Nobela ni VILMER V. VILORIA (Nailathala ito sa Sept. 14 – 21, 2024 print edition)
Maika-13 a paset
SUMIPNGETEN idi makalagip ni tata Bantor nga agpalaud. Bitbitna tay ginatangna a pizza ta mapanna pasiaren ni Barti.
Saannan nga inayaban ni Balong ta isu kan pay nga istorbo ta bareng kano no mapalamiisna ti nakabarbara a riknana ‘nipod naggaput’ balay da Misty.
Saan ngamin a makaidna iti balay da Pilo, pasaray agsillion, to no kuan mapan agkaykay, iruar ken iparadana ti motorsiklo ken agtugtugaw a nakamulengleng.
Kabayatan ti pannagnana, ararapaapenna ti nalamuyot a medio balkat a bagi ni Barti. Ti kimmampuso a rupana, ti pamuskulen a bibigna, tri layers a bilbilna, Dismularen la ngamin ti tayag ken pudawna. Ti kayatan ni tata Bantor ket ti ilelennek ti matana no agkatawa isu a kayatanna a pagkatawaen.
Problema ita ni tata Bantor no kasano nga istrok ti pamay-anna iti katulong ni Barti tapno masolona dagiti kanitoda.
Ana ngata no baonek idiay ili, ayabak ni Balong ta kampay idi adda mapanda gatangen? Maysa oras met no kuan sadanto makasubli.
Wenno kunyaanna ni Balong nga ibaybayagda ta baka mabayag ti panagungar ti tarakenna gapu ta medio duoganen. Aglalabbet dagita iti panunotna.
“tok tok tok!” addan iti sango ti ridaw da Barti ni tata Bantor. “Meling kitaem man diay agtoktoktok ta ridaw.” Mandar ti nasinggit a boses ni Barti. Naglukat ti ridaw.
“Oh, Buenaventura! Nakapasiarka met. Dumanon….dumanon.” timmakder iti sillion ni Barti a nangsabat ken tata Bantor. Nagbeso-besoda. Inridiid la ket ngarud ti tata Bantor ti pingpingna iti nalamuyot ken nalukneng a pingping ni Barti.
Urayla nakigtot ta naduyok daytoy kadagiti saggaysa a barbas ni tata Bantor. Namrayanna laengen ti imlek ket nagsubli iti sillion-na. “hab a sit…en wat is dat?” inngusona ti bitbit ni tata Bantor. “Pizza por yu my dir.” Insungbat met ni tata Bantor.
“Kadtoy balay da Barti…darsem.” Message sent. Tittit…tittit… “insigida senior.” sungbat ti teksna.
Awan pay lima minute, bumanurboren tic enter car ni Balong. Nagparada iti asideg ti kongkreto nga alad ti balay ni Barti. Simrek ni Balong iti uneg.
“Barti, baonenta ni Meling a kadua ni Balong a mapan gumatang ti ice crem idiay ili ta agayskrimtayo man aya.” Ni tata Bantor. “oysss….my favourite. Op korz op korz.” Naragsak a sungbat ni Barti.
Apagpanaw dagiti dua, inasitgan a dagus ni tata Bantor ni Barti iti sillion-na. inyabayna ti tugawna a monoblock.
Nakaisem. Iniggamanna ti ima ti balo. Piniselpiselna.
Inkidem met ni Barti. “Kasta man Bantor, masahem man dagita ramay ken takkiagko.
Nabayagen a dik nakapagpamasahe.” Kinuna ni Barti.
Tiempo mon Bantor, bukodyon ti kanito. Aramatemon ti laingmo. Kasla adda nagkuna ken tata Bantor.
“Iramanmo payen dagita sakak nga imasahe kuya.” inlambingna sana ingato a pakayang dagiti sakana iti paima ti sillion.#
