Nobela ni Vilmer V. Viloria (Nailathala ito sa Aug. 3 – 9, 2024 print edition)
Maika-7 a paset
HUWEBES, nagudong manen ni tata Bantor. Bareng laeng makitak ni Misty kunkunana idi agtartarayen ti center car ni Balong iti likka-likkaong a dalan a rumuar iti kabesera. Pasaray maitoktok ti pispisna iti side-rang ti lugan no kasta a mailikkaong. Madamada ngamin a konkretoen ti maysa a pingir ti dalan nga agpa-ili.
Nagtarusda iti groseria, sa iti paggatangan ti karne. Napan manen iti bakers percent tapno gumatang iti pandesal. Naimasanna ngain di inpamirienda ni Barti kadakuada a marunggay pandi. Nagestambay idiay ni tata Bantor bareng mapan met gumatang ni Misty ti paboritona a tinapay.
Nagtugaw iti suli, nagorder ti sop drinks. Umuna pay laeng a susopna iti istraw idi mapasungadanna ni Misty. Naka-hanging blouse ken siort-siort. Makita ti sippukel ti luppona ken ti muldotan a gurongna. Inpadumogna ti kipisna tapno di sigud a mailasin ti sumungad.
“ehem…ehem.” Nagsig-am kampay idi ni tata Bantor. Isu met ti itataliaw ni Misty.
“uy, ikaw pala kuya Tor.” Kimmalawikiw nga immasideg. “pede me order din?” insungona ti mirienda.
“Op korz, op korz.” Siaalisto ni tata bantor a simmungbat. Isu pay ketdin ti napan nangala ti mango juice iti dakkel a rep iti bangir a suli ken ti naimas ti langana a kasla cake. Indasarna ken Misty iti lamisaanda.
Nabayag ti tungtonganda. Pasaray tiliwen ni tata Bantor dagiti dakulap ni Misty.
Saan met nga ipaidam diay maysa no di ket makipinnetpet met.
Tinulagda ngarud iti ipapanda panagbuya ti sine idiay Ryan inton sumuno a Domingo.
Agkitada lattan iti paradaan ti jeep tapno saan unay a madmadlaw ti panagkuyogda.
Kasla awan lasong dagiti kalsada ti panagrikna ni tata Bantor kadayta a panagawidda ken a ragsak ti maymaysa a pasaherona.
Apagdanonda iti balay da Pilo ken Teacher Lisa “YESSSS” naipukkaw ti lakay iti ididissaagna sabay rapido a danod iti angin.#
