Nobela ni Vilmer V. Viloria (Nailathala ito sa July 29 – July 5, 2024 print edition)
Maika-2 a paset
SAAN a sumina iti panunot ni Tata Bantor ti sinnutilda itay ken Misty. Kineddel pay ni Misty ti siketna itay pakarawaanna ti dua a dilaw ket immaklili a nangitulod iti ruangan ti balayda. A tiniliwna met ti imana sana piniselpisel. Ngem nagpatingga laeng ti kasta ta sumangpet metten ni Amboy sakay ti motorela nga inuggorna ta madi ti bagbagi ni Balong nga akinkukua.
Agsublinto kan ton Domingo ta agluto kano ni Misty ti bulalo ken agaramid ti kappukan. Uray ta adda met pay ululsanna a layaw nga inikkanna ti pasas, aginumdanto kano a dua. Awanto tay anak ni Misty ta mapanto kan idiay aynda lolana idiay barrio.
Adu dagiti agay-ayam iti panunot ni Tata Bantor, dagiti aramidenna kalpas a malidokda ti layaw. A tiansanan a mangipatungpal kadagitoy. Nga irurarnanton ti bara ti pus-ongna ket agpapas iti pakabuklanna. Hay apo, ket Mierkoles pay lang nakunana. Nairidepna ti panagar-arapaapna.
LINUKTAN ni Barty ti ridaw idi adda agtuktok. Nasdaaw idi makitana ni Tata Bantor a naka-isputing. “Ania a dakes nga angin ti nangipalladaw kenka ditoy?” Nakangato ti maysa a kiday ni Barty a nagsaludsod. “ A a a a…umayka koma a pasiaren.” Kinuna ti Tata Bantor.
“Ala, ala, come in. Come in Bantor.” Kinuna met laeng ni Barty kalpasan a makitana ti langa ni Bantor a kasla nakuturan a piek iti pasabatna a saludsod. “Sitdown, sitdown.”
Situtulnog a nagtugaw ni Tata Bantor. “Ania ti maipaayko?’ kinuna manen ni Barty kabayatan ti pananglukatna ti frigidir a nangalaanna ti paris a soda. “Umayka laeng pasiaren met a.” insungbat ni Tata Bantor. Ket nalagip ni Tata Bantor ti pinangseppegna idi ken Barty ket nagpagusto met ti balo.
Ket saandan a nakateppel ket sinang-atda ti bantay nga umanal-al agingga a madanonda ti ruangan ti langit ket naggiddanda a narikna ti ragsakda a simrek.
“Hoy! Kumustakan?” ni Barty. Isu pay laeng ti pannakasinga ti pananglaglagip ni Tata Bantor kadagidi kanito a nagsanguanda nga inimas ti ramen ti nainlasagan a ragsak. “Ay, hehehe. Okke laeng met Barty.” “Nalasbangka latta.” Pinasabluganna ti balo. Mangigis met ti isem ni Bartrty iti nangegna. “Kasta lang no adda kuarta nga igatang ti pagpapintas.” Impannakelna met.
Inipigna ni Barty iti sofa a nagtugawanda sabay isgup ti kafe barako. umis-isem met ni Barty. Saanen a mateppelan ni Bantor ti barana. nagkarayamen ti kanawan nga imana kadagiti nababaked ken immantatadon a luppo ni Barty. nakakedemen daytoy. agingga a makangeg laengen iti anil-il ti malammin nga uken ni Bantor.#
