V. Viloria (Nailathala ito sa July 6 – 12, 2024 print edition)
Maika-3 a paset
NANGRUGI iti babassit a sinnipat ti dalluyon-baybay ken dalluyon-karayan iti sabangan, agingga a pumigpigsa, rumungrungsot ti pinnalpi dagiti dalluyon apgad ken tamnay ket nagparnuay ti labutabat. Iti apagdarikmat, nagkalma ket kasla sunggo a mapuypuyupoy ti angin amian a naituglep iti agpipiapi a sanga ti duoganen a narra.
Linidlid ni Tata Bantor dagiti matana, nasdaaw ta napintas a kuarto ti ayanna.
Nagtingngaag ket nakitana ni Barty a kasla natebba a saba, nakadurkayang nupay ti la rupana ti saan a naabungan ti napuskol nga ules-abel iloko. Dinarasna a tinaray ti ayan dagiti pagan-anayna. Ballikid ti kansonsilio iti panangisuotna ngem saannan a binaliwan. Nagsiort sa nagbado ket inin-inayadnan ti rimuar.
Agsagsasgawisiw a dimmannon iti balay da Pilo. Awan pay kaduana ta nasapa pay. Dinarasna ti namisok. Tumiliwak man kiddi ti pamusian, kunkunana itay masindiannan ti gasul a nangisaanganna ti apuyenna.
Rimuar nga iggemnan ti de bomba nga eskopetana. Nangiwarsi ti nabegbeg a mais. Kunam pay agsasarunon dagiti netib a manok a mapan mangan.
Binalaanna ti eskopeta, inkasa, nupay arigna indeppelen, sinringna pay laeng. “Bang”! nalusdoyen ti lumabaga a pamusian.
Rinapitna ti dua a saka, puon payyak ken ti ulo ti manok iti maysa nga imana sana nginurungor.
Kabayatan ti panangur-urayna kada Pilo ken Lisa, tineksna ni Amboy ta agpagatang ti RH pia la a bekkelenda ta pulotanenda ti inlasinna a naguneg ti manok.
“Naisemka met Tata.” Inkantiaw ni Amboy. Kabayatan nga lukutanna ti saggaysada a bote.
“Kalkalpasko a nagsangat ti pakayang.” Inlangsot met ni tata Bantor. ‘Ni Misty?”
“Ni Barty.” Ket nagkatkatawadan.
Sagduduada pay laeng a bote ti nalidok ken Amboy ifi sumangpet dagiti agassawa a kaduada ni Dayunior. Namalmanda ta naggapuda idiay siudad a naggatanganda kadagiti masapsapulda ta asideg manen ti panagseserrek.
Grade 1 ton ni Dayunior. “Tang, nakalutokan?” ni teacher Lisa.
“Wen nakkong”. Insangbatna.
Nagidasar ni teacher Lisa ket naragsakda a nangrabii.
Nakipangrabii metten ni Amboy.#
