Nobela ni VILMER V. VILORIA (Nailathala ito sa Sept. 21 – 27, 2024 print edition)
Maika-14 a paset
“NO kayatmo Barti, imasahek saan laeng nga iti ima ken saka.” Inkarit ni tata Bantor kabayatan nga parparittuokenna dagiti ramay ni Barti. Immisem ti baket, agtung-tung-ed a nakakidem. “Kayatko dayta.” Kinunana.
Adda met ket pamalpalatpatan ni tata Bantor no kasano ti agmasahe. Agin-intuod ngamin no kua no kasta a masmasahien ti barbero no kasta a mapan agpapukis.
Ti panangparituok ti muging ken ti panaguni ti ramay no kasta a bugbogenda ti bukot.
Panangkaut ti nagbaetan ti mata sa itarapnos iti muging, medio panangpungot ti buok santo mairidis bassit iti teltel, tengnged ken bukot. Maulit-ulit a kasdiay.
Sananto isaruno ti takkiag, gutadgutak, lali-lali kada guyod-guyod ken ritrittuok ti ramay.
Iyudina ti dua a saka. Pananglali manen kadagiti luppo, ilot iti ngatoen ti pingping ti ubet ken panangramas-pisel iti sellang a babaen ti maab-abbongan agingga iti lakko, ti butoy panangrituok kadagiti ramay ti aka. Panangtuktok iti tengnga ti dapan.
“Ana ti kayatmo Barti, Lotion, lana wenno polbo?” “sika ti makaammon. Lotion no kua ti us-usaren diay agmasmasahe kaniak.” Insungbat ni Barti.
“Oke…oke… inka ngad agshoweren wenno agdigus ta madi ti agdigus kalpasan ti masahe.” Ni tata Bantor. Nagtulnog met ti balo, nagdardaras a napan iti banyo tapno agdigus nga umuna sakbay ti masahe. Inyuldag met ni tata Bantor iti sillion. Inkidemna ti aguray.
Maalanan ti tuturoganna idi kalbiten ni Barti a nakabidang laeng ti dakkel a tualla. Naangotna ti angot shampoo ket simmanikar ti riknana.
“I’m redi.” Kinuna ni Barti. “idiayta kuarto ta uray maiturogko ket ok latta.” Intuloyna. Siniputanna ti panagkinni-kinni ni Barti a simrek iti kuartona.
Linidlid ni tata Bantor ti matana ta kasla tagainepna laeng ti mapaspasamak. Nagkiremkirem. Kineddel-keddelna pay ti pingpingna. Ne, saan met.
Siririingak met. Nakunana iti nakemna. Timmakder, ngem naklaat iti makangeg ti ungor ti motorsiklo. Masiguradona, da Balong dagiti simmangpet.#
