Nobela ni Vilmer V. Viloria (Nailathala ito sa Aug. 10 – 16, 2024 print edition)
Maika-8 a paset
KINAYKAYAT ni tata Bantor ti nagidda iti sopa. Saan kano ngamin a sanay nga agidda iti erkon a kuarto nupay kinuna ti balasangna a dina lukluktan diay erkon, madina ta madina lattan. Inyaplagan ket ngarud ni kag. Pilo ti pagiddaanna iti sala ngem inkukotna lattan iti sopa a kasla ketdin adda pasugnodna. Ti pay ketdin imana ti nagpungananna ken ti jaketna ti pinagulesna.
Binay-an lattan ni kag Pilo. Isut’ kayatmo di isu itantanabutobna iti panagpanawna ken katuganganna iti sala ket simreken iti kuartoda ken teacher Lisa.
Alas kuatro pay lang ngem addan kumaradakad iti kusina. Rimmuar metten ni kagawad iti kuartoda ket nakitana nga aglutluton ni tata Bantor. Kaldero ken takuri ti nakasaang iti gas stove. “sinapsapam metten tang.” Kinuna ni kagawad. Awan nangegna a sungbat ti lakay. “Adda hinebra dita ref no kayatyo ti tumagay.” Kinunana sa nagsubli iti kuartoda.
Rinakepna ni teacher Lisa sana inungngo ngem nagballikid ketdi a limmikod ni mistra. Niapay, indata metten ni kagawad ket iti apagapaman bumanurbor manen ti urokna.
Nalawagen idi bumangonda a dua. Apagisu met a sumangpet ni Balong a naggapu idiay ili. Idagasna tay pangpapaitan ti baka ta nagorder idi kalman ni kag. Pilo ken angkelna a Boy.
Isu man ti ibaliktadna a pangpakaldo ken tata Bantor ta kasla ketdin adda pasugnodna nipud pay di rabii. Pittakannanto ti sili diay idasarna kenkuana.
Umisem-isem ni kagawad nga agiw-iwa iti para kappukan.
Pagkilawenna man ketdi ni lakay Bantor sananto tuyagan ti gin ti basoda ta isatda a nasapa.
Mayaten ti panagarub-ob ni tata Bantor iti kaldo ti papaitan. Kasta met ti panangsanapsapna iti kappukan.
Naka-uppaten a tagay iti hinebra ket mayaten ti isemna ken kag. Pilo.
Agtung-tung-ed latta met ni Pils pasaray kiddayanna ni titser Lisa a madama nga agar-aramid ti lesson plan na iti coffee table iti suli. Idi maibusda ti bilog, narasawen ni tata Bantor. Ibanbandonan ti kaadda ti manunangna a guapo, nasingpet ken nalaing a kagawad .
Saan met a mateppelan ni teacher lisa ti ellekna kadagiti ibagbaga ni tatangna.
No kuan, alamanoenna ni Pilo. No kuan maki-apir ket uray la agsapri ti ngiwatna no kasta nga agpaggaak. Agapput met no kua ni kagawad ta masaprian met ti rupana.
Saan a nagbayag, agpulotanen ti lamisaan.#
