Nobela ni VILMER V. VILORIA (Nailathala sa BALITANG HILAGA, Sept. 7 – 13, 2024 print edition)
Maika-12 a paset
INIMAS dagiti agina ti nakisango a nangaldaw ken tata Bantor. Mayat ti lukneng ti laoya a baka a nasagpawan ti sayote. Bumanurbor ti panagkaldo ni Misty iti inikkanna a tasa ti pagkapean. Naayatan met a nagkammet ti ubing nga anak ni Misty.
Kasla met pusa a namikki ti pannangan ni tata Bantor ta sipsiputanna dagiti agina. Pasaray taldiapanna ti napudaw a barukong ni Misty ta kasla saanen a makaanges ti namsek nga inabbongan ti bra-na.
Pagsasarunoen no kua ni tata Bantor ti agtilmon. Nasiputan ni Misty a mingmingminganna ti barukongna ket apagapaman nga inligsay daytoy ti law-law a blouse-na. nadlaw met ni tata Bantor ket ad-addan a madi makapangan. Alimbasagenen, aglingling-eten nupay napigsa met ti werret ti bentilador nga adda iti sikiganna.
Immuna a nalpas ni tata Bantor. Timmakder tapno turongenna ti paginuman. “Kuha ka na lang sa ref kuya.” Ni Misty. Tinurongna ti ref. Linuktanna. Imminom.
Kalpasanna, tinurongna ti silion nga adda iti sango ti telebision. Nagtugaw sana medio inyilad. Inngato ti sakana. “Nasa tabi mo yung remote ng tv kuya. Buksan mo lang kung gusto mo manood.”
Nupay saanna koma kayat ti agbuya, linuktanna latta ti tv. Ngem awan iti panunotna ti mabuya. Naitiempo la ket ngarud ti pangaldaw a programa ti telebision. Madama nga aggarampang ti host actor a bakla. Sarampiting, naitanamitimna.
Agasem met ti buybuyaenna ket agsalasala ti actor, agisplit kada agkugtakugtar sa kasla agmodmodel a magnamagna nga agkinkinikin. “pwi.” Nakuna ket la ngarud ni tata Bantor.
“Ay si aydol….mommy oh.” Ket timpuaken ti ubing iti tugawna a mangmangan ket tuladennan ti sala ti host aktor a bakla. Maay-ayatan met ni Misty iti ar-aramiden ti anakna.
Agisplit met daytoy ken magna a kasla modelo a kumpleto kinikin. Agpalpalakpak ni Misty ket nairayo metten nga agpalpalakpak ni tata Bantor.
Agin-innaw ni Misty idi asitgan ni tata Bantor. “Thank you for the lunch.”
Kinunana kagiddan ti panangkallabayna iti daytoy.
“Sige, umaykanto manen a kuya Tor, basta agbalonka a hihi.” Insungbat ni Misty. “dyok ko lang.” insarunona.
Gapu ta saan nga inwadag ni Misty ni tata Bantor iti panangkallabayna, indennesnan ti bagina.
Nasay-opna manen ti banglo ni Misty ket rumkuas ta rumkuas lattan ni dayunior.Inyirutna ti ikakallabayna. Arakupemon, tiansam daytan tata, kasla adda nagkuna ken tata Bantor ngem sakbay a maarakupna ni Misty, nakaruk-aten daytoy ket tinurongna ti punas a nakabitin iti ref.
“Anak, paalis na si kuya Tor.” Inawaganna ti anakna.
Timmaray met a napan iti ayanda manipud iti sango ti telebision ti ubing. “Bye lolo Tor.
Come agen.” Sana ginuyod ti ima ni tata Bantor sa nagbless.
Gapu itoy, kinaut ni tata Bantor ti bulsana ket inruarna ti ammona a beinte pisos a pinapel sana inyawat iti ubing.
Naladawen idi makitana a sangagasut gayam ti naiyawatna. “Patuloyekon adi.”
Kinunana ket rimuaren iti uneg ti balay ni Misty. Nupay naliday a nagawid saan a napukawan ti namnama ni tata Bantor.
Addanto latta wayana a mangragpat ti langit ni Misty. Tay agguduada iti imas ti mansanas.
Tay kasla iti mabuybuyana iti minanga a panagpallot ti allon-tamnay ken allon-baybay a mangparnuay iti labutab a kayatan a sikmawen dagiti babassit nga ikan.#
