Nobela ni Vilmer V. Viloria (Nailathala ito sa July 27 – Aug. 2, 2024 print edition)
Maika-6 a paset
“HI MISTY, di is Tor, can we be friends?” message sent. Tallo orasen manipud itay maitextna ngem awan pay met sungbat ni Misty. Siguro makumikom ta bigbigat pay laeng kunkuna ni tataBantor iti bagina ket saannan nga inuray pay ti teksbak ni Misty.
Namrayanna ti nagdalus iti arubayan pia la a pangwatwatanna ta ne saanen a napuner ta dumakkelen ti bagina. Agbussoten. Nagpunaspunas pay kadagiti tokador, tawtawa, iti kusina ken uray payen iti banio. Di na nadlaw a pasado alas dose gayamen ti aldaw.
Saanen a nagluto ta adda met kilabban a kanenna ken maysa a prito nga itlog ken nakelnat nga uggot ti kamotit a sidana. Adda latta met lebbenna iti ref a gatas nga isu ti inumenna iti kada bigat. Pangpapintas kan ngamin ti kudil ti fresh a gatas a gatgatangenna iti groseria.
Nagpasada met ni Balong a sidekikna. Nagitulod kadagiti ubbing nga agbasa. Mamitlo nga agsubli iti bigat a mapmapno uray ti tuktok tic enter car-na. kastanto manen iti malem. Napigsa ketdi a sapulna ket matarakenna met ti balo nga asawana ken ti dua a siumanna a madama met nga agbasbasa.
Ni pay Balong ti makaammo kadagiti dingo da Pilo ken Lisa.
Nawadwaden dagiti baka, kabalio, kalding ken peking duck iti pasto ni Pilo. Nagatangda man ngaminen ti dulonda a turod nga adda nabiag nga ubbog iti pusegna. “titittit titit titittit….” Naguni ti selpon ni tata Bantor nga inparabawna iti lamesita. Tinarayna a kinita ti teks. “ Hi, Tor. Sorry di ko agad nabasa teks mo. Oo naman, we can be friends. Musta?” teks ni Misty. Nabang-aran ni Bantor iti nabasana.
Manen, addaytan dagiti agkikinnamat a kabalio iti barukongna. Madlaw a magagaran uray.
“Pwede ba tayong magkita, mag-isnak lang sa Criseldas.” Inteksbackna. Message sending failed. Inulitna, kaskadi a message sending failed. Anak ti buyawat’ toy a selponen. Ita pay a maawanan ti lod. Nomuna ta adayo ti paglodan ditoy. Nakunana.
“titittit….titit…titittit…” adda manen teks ni Misty. “Tor, please call na lang. last lod ko na to.”
“Salbag, awan pay pagtekskon, adda ket ngarud pagtawagkon.” Ninanattoy a selpon ta ita pay nga agpugrot. Intanabutogna. Rimuar ket agturongen iti tianggi ni nana Caring iti abagatan tapno agpalod.
Apagdanonna nakitana ti karatula, “awan ti load…naibusan. Susmariahosep…kasanottan?
Nagpaamianan iti tianggi ni lilo Immo. Pagpiaanna, adda. Nagpalod ti singkuenta sana in-unli. Agaw-awid pay laeng, umaw-awagen ken Misty…..”the subscriber cannot be reach.” Kasta met ti sungbat iti bangir a linia. Inulitna, kaskasdi. Tineksna.
Rabiin ngem awan pay sungbat ti teksna. Napan iti ref ket pinidotna ti dua a botelia ti redhors nupay id-idiannan ti lumidok, apagbiit laeng nga intangadtangadna. Idi kuan, bumanurboren ti urokna.#
