Ulat  ni  FELIX CUNTAPAY JR.

Nadakip ang isang kawani ng telekomunikasyon habang nasamsam sa kanya ang anim na kilo ng pinatuyong marijuana at mga binhi na nagkakahalaga ng P720,000 sa isang buy-bust operation sa Narra St., Calaocan village kahapon

Ayon sa ulat ng Philippine Drug Enforcement Agency-Cagayan Valley, kinilala ang suspek na si Narciso Buen Jr., 24-anyos na residente ng Divisoria village. Tumanggi siyang magsalita sa media at wala pang pahayag ang kanyang mga kaanak.

Maliban sa marijuana, inimpound rin ang kanyang motorsiklo.

Sinampahan na ng kasong paglabag sa RA 9165 ang suspek.

Sa Nueva Vizcaya, dinakip ang magka-live-in na sina Johnny Crisostomo Jr., 51-anyos na tricycle driver, at Jacquiline Castillano, 36-anyos na tindera nang magbenta sila ng hinihinalang shabu sa PDEA poseur-buyer sa Almaguer North, Bambang, Nueva Vizcaya kamakalawa. Wala pa silang pahayag sa media at maging ang kanilang mga kaanak.

Nasamsam mula sa kanila ang isang supot ng shabu na ginamit sa buy-bust at anim na iba pang hinihinalang shabu na nagkakahalaga ng P6,800 at isang traysikel.   Sinampahan na sila ng kaso sa piskalya dahil sa paglabag sa RA 9165.#

Sinunog ng mga kasapi ng Philippine Drug Enforcement Agency agents at PNP-Kalinga ang nagkakahalaga ng P21.9-million na plantasyon ng sa simultaneous marijuana eradication drives sa mga barangays Buscalan, Butbut Proper at Loccong sa bayan ng Tinglayan, Kalinga noong Martes.

Ayon sa ulat, sinira ang isang milyong piso na halaga ng itinanim na marijuana sa Barangay Buscalan habang sinunog din ang 57,500 piraso ng fully-grown marijuana plants at sinira ang 65,000 pirasong marijuana seedlings sa anim na plantasyon sa na nagkakahalaga ng P14.1-million sa Barangay Butbut Proper.

Sa Barangay Loccong, sinira ang 34,000 piraso ng mga puno ng fully-grown marijuana na nagkakahalaga ng P6.8-million sa apat na marijuana plantation sites.

Walang nadakip na cultivators sa mga lugar.#

Ulat  ni  BOBBY DAGUIO

Inaalam na ngayon ng mga kinauukulan ang pagkakakilanlang ng mga kawatan na nakasakay ng dalawang motorsiklo makaraang tangayin ang dalawang panabong na manok kamakalawa (June 17)  ng 2:45 ng madaling araw sa Barangay Lanna, Solana, Cagayan.

Ayon sa pulisya, ipinaalam ng barangay ang pagnanakaw ng apat na katao na nakasakay na tig-dadalawa sa dalawang motorsiklo at tila alam na alam ang gagawin nang tangayin ang dalawang panabong na manok sa harap ng isang bahay.

May mga teorya na rin at suspetsa ang barangay at kapulisan pero hindi pa nila ito ipinapaalam habang tinutugis pa ang mga kawatan.

Hindi pa narekober ang ninakaw na panabong na nagkakahalaga ng nasa P20,000 hanggang P75,000 o mas mahal pa depende sa klase at breeding ng manok.#

Ulat  ni BOBBY DAGUIO

Nauwi sa barilan ang pag-raid sa tupada  at siyam katao ang nadakip sa Sitio Disiguit, Brgy. Gangalan, San Mariano, Isabela.

Natamaan ng bala ng baril sa balikat si Randy Talosig, 33-anyos na magsasaka sa Barangay Binatug at isa sa mga dinakip. Dinala siya sa San Mariano Community Hospital para magamot.

Maliban kay Talosig, dinakip din sina Vicente Cristobal, Mario Bala, Reymark Agustin, Randy Bulan, Marcial Antonio, Edito Fernandez, Leomar Antonio at Domingo Paguiriguan.

Ang unang putok ng baril raw ay galing sa mga tumakas na abot sa 20 katao kaya gumanti ng putok ang mga pulis.

Nasamsam sa lugar ang walong panabong na manok; P5,016 bet money; 17 piraso ng mga tari at anim na mga motorsiklo.   Sinampahan na kamakailan sa piskalya ang mga salarin dahil sa paglabag sa illegal gambling law o RA 9287.#