Nobela ni VILMER V. VILORIA (Nailathala sa BALITANG HILAGA, Aug. 24 – 30, 2024 print edition)
Maika-10 a paset
KASLA matat’ kali nga agsapsapul iti piek a sippayotenna ti panagsiput ni tata Bantor iti paradaan ti jeep nga agpa-Aparri. Itay pay laeng nga agur-uray ken Misty. Tulagda ngamin iti agpa-Aparri ita ta mapanda agbuya ti sine. Agmaysa oras ngatan a nakatugaw iti nababa a semento nga alad ti rizal park. No kuan kitaenna ti selponna. Itay pay a teks a teks ni tata Bantor ngem pulos nga awan maawatna a teksbak.
Kinitana ti oras iti solex a relona, kinse minutos sakbay ti alas dies. Naawananen ti namnama. Timmakder, napan iti puesto ni lakay Odiong, gimmatang ti karnet’ baka a panglaoya ta naibusen ti lasag ken lomo a pangkappukan koma.
“Ne naladawka man ita tata Bantor.” Nakuna ni lakay Odiong. “Nasapaak a nagudong, naladawak laeng nga immay immuraga.” Naliday a sungbatna. Ngani la ket ngarud naipugso ni lakay Odiong ti ngalngalngalenna a mama. “sige innak pay.”
Agturong koman iti paradaan ti motorela idi malagipna ti mapan gumatang ti tinapay a kayatan ni Barti. Igatangak man laengen tay paggugustona ta innakto la pasiarenen damdama kunkunana. Tinarengtengnan ti dalan nga agpaamian, sintalliaw a nakamumareg.
Bayadanna laengen dagiti ginatanga idi adda mangkuddot kenkuana iti nakapinpino. Tinaliawna, ni Misty. Naipasabet ti banglo ti naglaok a siampo ken imported ket ngata a bangbanglo. Naka sleeveless ken kimmepkep a pansot.
“Alla, kuya Tor, sori diak nakteks ta ninakaw selponko.”
Kinuna ni Misty a nakaiggem iti takkiag ni tata Bantor.
Nagdalagudog manen ti barukong ni Bantor, aglalo idi makitana ti aglalanay a mata ni Misty a kunam la no agpakpakaasi. Ingngusona ti suli a lamisaan tapno agtugawda. Nagsubli a nagorder ti mirienda ni tata Bantor.
Nalipatanna ngata ti tulagmi nga agpa-Aparri kunkuna ni tata Bantor iti unegna. Kasla awan ngamin gargaraw ni Misty iti obserbasionna. A kasla nairana laeng a nagkitada iti paggatangan ti tinapay. Nagsubli a bitbitna ti saggaysada nga pandan shake ken tay special pork hopia. “d..di ba adda usapanta ta ngayon?”
Kinunana idi makatugaw. “ Na ano?” sungbat ni Misty. “Na mapanta sa Aparri, sa sine ba.?” ni Tor. “ay, uu gayam kuya Tor. Nalipatanko.”
Nadlawna ti siudot ni tata Bantor. Timmakder sa napan immabay iti lakay. “sori ha Tor, neks time na lang kasi ala kadua anakko bahay. At saka…… saanna a naituloy. Limmiday ti langa ni Misty, a kasla la ket bagkatnan ti intero a lubong.
Inipig met ni tata Bantor idi madlawna ti liday ti kadaytna. “apay, addan sa met problemam?” inyarasaasna. “oo, pinasok kami ng magnanakaw, kinuha yung selpon, pera at iba pang gamit sa bahay.” Insungbat ni Misty.
Agsangsangiten. Pinunas ni tata Bantor iti dakulpna dagiti tumtumrem a luana.
Nangkaot ti dua a nagtapaya sana inpapeptpet. “O, makakatulong kenka yaan.
Neks taym na tayo magbuya ng sine. Ok nak lang met.” Ni tata Bantor.Inawat met ni Misty ti inpapetpetna sana inkabil iti bassit a bag-na. “Hatid mo ako sa bahay para alam mo bahay ko.” Kinuna ni Misty idi agangay.#
