Nobela ni VILMER V. VILORIA (Nailathala ito sa Sept. 28 – Oct. 4, 2024 print edition)
Maika-15 a paset
NALAYLAY a naminpinsan dagiti plano ni tata Bantor. Permi a ngayemngemna ken Balong iti insigida a panagsublida. Saanna ngamin a naibaga nga ibaybayagda ti mapan gumatang. Napanna linuktan ti ridaw. Sinabatna a dinusag ni Balong. “Apay a nagdaraskayo.” Inridisna nga inyarasaas. Iniseman laeng ni Balong.
“Maam, addakamin.” Kinuna met ni Meling. “inka kitaen ta adda ni maam-mo idiay kuartona.” Ni tata Bantor ti simmungbat.
Indisso ni Meling dagiti bitbitna a mirienda iti lamisaan sa napan iti kuarto. Nagtoktok. Idi awan mangilukat, inin-inotna a linuktan ti ridaw. Naibaskag ti nakapakleb a pamalkaten a bagi ti amona. Lamu-lamo a ti laeng nadusol a patongna ti naabbongan ti bassit a tualla. Isarana koman ti ridaw iti agareng-eng ni Barti. “maykan Bantor, nakasaganaakon.”
Paarasaas a simngaw kadagiti bibigna. Saanen a naisara ni Meling ti ridaw ti kuarto ket nagsubli iti sala tapno ayabanna ni tata Bantor. “Por dios, tata Bantor inka kan idiay kuarto ni madam.” Ni Meling.
Nakigtot ni tata Bantor iti nangegna ken Meling. “Inkan tata.” Padurog met a kinuna ni Balong. “siakon ti makaamo ken Meling.” Innayonna.
Agtigerger ket agtigerger lattan dagiti tumeng ni tata Bantor. Saanna metten a maakkal ti bagina iti sillion a nagtugawanna.
Agkalinduosan payen. Imbes a tumakder, inyiladna ketdi iti sillion. Ikidemna bareng maalana ti umno a tured a simrek iti kuarto.
Agidasdasar metten da Balong ken Meling ti miriendada agramanen ti pangrabii. Agsinsinnutilda pay. Mangmangeg ni tata Bantor dagiti garikgikda a kasla pay ketdin garikgik a pangkantiaw kenkuana. “dagiti anakisalbag.” Kunkunana iti nakemna.
Kalpasan ti sumagmano a kanito, napukawen ti karkarna a marikrinana. Mayaten ti bagina a bumangon. Awan ngamin balonna a bitamina isu ngata a bigla a kasdiay ti nariknana. Awan pagkaritna.
Amkenna no mabainan isu a kasdiay laengen ti nariknana. Naawan ngamin ti pasgar ni dayunior iti mapasangpetna da Meling ken Balong.
Agar-arudoken a mapan iti kuarto. Kasla pagnat’ pusa nga agsisiim iti piek a tukmaanna ti pannagna ni tata Bantor. Luktanna koman ti ridaw idi isu met a mailukat. Ni Barti! Immisem ti bangbangir ni tata Bantor.#
