By: Gideon A. Visaya
ROXAS, Isabela-Dinakip ng mga operatiba ng pulisya ang dalawang lalaki at nasamsam ang P28-milyong halaga ng pinatuyong marijuana bricks at rolyo sa isang checkpoint sa kahabaan ng national road noong Enero 14 bago maghatinggabi sa bayang ito, sinabi ng pulisya ngayong Miyerkules (Jan.15).
Inihayag ni Police Brig. Gen. Antonio Marallag Jr., Cagayan Valley regional police director, na inaresto ng mga pulis ang isang Rico at isang Jomel, kapwa 30-anyos ng Baranka Ilaya sa Mandaluyong City matapos silang makakuha ng 222 bloke ng marijuana brick na nagkakahalaga ng P26.64-milyon sa street value at 19 na pakete ng rolled dried marijuana na nagkakahalaga ng P2.28-million sa loob ng kanilang sasakyan.
“Ang mga checkpoint ay napatunayang instrumental tulad nito sa pag-iwas sa mga krimen. Sisiguraduhin natin na ang mga checkpoints sa buong rehiyon ay 24/7 ang pagbabantay lalo na sa panahon ng halalan,” dagdag ng heneral.
Pinara ng mga pulis sa Roxas ang SUV na minamaneho ni Jomel ngunit kumaripas ito ng patakbo sa sasakyan at tuluyang sumabit at nabangga ang isang police car.
Sa halip na huminto, pinabilis ng driver ang sasakyan at kalaunan ay nakorner sa isang hot pursuit operation sa kahabaan ng Centro sa bayan ng Mallig, Isabela.#