Nobela ni Vilmer V. Viloria (Nailathala ito sa July 20 – 26, 2024 print edition)
Maika-5 a Paset
NASAPA a dinagas ni Balong ni tata Bantor iti dayta a bigat ti Domingo. Nagudongda ta aldaw ti dapon.
Nagderetsoda iti ayan ti puesto ni tata Ojong, ti agparparti ti nuang ken baka no kasta a dapon. Adda nailasin a lomo ken dalem a para kaniada. Agdua kilo ngata ti timbangna. Binayadan a dagus ni tata Bantor. Gasem ta dies mil ti alawansna iti makabulan a panagbantayna iti balay da Pilo ken Lisa kabayatan a dagitoy ket adda iti abroad a nagbakasion.
Dua domingo pay sakbay a sumangpet dagiti agassawa. Adda pay nabati a sais mil iti kuartana isu.
Gimmatangda pay iti sangagalon nga ice cream ken naimas a tinapay ti bakers percent. Addanto miriendata inton malem kunkuna ni tata Bantor. Rumuardan iti bakers percent idi adda madungpar ni tata Bantor a balasang, naibatanna ti ginatangna a tinapay. Pidutenna koma ngem inunaan ti nadungparna. Nailabeg ni tata Bantor iti nakitana. Puon ti dua a dadakkel a bantay a natakkaban umamarilio a tela.
Sakbay a maladaw, “so…so…sorry adding balasang. Saanko nga ingagara” patigerger a naisawang ni tata Bantor.
“Awan aniamanna manong.” impallilit ti nakaisem a balasang. Nakarikna ti naidumduma ni tata Bantor. Kasla adda aglulumba a kabalio iti barukongna. Inalistoanna nga inyawat ti imana tapno iyalamanona ti agdawat ti dispensa.
Inawat met a dagus ti balasang ket nakaisem a nakidinnakulap iti nairut. “Naimpusoan a dispensar ti dawatko adingko a napintas. Siak ni Tor, taga Alcala. Immayak laeng nagpasiar ditoy nadaeg a lugaryo.”
“Ok laeng kuya. Ako naman Misty, taga Bicol pero nakaasawa ditoy. Seaman ti asawako dati pero nawala na lang idi nabalitang lumubog yung barko nila.
Dalawang taon na ang nakaraan.” Limmiday ti langa ni Misty. Saanda pay a naginnibbet iti ima. Nakadlaw ni Misty ket in-inot a ginuyodna ti imana.
Kinaot ni tata Bantor ti bolsana ket inruarna ti 3210 a selponna. Daytoy ti pinakamoderno idi a klase ti selpon. “Mabalin a maala ti numbermo?” ni tata Bantor. “Wen a kuya, yun lang pala. 0915 576 7774.” Sige kuya ket awan kadua ni Cristy idiay balay.”
“Ok, tawagan na lang kita.” Kuna met ni tata Bantor a pagallapayag ti isemna. Sipsiputan met ni Balong ni tata Bantor manipud iti center car-na a nakaparada iti saan unay nga adayo. Apaglugan ni tata Bantor, pinatarayen ni Balong ti luganna. Duada laeng iti lugan ket insiwetdan a nagawid idiay barrio.
AGIWIWADAN iti lomo idi ibida ni tata Bantor ni Misty a naam-ammona itay iday ili.Nupay nakita met ni Balong ti napasamak, nagindidi-ammo met ket dinengngegna dagit estoria ti lakay. Umis-isem nga agdengdenggeg.
“Gurka ta awagak man ketdi.” kinuna ti lakay. Kiriring…..kiriring…..kiriring….. ”helo hu is dis?” timek ti ubing. Salbag! Nakunana ket iniddepnan ti selponna.#
