Nobela ni RUDY CONTILLO (Nailathala ito sa Oct. 5 – 11, 2024 print edition)
(Maika-57 a Paset)
NASIPUTAN ni Angkuan ti panagin-inayad ni Carlota a simrek iti kuartoda. Ammona lattan, agnerbios manen ti asawana iti nalabes a panagdanagna.
“No mabalin, Major, saan koma nga agari ti kinadangkes ditoy barangaymi,” ingngilangil ni Angkuan ken ni Major Nap Agustino.
“Ipanamnamak dayta, Mr. Dela Cruz. Saankayo nga agdanag. Addan plano nga isagsaganami ken ni Major Rex ken ti Comelec. Masapul a mapasardeng dagiti mapaspasamak ditoy San Sebastian, nangruna ditoy Kamanguegan. We will keep you posted. We are zeroing in on them. Adu dagiti operatibatayo ita, kaduada dagiti tao ni Major Rex. Ipagarupda a nagnadnaden ti amin iti napasamak ken ni Teniente Charlito. Ngem saan nga agpatingga dagiti taotayo.”
“Ti panaglayus ti pirak, Major, kasano nga abrotenda ti gasgastosenda?” insanamtek ni Angkuan. “Amin dagita, agpatingganto. Adun ti iggemmi nga ebidensia!” Saan a nakatimek ni Angkuan idi perngen ti major. Mabasana ti italtalukatik dagiti mata ti opisial.
Nagyaman ni Angkuan idi agpakada ni Major Nap Agustino. Dayawenna ti prinsipio ti opisial. Awan amakna a mangsipsiput kadagiti managlablabes. Insursurot ni Angkuan ti panagkitana agingga idi sumalpa iti military jeep. Napardas ti panagmaniobra ti drayber a nagbuelta. Iti apagkanito, inalun-onen ti kalsada ti lugan.
Simrek iti kuartoda kalpasanna. Kinasaritana ni Carlota a nakaidda iti katre. Saan latta a maun-uni ti asawana. “Saanka nga agdandanag, sweetheart. Nainget dagiti autoridad nga agbantay iti barangay,” kinuna ni Angkuan a nangap-apros iti bukot ni Carlota.
Saan a sinungbatan ni Angkuan ti asawana. Nangegna ketdi ti mamedmedan a saibbek daytoy. Nalunag ti riknana. Ngem nasken a takderanna ti panagkandidatona a kapitan. Ammona, maawatanto met laeng ti asawana ti amin.
Ad-addan a naingetan ti panagpatrulia dagiti autoridad iti Kamanguegan. Naisalinongen ti barangay iti Comelec Control. Kas impakaammo ni Atty. Baldos, bantayan dagiti polis amin a garaw dagiti kandidato. Tapno maliklikan ti binnara, pinaideposito ni Major Rex dagiti lisensiado nga armas dagiti politiko.
Ni Angkuan ti immuna a nagtungpal. Indepositona ti Caliber .40-na iti PNP. Timmulad da Maestro Amante ken Maestro Pitong. Indepositoda met dagiti armasda.
Adu ti nangdayaw itoy nga inaramid da Angkuan. Isuda ti pagtutungtongan dagiti bumarangay. Pudno kano a pagwadanda. Awan met ti gargaraw ni Kapitan Enteng. Kinatkatawaanda laeng ti inaramid da Angkuan. Natalek ni Angkuan. Mamati kada Major Rex ken Major Nap Agustino a saanen a makapaggaraw dagiti managdakdakes iti Kamanguegan.
KANAYONEN a napudot ti ulo ni Kapitan Enteng. Saanen a makapagdakiwas pay dagiti taona nga agiwaras iti kuarta ken mamutbuteng. Masipsiputan amin a garawda. Manmano payen ti mapmapan iti balayda. Agbuteng dagiti tao. Naibaga kadakuada nga uray dagiti umawat iti kuarta, mairaman a maidarum no mapaneknekan nga inlakoda ti butosda.
Dagiti laengen para kagawadna ti rummuar nga agkamkampania. Masadut a sumurot. Saanna a maanusan ti makiplimplinnastik kadagiti kabarangayanna. Karuprupa ida ti kuarta, sangkadayamudomna.
Nalagip ni Kapitan Enteng ni Ka Zoilo iti dayta a panagpasiar manen dagiti kakaduana. Saan pay a timmawtawag manipud idi nagkaduada ken ni Kagawad Banong. Masuron. Apay nga awan metten ti garawda? Pinaawaganna ken ni Mary idi saan latta a makaidna.
“Ka Zoilo, agsaritakayo kano ken ni kap!” kinuna ni Mary idi makontakna ni Ka Zoilo.
“Hello, hello!” inallawat a dagus ni Kapitan Enteng ti selpon.
“Agur-uraykami iti tiempo,” kinuna ni Ka Zoilo idi agdadaraddan dagiti saludsod ni Kapitan Enteng.
“Panagkunak, natiktikandakami metten ditoy!” innayonna.
Kasla adda nagsullat iti karabukob ni Kapitan Enteng. Saannan a naimdengan dagiti simmaruno pay nga imbaga ni Ka Zoilo maipapan iti planoda nga aramiden ken ni Angkuan.
APAGLABES nga alas nuebe iti agsapa, agkapkape ni Kapitan Enteng iti terasa. Mabilbilang ita dagiti tao iti balayda.
Imbilinna a mapanda amin agkampania. Nabati laeng dagiti coordinators a kasarsarita ni Mary. Masemsem.
Idi insardengdan ti agiwaras, saanen a kas idi ti kinaburnok dagiti mangkomusta kenkuana. Dagiti laengen katulong ken pasurotna ti masansan a kaduada iti nalawa a balay.
Naisardeng ni Kapitan Enteng ti panangigupna iti agas-asuk a kape idi mapasungadanna ti lugan ti Comelec nga agturong iti sango ti balayda.Timmakder.
Saannan nga inuray pay ti panangayab kenkuana ti pasurotda a nagturong iti nakarikep a ruangan. Immulog.
Nagtarus iti nailukat a ruangan. Nailasinna a dagus ni Atty. Baldos iti lugan.
Nariparna pay ti dua a polis a kadua daytoy.
“Naidaw-askayo man, abogado?” impasabet ni Kapitan Enteng idi makadissaag ti Comelec officer iti lugan.
“Good morning, kap,” intung-ed ni Atty. Baldos a nakaiggem iti brown envelop.
“Ipa-receive-ko koma daytoy!” kinuna ti abogado a nangyawat iti kopia ti surat.
“A-ania daytoy, attorney?” nagmulagat ni Kapitan Enteng a nangmira iti inyawat kenkuana ti abogado a papel.
Nagsipael ti karabukobna, kasla lumsot dagiti matana idi palabsanna ti surat.
(Maituloyto)
