Nobela ni Vilmer V. Viloria (Nailathala ito sa Aug. 17 – 23, 2024 print edition)
Maika-9 a paset
“MAKABANNOG met gayamen ti agbiahe.” Kinuna ni tata Bantor ken Balong idi addadan iti sirok ti duogan a kaimito. Nakaliad iti butaka a nakabekkel iti nailata a redhors ni tata Bantor. Mayat met ti patugaw-sadot(nakangato dagiti sakana) ni Balong a kunam la no nawaw a pitupit ti panagyangadna iti iggemna a beer. Mani ti pidutpidotenna a pulotan. Ti mani a labus a ginatang ni Barti idiay brikston mol.
“Adda met pay lang alsem ni manang Barti aya tata.” Kinuna ni Balong idi agangay. Umis-isem latta met ni tata Bantor. “Ken nasigklat ka yuz. Agasem ta binisongmo idiay brikston ket nagadu a tao a nakakita.” Innayonna. “kasdiay ti diskarte Balong.” Insungbat ti lakay. “No makitam a ti kalaban ket awanan gaway, isu ti panangatakem. Diskarte military ba!” inlastogna. “cheers!!! To dat tata. Kukuamon ni manang Barti.”
Ket intim-og ni Balong ti iggemna a canned beer iti iggem met ni tata Bantor sabay tangad to da max. idi idissoda ti iggemda, awanen ti nagyanna. Napan manen simmakdo idiay ref ni Balong.
Nalagip ni tata Bantor diay tulagda ken Misty inton bigat. Domingo gayam, nakunana. Nomuna ta saan a nakadaw-as idiay parmasia itay ti bitamina a pagpatibker. Naibus kano met ngaminen diay inyawat ti gayyem ni bokal dilmer a ni bokal pagur-urayan.
Kasano ngatan no mapasubo inton bigat? Baka katawaanto laeng ni seksi Misty, anonoy…..”bwahahaha. awan met gayam pammael-mo.” Kunkunananto iti likodam tata Bantor. Kasla adda mangkankantiaw kenkuana.
Adda napanunotna nga istrok. Inton bigat, kabayatan ti panagbuyada, aglibasto a mapan iti botika. Ipambarnanto a mapan la ag-cr. Rumuar santo agtraysikel a mapan. Pagurayennanton ti tri-c tapno makasubli a dagus.
“Hi Misty baby….wat taym tayo kita bukas?” message sent. Limmidok, limmidok pay. Naibusnan ti maikadua a beer ngem awan pay sungbat ni Misty. “aglutoka kadaytay de lata dita nga insangpetta.” Kinunana ken Balong a madama nga agluto ti pangrabiida. ‘tay naadat a sardinas ta laokanta ti uggot kamotit.” Impigsana ti timekna. Tinaliawna ti selponna, awan pay.
“Musta na u, okay lang me.” Message sent.
Awan latta met sungbat ni Misty. Baka awan ti loadna kunkunana. No asideg la koma ti paglodan, mapanna koma palodan tapno makasungbat.
Agingga a naiturturogen ni tata Bantor ti kauuray ti teksbak ni Misty. Imbes a nakaisem koma a maturog ta naka-iskor ken Barti, saan ta kasla saan a maidrowing ti langana a naguldag lattan iti sopa.
Inyabayna ti selponna iti lapayagna tapno mangegna no adda agteks.
Kasta ti langana a pinanawan ni Balong.#
