Nasamsam at winasak ng Benguet Police Provincial Office (PPO) ang mahigit P430,000 halaga ng mga tanim na marijuana sa isinagawang operasyon sa Kibungan, Benguet noong Pebrero 22, 2025.
Ayon sa ulat ng Benguet PPO, tatlong plantasyon ng marijuana ang natagpuan sa Sitio Les-eng, Brgy. Tacadang. Umabot sa 2,150 puno ng ganap na tanim na marijuana ang nasamsam, na may tinatayang halaga na P430,000 batay sa Standard Drug Price.
Pinagsama-samang operasyon ito ng 2nd Benguet Provincial Mobile Force Company, Kibungan Municipal Police Station, Provincial Drug Enforcement Unit ng Benguet PPO, at Philippine Drug Enforcement Agency-CAR. Inalis ang mga tanim na marijuana at sinunog sa mismong lugar, habang may kinuhang sapat na sample para sa pagsusuri ng Regional Forensic Unit CAR.
Patuloy naman ang imbestigasyon para matukoy ang iba pang posibleng plantasyon sa kalapit na lugar at ang mga taong responsable sa pagtatanim.
Naging matagumpay ang operasyon sa pagpuksa sa mga tanim na marijuana sa Benguet, ngunit patuloy ang pagbabantay ng mga awtoridad para masugpo ang ilegal na aktibidad na ito.#
