Ulat ni VINCE JACOB A. VISAYA
LUNGSOD NG SANTIAGO-Hinimok ni Senador Ramon Revilla ang pagiging matatag at may pag-asa ang mga nasalanta ng bagyo sa pamamahagi niya ng relief package sa ilalim ng kanyang Bayanihan Relief project sa Rosario barangay hall sa lungsod na ito kanina, Nobyembre 19.
“Sa kabila ng mga pangyayari, masaya ako na makita kang ligtas at maayos. Tandaan lamang, huwag mawalan ng pag-asa. Tuloy-tuloy ang buhay at tayo ay babangon,” pahayag ni Senador Revilla na umani ng palakpak ng mga tao.
Ang mga benepisyaryo sa Rosario ay bahagi lamang ng mga binigyan rin sa Isabela at sa mga kalapit na probinsya ng Quirino at Nueva Vizcaya na nakatanggap ng relief mula sa Bayanihan Relief trucks mula sa tanggapan ng senador sa buong rehiyon.
Binanggit ng senador na ang mga sunud-sunod na bagyo tulad nina Kristine, Leon, Marce, Nika, Ofel, at Pepito ay hindi dapat magpapahina sa diwa ng mga tao at ang tulong ay makakatulong sa kanila.
Namahagi si Revilla ng pagkain, tubig at mga gamit sa bahay sa mga taganayon.
Kasama niya si Santiago City Mayor Sheena Tan-Dy, Isabela 6th District Rep. Faustino “Inno” Dy V at iba pang opisyal ng gobyerno.
Sa Quirino, kasama niya sina Gobernador Dakila Carlo Cua, Rep. Midy Cua, at dating Rep. Junie Cua. Sa Nueva Vizcaya, sinalubong siya ng mga opisyal ng pamahalaang panlalawigan at bayan.#
